28
Efirayimu tara ti yaa ka tɔngɔ
1 Jɔlɔgɔ yɛn Samari†28.1: Samari ca ko kìla pye Izirayɛli wunluwɔ tara nda wa yɔnlɔparawa kamɛŋgɛ kɛɛ yeri ti cagbɔgɔ ye. ca ki wogo,
ki ca ŋga ki yɛn paa wunluwɔ njala yɛn,
ko ŋga ki yɛn ma cɛn wa gbunlundɛgɛ tara tanra ti sɔgɔwɔ.
Ko Efirayimu tara sinwɔɔlɔ pe maa pe yɛɛ gbogo ki kala na.
Pe fereyaara ti yɛn yarifyɛɛnrɛ nda tì fanla ko cɛ wa pe sinwɔɔlɔ pe go na.
2 Ye wele, naŋa wà yiri wa we Fɔ wi yeri,
naŋa ŋa wi yɛn fanŋga ni ma pye kotogofɔ†28.2: Naŋa ŋa wi yɛn fanŋga ni ma pye kotogofɔ wo wi yɛn Asiri tara wunlunaŋa we.;
wi yɛn na paan paa sinndɛɛrɛ tisaga yɛn,
paa tisaga tifɛliŋgbɔgɔ ŋga ki maa jɔgɔwɔ piin ki yɛn,
paa tisagbɔgɔ yɛn, ŋga ki ma pan ma lɔrɔ ti fo.
Wi lewɛlɛwɛ kapyere ti yaa yaraga pyew ki jan tara.
3 Ki wunluwɔ njala na lì ti a Efirayimu tara sinwɔɔlɔ pe nɛɛ pe yɛɛ gbogo,
leele pe yaa kali tangala tɔɔrɔ ni.
4 Ki yarifyɛɛnrɛ nda tì fanla, a pèri pye pe fereyaara,
to nda ti yɛn wa pe gbunlundɛgɛ tara tanra ti go na,
ti yaa ka pye paa figiye pige yɛn,
ŋga kì keli ma pe sannda ti na ti cɔsanga wi yɛgɛ.
Lere ŋa kaga yan, wi maga cɔ,
mbe sigi ka le teere.
5 Ko pilige ko ni, Yawe Yɛnŋɛlɛ na yawa pi ni fuun fɔ, li woolo sanmbala mbele pè koro go na, li yaa ka pye paa pe wunluwɔ njala gbɔgɔwɔ wolo yɛn, konaa mbe pye paa pe fereyaraga tiyɔngɔ yɛn. 6 Mbele pe yaa ka cɛn mbaa kiti wi kɔɔn, li yaa ka kasinŋge jatere kan pe yeri; mbele pe ma malaga kì gbɔn juguye pe ni, mbe pe wɔnrɔgɔ fɔ wa ca ki yeyɔngɔ ki na, li yaa kotogo le pe ni.
Sinwɔɔlɔ pe yɛn na tɛgɛ
Yɛnŋɛlɛ yɔn sɛnrɛ yofɛnnɛ pe na
Yɛnŋɛlɛ yɔn sɛnrɛ yofɛnnɛ pe na
7 Zhuda tara woolo poro fun pe yɛn na gbali duvɛn wi kala na,
sinmɛ wɛlɛwɛ pì pe puŋgo.
Saraga wɔfɛnnɛ poro naa Yɛnŋɛlɛ yɔn sɛnrɛ yofɛnnɛ pe yɛn na gbali sinmɛ wɛlɛwɛ pi kala na,
pè tin duvɛn wi ni;
sinmɛ wɛlɛwɛ pì pe puŋgo,
pe kaa pe yariyanra ti sɛnrɛ yuun pe maa gbali,
pe maa fingi nɛɛ kiti wi kɔɔn.
8 Pe tabaliye pe ni fuun pe yɛn ma yin pe tuguro naa pe fyɔngɔ yaara ti ni,
laga ka si koro naa kpoyi wa tabaliye pe na.
