59
Leele pe kapere tì fogo le
poro naa Yɛnŋɛlɛ li sɔgɔwɔ pi ni
poro naa Yɛnŋɛlɛ li sɔgɔwɔ pi ni
1 Ayoo, Yawe Yɛnŋɛlɛ li kɛɛ kii were mbege kan liga ka ya mbe ye shɔ;
li woro nuŋgbojili mbege kan liga ka ya mbe logo ye yeri.
2 Ɛɛn fɔ ye kambasinnde to tì fogo le yoro naa ye Yɛnŋɛlɛ li sɔgɔwɔ pi ni;
ye kapere to tìli yɛgɛ ki lara ye na,
maga kan li se yɛnlɛ mbe logo ye yeri.
3 Leele mbele yè gbo pe kasanwa pì ye kɛyɛn yi tɛgɛ fyɔngɔ ni,
ye kapere tì ye yombɛgɛlɛ ke tɛgɛ fyɔngɔ ni;
ye maa yagbogolo finlɛlɛ wa ye yɔn ki ni,
ye ŋgayinŋgele ke maa sɛnrɛ mbasinnde yuun kalɛgɛrɛ ni.
4 Lere kpɛ woro na kiti wi kɔɔn kasinŋge ni,
lere kpɛ woro na kiti kɔngɔ ki piin kaselege ni.
Pe ma kɛɛ kan yagbogowo sɛrɛya na, na go fu sɛnrɛ yuun;
pe ma tipege ki sɔnri wa pe nawa, mɛɛ kapege ki pye.
5 Pe ma sinlɛ firisho jɛnrɛwɛ pi na maa jiri,
mbe mɛrɛ wa paa sipee mɛrɛ yɛn.
Lere ŋa ka ki wɔɔgɔ jɛnɛ la ka, wo yaa ku;
lere ŋa ka ki wɔɔgɔ jɛnɛ la jiri, mɛrɛgɛ ki ma yiri wa li ni.
6 Mɛrɛ nda pe ma wa paa sipee mɛrɛ yɛn, pe se ya mberi ti paraga,
pe se ya mbege tɛgɛ mbe pe yɛɛ tɔn ki ni;
pe kapyegele ke yɛn kapyegele tipegele,
lewɛlɛwɛ kapyere to cɛ pe maa piin pe kɛyɛn yi ni.
7 Pe maa fee kapege pyege ki puŋgo na,
pe maa fyɛɛlɛ mbe lere ŋa wi yɛn jɛrɛgisaga fu wi gbo.
Pe sɔnrimɔ po yɛn mbaa kapege piin,
jɔgɔwɔ naa tɔngɔwɔ po pi yɛn wa pe torosara ti ni.
8 Pee yɛyinŋge konɔ li jɛn,
kasinŋge woro wa pe torosara ti ni;
koŋgolo ŋgele kè koolo koro pe maa tanri ke na,
lere o lere ka ki konɔ li lɛ, wo se yɛyinŋge ki yan yɛnlɛ ni.
Yɛnŋɛlɛ li woolo pàa pe kapere
ti jɛn ma yere ti na
ti jɛn ma yere ti na
9 Ko kì ti kasinŋge ki laga yɛn ma lali we ni,
shɔwɔ pi se gbɔn we na.
Wàa pye na yanwa pi singi,
ɛɛn fɔ diwi wo cɛ wì ye.
Wàa pye na lalaaga ki singi ki pan,
ɛɛn fɔ we yɛn na tanri wa wɔwɔ pi ni.
10 We yɛn na talitali paa fyɔɔn ma kaa na talitali na mbogo ka sɔlɔgi na kee;
we yɛn na talitali paa leele mbele yɛngɛlɛ woro pe na pe yɛn.
We yɛn na kunrugu yɔnlɔfunŋgbanga na ma mbe yo fɔ yembinɛ wɔ;
we yɛn ŋgbaanla, ɛɛn fɔ konaa ki ni fuun, we yɛn paa gboolo yɛn.
11 We ni fuun we yɛn na kuunru paa cɛnrɛ urusiye pe yɛn;
we yɛn na kɔngɔri paa keteŋgele yɛn.
Wàa pye naga sɔnri Yɛnŋɛlɛ li yaa pan mbe we shɔ, ɛɛn fɔ lii we shɔ.
Wàa pye naga sɔnri mbe shɔwɔ pi ta, ɛɛn fɔ pi laga lali we ni.
