Yɛnŋɛlɛ yɔn sɛnrɛ yofɔ
ZHEREMI
wi sɛwɛ
Sɛwɛ wi nawa sɛnrɛ
Yɛnŋɛlɛ yɔn sɛnrɛ yofɔ Zheremi wìla ki yari fun paa Yɛnŋɛlɛ yɔn sɛnrɛ yofɛnnɛ sanmbala pe yɛn, fɔ Yɛnŋɛlɛ li yaa jɔlɔgɔ wa Zhuda tara woolo pe na pe kapere naa pe yarisunndo gbɔgɔwɔ pi kala na. Ɛɛn fɔ Zheremi wi Yɛnŋɛlɛ yɔn sɛnrɛ yolɔmɔ pìla pye pi yɛ sanmbala pe woo pi ni, katugu wo la pye na leele pe yɛrɛgi ma yo pe pe yɛɛ go sogo pe juguye pe kan. Ki kala na, tara woolo pàa pye na Zheremi wi jate paa leele fanlafɔ yɛn. Kì pye ma, pàa wi jɔlɔ fɔ jɛŋgɛ. Ɛɛn fɔ Yɛnŋɛlɛ yɔn sɛnrɛ nda fuun Zheremi wìla yo, ti kagala kàa kaa pye wi yɛgɛ na konaa tara woolo pe yɛgɛ na. Wunlunaŋa Nebukanezari wi maliŋgbɔɔnlɔ ŋgbeleye yìla pan ma to Zheruzalɛmu ca ki na, ma shɛrigo gbɔgɔ ki tɔngɔ. Pàa Zhuda tara wunlunaŋa wo naa tara woolo pe lɛgɛrɛ yigi kasopiile, ma kari pe ni tara ta yɛgɛ ni.
Zheremi wìla pye lere wa, ŋa kala maa jori. Yɛnŋɛlɛ làa kiti kɔngɔ ŋga sɛnrɛ yo tara woolo pe kanŋgɔlɔ ma yo wiri yo pe kan, ki sɛnrɛ tìla wi jatere wi piri wi na. Yawe Yɛnŋɛlɛ li sɛnrɛ tìla pye paa kasɔn yinnɛ yɛn, na sori wa wi kotogo ki na, wi saa ya mbe pyeri na wi woro nari yuun. Ŋga kìla pye sagawa po ni, ko yɛn fɔ Zheremi wi sila pye na jɔlɔgɔ sɛnrɛ to cɛ yuun. Wìla pye naga yari fun fɔ Zhuda tara woolo mbele pàa yigi kasopiile, ma kari pe ni tara ta yɛgɛ ni, pe yaa ka sɔngɔrɔ mbe pan, mbe cɛn wa Zhuda tara naa fɔnŋgɔ. Wìla pye na para fun pilige ka wogo na, ŋga ni Yɛnŋɛlɛ li yaa ka yɔn finliwɛ fɔnmbɔ le lo naa sɛnwee wi ni pe sɔgɔwɔ. Ki sɛnrɛ ti nda fɔ:
Yawe Yɛnŋɛlɛ lo lì yo ma fɔ:
«Yɔn finliwɛ mba mi yaa ka le Izirayɛli woolo pe ni, pow mba fɔ:
‹Mi yaa kanla lasiri sɛnrɛ ti le wa pe nawa,
mberi yɔnlɔgɔ wa pe kotoro ti na.
Mi yaa ka pye pe Yɛnŋɛlɛ, pe yaa ka pye na woolo› » (Zhere 31.33).