9 Pe yɛn na yuun fɔ: «Ambɔ Ezayi wila jaa mbaa nari kajɛnmɛ ni okɛ?
Wila jaa mbaa kagala kɔrɔ jɛnmɛ kaan ambɔ yeri yɛrɛ?
Wi yɛn naga sɔnri ndɛɛ piile mbele pè laga yinnɛ na fɔnŋgɔ poro pele wɛlɛ woro wi le?
Piile mbele pè wɔ yinnɛ ni fɔɔnfɔɔn ŋga, we yɛn poro pele wi le?
10 Katugu wi yɛn na yuun fɔ: ‹Ye toro lagamɛ, ye ye lagamɛ,
yege pye yɛɛn, ye kari yɛɛn,
ye jɛnri pye lagamɛ, ye jɛnri pye wamɛ†28.10: Ki sɛnrɛ cɛnlɛ nda leele pàa pye nari yuun mbege naga fɔ pe woro piile mbele pe yɛn na kara poro pele, jaŋgo mbaa tɛgɛ konaa mbaa ki lakoo Yɛnŋɛlɛ yɔn sɛnrɛ yofɔ wi na..› »
11 Ki kala na, pe woro na leele mbele sɛnrɛ nuru,
to nda ti yɛn cɛnlɛ la yɛgɛ woolo sɛnrɛ,
ko sɛnrɛ to Yawe Yɛnŋɛlɛ li yaa ka tɛgɛ mbaa para pe ni.
12 Làa ki yo pe kan fɔ: «Lagamɛ wi yɛn wogosaga ye,
ye leele mbele pè te pe yaga pe cɛn pe wogo.
Wogosaga koyi yɛɛn.»
Ɛɛn fɔ pe sila yɛnlɛ mbe logo na yeri†28.12: Ki sɛnrɛ nda tì yo wa 1 Korɛn 14.21laga ki ni..
13 Ki kala na, poro wo yeri, Yawe Yɛnŋɛlɛ li sɛnrɛ ti yaa pye fɔ:
«Ye toro lagamɛ, ye ye lagamɛ,
yege pye yɛɛn, ye kari yɛɛn,
ye jɛnri pye lagamɛ, ye jɛnri pye wamɛ.»
Kona, pe yaa gbali mbe to mbe jali pe sɛnnɛ li na, mbeli kɔn,
pe yaa ka ye pɛnɛ ni, li pe yigi.
Go yɛnlɛ sinndɛlɛgɛ
14 Ki kala na, yoro mbele ye maa kala lakoo leele na,
ma pye ma cɛn Zheruzalɛmu ca woolo pe go na,
ye Yawe Yɛnŋɛlɛ li sɛnrɛ ti logo!
15 Ye maa yuun fɔ: «Wè yɔn finliwɛ le kunwɔ pi ni,
ma yɔn fɔlɔ lɛ kuulo tara ti yeri.
Ali na jɔlɔgɔ jɔgɔwɔ pyewogo ka pan, ki se gbɔn we na;
katugu wè nambara wi pye we larasaga,
ma yagbolo li tɛgɛ na we yɛɛ tɔnni.»
16 Ki kala na, pa we Fɔ, Yawe Yɛnŋɛlɛ lì yo yɛɛn fɔ:
«Ye wele, mi yɛn na sinndɛlɛgɛ ka teri mbege pye gonɔgɔ lege sinndɛlɛgɛ wa Siyɔn ca;
Ki yɛn sinndɛlɛgɛ jɛŋgɛ,
go yɛnlɛ sinndɛlɛgɛ koŋgbanŋga yi, sinndɛlɛgɛ sɔnŋgbanga wogo yi, go nɔgɔ lege sinndɛlɛgɛ jɛŋgɛ yi.
Lere ŋa kaga pye wi kɛɛ ndagaserege, wi se ka fyɛ mbe fe†28.16 Ki sɛnrɛ nda tì yo wa Yuuro 118.22-23; Ɔrɔmu 9.33; 10.11; 1 Pyɛ 2.6..
17 Mi yaa kaselege ki pye na taanlamana,
mbe kasinŋge ki pye na mbogo sinmana.