12 Katugu we lasiri jɔgɔwɔ pì lɛgɛ ma yɛgɛ sɔgɔwɔ we Fɔ,
we kapere ti yɛn na we jɛrɛgi,
we kajɔgɔrɔ ti yɛn we na;
wè we kambasinnde ti jɛn.
13 Wè pye mbalogombolo ma Yawe Yɛnŋɛlɛ li fanla,
wè puŋgo le we Yɛnŋɛlɛ li ni.
We yɛn na lewɛlɛwɛ kapyere sɛnrɛ yuun, ma yiri ma je li na,
we yɛn na yagbogowo sɛnrɛ sɔnri wa we nawa nari yuun.
14 Kì pye ma, ŋga ki yɛn ma yala kì puŋgo le we ni,
a kasinŋge kì laga lali we ni;
kaselege kii yeresaga ta wa we katoro ti ni,
ŋga ki yɛn ma sin kii yeresaga ta wa.
15 Kaselege kì kɔ ma wɔ wa;
lere ŋa kaa yɛɛ laga kapege ki na, pe ma wo kɛɛ yaara to koli wi yeri.
Yɛnŋɛlɛ li yaa kali woolo pe shɔ
Ŋga ki yɛn ma yala ki woro na piin,
ki wogo ki Yawe Yɛnŋɛlɛ li mbɛn.
16 Lìgi wele maga yan, fɔ ali lere kpɛ wo woro wa,
kì to li yɔn na fɔ lere kpɛ woro wa na kasulugo piin.
Kì pye ma, a li yɛɛra kɛɛ kì pye li sagawa,
a li kasinŋge kì pye li kɛɛndagaserege†59.16: Eza 63.5.
17 Lì kasinŋge ki le li yɛɛ na paa malaga gbɔnderege yɛn,
ma shɔwɔ pi pye paa tugurɔn njala yɛn, mali kan wa li go ki na.
Lì li kayaŋga wɔmɔ pi pye paa derege yɛn, maga le li yɛɛ na,
ma li lewɛlɛwɛ kapyere ti pye paa derigbɔgɔ yɛn, maga le†59.17: Efɛ 6.14-17; 1 Tesa 5.8.
18 Li yaa ka lere nuŋgba nuŋgba pyew wi sara mbe yala wi kapyegele ke ni,
mbe pye naŋgbanwa gbɔɔ ni li winfɛnnɛ pe ni.
Li yaa ka li juguye pe sara, mbe yala ŋga ki daga pe ni ki ni,
mbe lɔgɔ fugo tara fɛnnɛ mbele wa lege pe le jɔlɔgɔ, mbe yala ŋga ki daga pe ni ki ni.
19 Ki ka pye ma, mbege lɛ wa yɔnlɔ tosaga kɛɛ yeri, pe yaa la fyɛ Yawe Yɛnŋɛlɛ li mɛgɛ ki yɛgɛ,
mbe sa gbɔn wa yɔnlɔ yirisaga kɛɛ yeri, pe yaa la fyɛ li gbɔgɔwɔ yanwa pi yɛgɛ.
Li yaa ka pan paa tɔnŋgbɔɔ yɛn, mba pi yɛn na fuun ŋgbanga,
mba Yawe Yɛnŋɛlɛ li yɔn tifɛlɛgɛ kùu wɔnrɔgɔ.
20 Go shɔfɔ wa yaa pan wa Siyɔn ca;
Zhakɔbu setirige piile mbele ka pe kapere ti jɛn mberi yaga, wi yaa ka poro go shɔ.
Yawe Yɛnŋɛlɛ lo lì yo ma.
21 Yawe Yɛnŋɛlɛ lì yo fɔ: «Mi wo na, yɔn finliwɛ mba mi yaa le pe ni, powi mba: ‹Na yinnɛ li yaa pye pe ni, na sɛnrɛ nda mì le pe yɔn, ti se ka shɔ pe yeri, ti se ka shɔ pe piile pe yeri, ti se ka shɔ pe piile poro piile pe yeri, mbege lɛ yiŋgɔ fɔ sanga pyew†59.21: Ezayi wi yɛn na Yɛnŋɛlɛ li yɔn finliwɛ pi sɛnrɛ yari naa fɔnŋgɔ, paa yɛgɛ ŋga na Zheremi naa Ezekiyɛli pàa keli maga pye we (Zhere 31.31-34; Eze 36.26-27)..› Yawe Yɛnŋɛlɛ lo lì yo ma.»