Sɛwɛ wi yɛn ma kɔɔnlɔ yɛgɛ ŋga na
Yɛnŋɛlɛ li yaa jɔlɔgɔ wa Zhuda tara woolo konaa Zheruzalɛmu ca woolo pe na 1–26
Yɛnŋɛlɛ li yaa jɔlɔgɔ wa Zhuda tara ti na 1–12
Zheremi wìla yo pe yaa Izirayɛli woolo pe yigi kulolo mbe kari pe ni 13–20
Zhuda tara woolo poro naa Zheruzalɛmu ca woolo pe jɔlɔgɔ kagala 21–26
Zheremi wìla yiri Yɛnŋɛlɛ yɔn sɛnrɛ yofɛnnɛ yagboyoolo pe kɔrɔgɔ 27–29
Yɛnŋɛlɛ li yaa ka sɔngɔrɔ li woolo pe ni wa pe tara 30–33
Sɛnrɛ nda Zheremi wìla yo Sedesiyasi wo naa Erekabu setirige piile pe kan 34–35
Zheremi wìla jɔlɔ maga ta wi yɛn Yɛnŋɛlɛ yɔn sɛnrɛ yofɔ 36–45
Pàa Zheruzalɛmu ca ki tɔngɔ 36–42
Zheremi wi karaga wa Ezhipiti tara 43–44
Yɛnŋɛlɛ làa para Baruki wi ni 451.1-5
Yɛnŋɛlɛ li yaa ka jɔlɔgɔ wa cɛngɛlɛ sanŋgala ke na 46–51
Zheruzalɛmu ca ki tɔngɔwɔ sɛnrɛ ti yɛn na yuun naa 52.1-34
YƐNŊƐLƐ LI YAA JƆLƆGƆ WA ZHUDA TARA TI NA
1
1.1–12.17
Yɛnŋɛlɛ làa Zheremi wi yeri
1 Naŋa ŋa pàa pye na yinri Hilikiya wi pinambyɔ Zheremi wo sɛnrɛ ri nda. Hilikiya wìla pye Anatɔti†1.1: Anatɔti ca kìla pye saraga wɔfɛnnɛ poro ca. Kìla pye wa Zheruzalɛmu ca ki yɔnlɔparawa kamɛŋgɛ kɛɛ yeri; culo kaŋgurugo wìla pye ti sɔgɔwɔ pi ni. ca saraga wɔfɛnnɛ wo wa, ma yiri wa Bɛnzhamɛ cɛnlɛ woolo pe tara ti ni.
2 Yawe Yɛnŋɛlɛ làa li sɛnrɛ ti yo Zheremi wi kan Zhuda tara wunlunaŋa Zhoziyasi wi wunluwɔ pi yɛlɛ kɛ ma yiri taanri wolo li ni. Zhoziyasi wìla pye Amɔ pinambyɔ. 3 Làa para wi ni naa Zhoziyasi wi pinambyɔ Yehoyakimu wi wunluwɔ sanga wi na Zhuda tara ti go na, ma saa gbɔn Zhoziyasi wi pinambyɔ Sedesiyasi wi wunluwɔ pi yɛlɛ kɛ ma yiri nuŋgba wolo li na Zhuda tara ti go na, fɔ ma saa gbɔn ki yɛlɛ li yeŋge kaŋgurugo wogo ki na, sanga ŋa ni pàa Zheruzalɛmu ca woolo pe koli ma kari pe ni kulowo ni we.
4 Kona, a Yawe Yɛnŋɛlɛ lì si para na ni ma yo fɔ:
5 «Sanni mbe sɔɔn gbegele wa ma nɔ wi lara, mìla ma jɛn;
sanni pe sɔɔn se, mìla ma wɔ mɔɔ tɛgɛ ma yɛ na yɛɛ kan,
mɔɔ pye Yɛnŋɛlɛ yɔn sɛnrɛ yofɔ cɛngɛlɛ ke kan.»
6 A mì sili yɔn sogo ma yo fɔ: «E, na Fɔ, Yawe Yɛnŋɛlɛ, mi si sɛnrɛ jɛn, katugu mi yɛn pyɔ jɛɛ.»
7 A Yawe Yɛnŋɛlɛ lì silan pye fɔ:
«Maga ka yo ma yɛn pyɔ jɛɛ;
katugu mi yaa ma tun leele mbele fuun yeri, ma yaa kari pe kɔrɔgɔ,
nda fuun mi yaa yo ma kan, ma sari yo pe kan.
8 Maga ka fyɛ pe yɛgɛ,
katugu mi yaa pye ma ni, mbaa ma shoo.
Yawe Yɛnŋɛlɛ lo lì yo ma.»
9 Ko puŋgo na, a Yawe Yɛnŋɛlɛ lì si li kɛɛ ki sanga ma jiri na yɔn ki na, mɛɛ na pye fɔ:
«Wele, mìlan sɛnrɛ ti le ma yɔn.
10 Wele, mi yɛn nɔɔ teri nala cɛngɛlɛ koro naa wunluwɔ tara pyew ti go na,
jaŋgo ma pe kɔlɔgi ma pe jaanri,
ma pe jɔgɔ ma pe tɔngɔ,
ma pe yerege ma pe sanri.»
Amandi tige konaa nɛgɛdaga
ŋa wi yɛn na kanni kasɔn na
pe kala.
ŋa wi yɛn na kanni kasɔn na
pe kala.