Ye larasaga ŋga ki yɛn yagbogowo we, sinndɛɛrɛ tisaga ki yaa ki pɛ mbege wɔ wa;
tɔnŋgbɔɔ pa yaa pan mbe ye yagbogowo mba pi yɛn ye larasaga pi kɔ mboo wɔ wa.»
18 Kona, yɔn finliwɛ mba yè le kunwɔ pi ni, pi yaa ka jɔgɔ mbe wɔ wa,
yɔn fɔlɔ na yè kɔn kuulo tara ti yeri, li se ka koro wa naa.
Jɔlɔgɔ ŋga ki maa jɔgɔwɔ piin, na ka ka pan,
ki yaa ka ye purugu mbe toro.
19 Na jɔlɔgɔ ki kaa toro sanga o sanga, ki yaa gbɔn ye na;
katugu ki yaa kaa tooro pinliwɛ pyew, naa yɔnlɔ pyew konaa yembinɛ pyew;
ki sɛnrɛ ti logowo po cɛ ko yaa sunndo kɔngɔ wa ye na.
20 Sinlɛyaraga ki yaa ka pye mbe were, fɔ lere se ka ya mbe sinlɛ ki na mbe sanga,
paritɔnŋgɔ ki yaa ka pye mbe kologo, fɔ lere se ka ya mboo yɛɛ tɔn ki ni†28.20: Sinlɛyaraga naa paritɔnŋgɔ ŋga ki sɛnrɛ tì yo, to yɛn ma taanla sɛnwee piile pe yaara nda ki mbatagambala pè pe jigi wi taga ti na to sɛnrɛ na. Yɛnŋɛlɛ yɔn sɛnrɛ yofɔ wi yɛn na tɛgɛ ko yaara to na..
Ŋga Yɛnŋɛlɛ li yaa ka pye
lepeele pe na
lepeele pe na
21 Yawe Yɛnŋɛlɛ li yaa ka yiri paa yɛgɛ ŋga na làa yiri wa Perazimu yanwiga ki na we†28.21: 2 Sami 5.20;
li yaa ka nawa ŋgban paa yɛgɛ ŋga na làa nawa ŋgban wa Gabawɔn†28.21: Zhozu 10.10-11; 1 Kuro 14.16 ca gbunlundɛgɛ ki ni we.
Li yaa ka li kapyege ki pye, kapyege ŋga ki cɛnlɛ la fa pye;
li yaa kali tunŋgo ki pye, kafɔnnɔ tunŋgo ŋga ki cɛnlɛ la fa pye.
22 Ki kala na koni, yaga ka koro mbaa kala lakoo leele na,
jaŋgo ye pɔmaŋgala kaga ka ye sere mbe ŋgban ye na;
katugu mìgi logo we Fɔ, Yawe Yɛnŋɛlɛ na yawa pi ni fuun fɔ li yeri fɔ tara ti ni fuun ti tɔngɔkala lì kɔn ma tɛgɛ.
Kɛrɛ falifɔ wi tijinliwɛ
konaa Yɛnŋɛlɛ li kajɛnmɛ kala
konaa Yɛnŋɛlɛ li kajɛnmɛ kala
23 Koni ye nuŋgbolo jan ye logo na yeri,
yanla sɛnrɛ ti logo ye wali ti na.
24 Naga yɛn ma, lere ŋa kaa laga fali mbe yariluguro lugu, wi ma koro na fali suyi wi le?
Naga yɛn ma, wi ma koro na palaye wari, nakoma na tara ti yɔn yala sanga pyew wi le†28.24: Yɛgɛ ŋga na falifɔ wila koro mbaa fali suyi, ki pyelɔmɔ nuŋgba pi na fun Yɛnŋɛlɛ li kiti kɔnsanga wi yɛn ma tɛgɛ wa wagati wi ni.?