11 Kona, a Yawe Yɛnŋɛlɛ lì si para na ni ma yo fɔ: «Zheremi, yiŋgi ma yɛn na yaan?»
A mì sili yɔn sogo ma yo fɔ: «Na yɛgɛ yɛn amandi tige njege na†1.11-12: Eburuye sɛnrɛ ti ni, amandi tige mɛgɛ yerege kì yiri sɛnpyɔ ŋa wi ma yo mbaa ki kɔrɔsi wi kɔrɔgɔ. Ki kologo ko na, kanga na, ki tige ki ma cɛn ndɛɛ ki yɛn na kɔrɔsiri piin, katugu ko ki ma keli ma fyɛnwɛ..»
12 A Yawe Yɛnŋɛlɛ lì silan pye fɔ: «Màga yan ma wali ki na jate, katugu na jatere wi yɛn na sɛnyoro ti na mberi yɔn fili.»
13 Kona, a Yawe Yɛnŋɛlɛ lì si para na ni ki shyɛn wogo na, mala pye fɔ: «Yiŋgi ma yɛn na yaan?»
A mì sili yɔn sogo ma yo fɔ: «Na yɛgɛ yɛn nɛgɛdaga wa na, ŋa wi yɛn na kanni, ma wa wa yɔnlɔparawa kamɛŋgɛ kɛɛ yeri.»
14 A Yawe Yɛnŋɛlɛ lì silan pye fɔ:
«Pa jɔlɔgɔ ki yaa ka yiri wa yɔnlɔparawa kamɛŋgɛ kɛɛ yeri,
mbe pan mbe to tara woolo pe ni fuun pe na.
15 Katugu mi yaa ka cɛngɛlɛ ke ni fuun ke yeri,
mbe yiri wa yɔnlɔparawa kamɛŋgɛ kɛɛ wunluwɔ tara pyew ti ni.
Yawe Yɛnŋɛlɛ lo lì yo ma.
Ke ni fuun nuŋgba nuŋgba ke yaa ka pan,
mbe ke wunluwɔ jɔnrɔ ti tɛgɛtɛgɛ wa Zheruzalɛmu ca yeyɔnrɔ ti tanla,
mbe ca ki mbogo ki maga,
konaa mbe cɛn Zhuda tara cara ti ni fuun ti tanla mbe to ti na.
16 Mi yaa na kiti wi kɔn mboo jan pe na pe tipere ti ni fuun ti kala na,
katugu pè je na na.
Pe saa na wusuna nuwɔ taan sori yarisunndo ta yɛgɛ kan nari gbogo,
ki yarisunndo nda pe yɛɛra kɛyɛn yìri gbegele, to pe maa fɔli ti yɛgɛ sɔgɔwɔ nari gbogo.
17 «Mboro wo na Zheremi, yiri mɔɔ kurusijara wi pɔ, ma gbɛgɛlɛ;
sɛnrɛ nda fuun mi yaa yo ma kan,
ma yiri ma sari yo pe kan.
Maga kaa fyɛ pe yɛgɛ,
nakoma pa mi jate mi yaa sunndo kɔngɔ wa ma na, maa seri pe yɛgɛ sɔgɔwɔ.
18 Wele, mi wo na, mbege lɛ nala wo na, mì fanŋga kan ma yeri,
paa ca ŋga malaga sigembogo yɛn maga maga ki yɛn,
mɔɔ pye paa tugurɔn tiyala yɛn,
mɔɔ pye paa tuguyɛnrɛ mbogo yɛn,
mbe yiri Zhuda tara ti ni fuun ti kɔrɔgɔ,
mbe yiri ti wunlumbolo naa ti legbɔɔlɔ pe kɔrɔgɔ,
naa ti saraga wɔfɛnnɛ konaa tara woolo pe kɔrɔgɔ.
19 Pe yaa ka malaga gbɔn ma ni,
ɛɛn fɔ pe se ka ya ma ni,
katugu mi yɛn ma ni mbɔɔn shɔ.»
Yawe Yɛnŋɛlɛ lo lì yo ma.
†1:1 1.1: Anatɔti ca kìla pye saraga wɔfɛnnɛ poro ca. Kìla pye wa Zheruzalɛmu ca ki yɔnlɔparawa kamɛŋgɛ kɛɛ yeri; culo kaŋgurugo wìla pye ti sɔgɔwɔ pi ni.
†1:11 1.11-12: Eburuye sɛnrɛ ti ni, amandi tige mɛgɛ yerege kì yiri sɛnpyɔ ŋa wi ma yo mbaa ki kɔrɔsi wi kɔrɔgɔ. Ki kologo ko na, kanga na, ki tige ki ma cɛn ndɛɛ ki yɛn na kɔrɔsiri piin, katugu ko ki ma keli ma fyɛnwɛ.