25 Na wi ka laga ki yɔn yala mbe kɔ,
ko puŋgo na, wi mɛɛ jɛn ma sɛrɛ yaara nda pe yinri nizhɛli ti pire ta yanragi wa, konaa mbe nda pe yinri kumɛ ti pire ta lugu wa;
ko puŋgo na, wi mɛɛ jɛn ma bile wi lugu koloyo koloyo,
mbe si ɔrizhi wi lugu kɛrɛ ti laga ka yɛgɛ ni,
mbe si jɛn mbe shɔgɔlɔ ke lugu mbe kɛrɛ ti maga.
26 Ma si yala, Yɛnŋɛlɛ lo lùu naga ki pyelɔmɔ pi ni,
ma ki nagawa pi kan wi yeri.
27 Paa yarilire sunkanŋgaga pɔ nɛgɛ na mbaa sɛrɛ yaara nizhɛli ti suun mbaa ti pire ti woo;
paa lugu sɛrɛ yaara kumɛ ti na wotoro ŋgerege ni mbaa ti pire ti woo.
Ɛɛn fɔ pe ma nizhɛli wi sun simbinɛ ni mboo pire ti wɔ,
mbe kumɛ wi gbɔn kanŋgagala ni mboo pire ti wɔ.
28 Pe ma bile wi sun mboo muwɛ wɔ mboo pye buru,
ɛɛn fɔ paa koro mbaa wi suun mbaa wi pyɔ wi woo.
Pe ma lugu yarilire ti na wotoro ŋgeere naa nɛrɛ ni, nari tangala nari pire ti woo,
ɛɛn fɔ paa ti tangala mberi purugu†28.28: Yɛgɛ ŋga na paa yarilire pire ti tangala mberi purugu, ki pyelɔmɔ nuŋgba pi na fun, pe se ka Yɛnŋɛlɛ li woolo pe tɔngɔ mbe pe kɔ pew..
29 Ko wogo ŋga fun pa ko yiri wa Yawe Yɛnŋɛlɛ na yawa pi ni fuun fɔ li yeri,
kagala ŋgele lì kɔn ma tɛgɛ mbe pye ke yɛn kafɔnnɔ wogolo,
li kajɛnmɛ pì gbɔgɔ.
†28:1 28.1: Samari ca ko kìla pye Izirayɛli wunluwɔ tara nda wa yɔnlɔparawa kamɛŋgɛ kɛɛ yeri ti cagbɔgɔ ye.
†28:2 28.2: Naŋa ŋa wi yɛn fanŋga ni ma pye kotogofɔ wo wi yɛn Asiri tara wunlunaŋa we.
†28:10 28.10: Ki sɛnrɛ cɛnlɛ nda leele pàa pye nari yuun mbege naga fɔ pe woro piile mbele pe yɛn na kara poro pele, jaŋgo mbaa tɛgɛ konaa mbaa ki lakoo Yɛnŋɛlɛ yɔn sɛnrɛ yofɔ wi na.
†28:12 28.12: Ki sɛnrɛ nda tì yo wa 1 Korɛn 14.21laga ki ni.
†28:16 28.16 Ki sɛnrɛ nda tì yo wa Yuuro 118.22-23; Ɔrɔmu 9.33; 10.11; 1 Pyɛ 2.6.
†28:20 28.20: Sinlɛyaraga naa paritɔnŋgɔ ŋga ki sɛnrɛ tì yo, to yɛn ma taanla sɛnwee piile pe yaara nda ki mbatagambala pè pe jigi wi taga ti na to sɛnrɛ na. Yɛnŋɛlɛ yɔn sɛnrɛ yofɔ wi yɛn na tɛgɛ ko yaara to na.
†28:21 28.21: 2 Sami 5.20
†28:21 28.21: Zhozu 10.10-11; 1 Kuro 14.16
†28:24 28.24: Yɛgɛ ŋga na falifɔ wila koro mbaa fali suyi, ki pyelɔmɔ nuŋgba pi na fun Yɛnŋɛlɛ li kiti kɔnsanga wi yɛn ma tɛgɛ wa wagati wi ni.
†28:28 28.28: Yɛgɛ ŋga na paa yarilire pire ti tangala mberi purugu, ki pyelɔmɔ nuŋgba pi na fun, pe se ka Yɛnŋɛlɛ li woolo pe tɔngɔ mbe pe kɔ pew.