22
Yɛnŋɛlɛ làa Zheremi wi tun
wa Zhuda tara wunlunaŋa
wi go woolo pe yeri
1 Yawe Yɛnŋɛlɛ làa para Zheremi wi ni ma yo fɔ: «Kari wa Zhuda tara wunlunaŋa wi go, ma saga sɛnrɛ nda ti yo wi kan. 2 Maa pye fɔ: ‹Yawe Yɛnŋɛlɛ li yɛn na sɛnrɛ nda yuun ti logo, mboro Zhuda tara wunlunaŋa, mboro ŋa mà cɛn wa Davidi wunluwɔ jɔngɔ ki na wi yɔnlɔ, mboro naa ma legbɔɔlɔ pe ni, konaa ma woolo sanmbala pe ni, poro mbele pe maa yiin laga ki yeyɔnrɔ nda ti ni we.› 3 Pa Yawe Yɛnŋɛlɛ lì yo yɛɛn fɔ: ‹Yaa tanri kaselege naa kasinŋge na. Pe yɛn na mbele jɔlɔ, ye pe shɔ pe jɔlɔfɛnnɛ pe kɛɛ. Yaga kaa nambannjɛɛn wo naa pijiriwe konaa naŋgunjɔ wi ni pe jɔlɔ. Yaga kaa lewɛlɛwɛ kapyere piin pe na. Yaga ka lere ŋa wi yɛn jɛrɛgisaga fu wa gbo laga ki laga ŋga ki ni. 4 Katugu kaselege ko na, na ye kaa tanri ki sɛnrɛ nda ti na, pa kona wunlumbolo yaa la taa mbaa cɛɛn wa Davidi wunluwɔ jɔngɔ ki na wi yɔnlɔ; pe yaa ka lugu wa wotoroye mbele shɔnye maa tilele pe ni konaa pe shɔnye pe na mbaa yiin laga ki go ŋga ki yeyɔnrɔ ti ni, poro naa pe legbɔɔlɔ konaa pe tara woolo pe ni. 5 Ɛɛn fɔ, na yee na sɛnrɛ ti logo, mì wugu na yɛɛra mɛgɛ ki na, Yawe Yɛnŋɛlɛ lo lì yo ma, fɔ ki laga ŋga ki yaa ka pye kataga.› »
6 Katugu pa Yawe Yɛnŋɛlɛ lì yo yɛɛn Zhuda tara wunlunaŋa wi wunluwɔ go ki wogo na fɔ:
«Ma yɛn ma yɔn na yɛgɛ na, paa Galaadi tara ti yɛn,
paa Liban tara yanwira ti go na wi yɛn;
konaa ki ni fuun, mi yaa kɔɔn pye paa gbinri yɛn,
mbɔɔn pye paa ca yɛn, ŋga lere woro wa ki ni.
7 Mi yɛn na jɔgɔwɔ pyefɛnnɛ gbɛgɛlɛ ma mɛgɛ ni,
pe ni fuun nuŋgba nuŋgba pe maliŋgbɔnyaara ti yɛn pe kɛɛ.
Pe yaa kɔɔn wunluwɔ go ki sɛdiri tire tiyɔnrɔ ti kɔɔnlɔ mberi wa wa kasɔn.
8 «Cɛngɛlɛ lɛgɛrɛ woolo yaa kaa tooro laga ki ca ŋga ki yɔn na; pe yaa kaa pe yɛɛ yewe mbaa yuun fɔ: ‹Yiŋgi na, a Yawe Yɛnŋɛlɛ lì sigi cagbɔgɔ ŋga ki tɛgɛ ki tɛgɛlɔmɔ mba pi na ma?› 9 Pa kona pe yaa pe yɔn sogo mbe yo fɔ: ‹Katugu pè je Yawe Yɛnŋɛlɛ, pe Yɛnŋɛlɛ li yɔn finliwɛ pi na, ma saa na fɔli yarisunndo ta yɛgɛ sɔgɔwɔ nari gbogo.› »
Sɛnrɛ nda tìla yo wunlunaŋa
Shalumu wi wogo na
10 Yaga kaa gbele ŋa wì ku wo kala na,
yaga kaa wi kunwɔ pi gbele.
Ɛɛn fɔ ŋa pè yigi ma kari wi ni, yaa gbele wo kala na,
katugu wi se sɔngɔrɔ naa,
pòo se tara nda ni, wi seri yan yɛnlɛ ni naa.
11 Ki sɛnrɛ nda to Yawe Yɛnŋɛlɛ lì yo Zhuda tara wunlunaŋa Zhoziyasi wi pinambyɔ Shalumu wi wogo na, wo ŋa wìla cɛn wunluwɔ pi na wi to Zhoziyasi wi yɔnlɔ. A pè si kaa wi yigi ma kari wi ni, ma yiri laga ki tara nda ti ni; lìgi yo ma yo wi se sɔngɔrɔ laga naa fyew. 12 Pòo yigi ma kari wi ni tara nda ni, pa wi yaa ku wa ti ni, wi sege tara nda ti yan naa.
Sɛnrɛ nda tìla yo wunlunaŋa
Yehoyakimu wi wogo na
13 Lere ŋa wi maa go ki kan kambasinŋge ki fanŋga na,
mboo sanŋgazo yumbiile pe wa, wila sila tanri kaselege na,
wi lewee yɛnlɛ wi maa tunŋgo piin wi kan, wila suu sara,
daŋga yɛn ki fɔ wi wogo!
14 Wo ŋa wi maa yɛɛ pye fɔ: «Mi yaa yuŋgbɔgɔ ka kan na yɛɛ kan,
mbe ki naayeri yumbiile pe tugbɔlɔ,
mbe ki fenɛtiriye pe wɔ mbe pe yɔn,
mbe sɛdiri tire papara papara maramara ki nawa mbogo ki na mbege tɔn,
mbege fa penduru yɛɛn ni!
15 Naga yɛn ma, maa ki jate ndɛɛ na maga ma wunluwɔ go ki kan sɛdiri tire lɛgɛrɛ ni
ko ki yaa yeresaga kan ma wunluwɔ pi yeri wi le?
Naga yɛn ma, ma to wi sila pye na nii na woo paa leele sanmbala pe yɛn wi le?
Konaa ki ni fuun, wìla pye na tanri kaselege naa kasinŋge konɔ li na;
ki kala na, wi kagala kàa pye na yɔngɔ wi kan.
16 Wìla pye na fyɔnwɔ fɛnnɛ poro naa mbele pe yɛn tege na pe kiti wi kɔɔn naa yɔngɔ,
ki kala na, wi kagala kaa pye na yɔngɔ wi kan.
Ko kapyege ŋga ko ki maa ki nari ma yo ki lerefɔ wì mi ŋa Yɛnŋɛlɛ na jɛn.
Yawe Yɛnŋɛlɛ lo lì yo ma.»
 
17 Ɛɛn fɔ mboro wo na, ma yɛgɛ woro yaraga ka kpɛ na, ma woro na yaraga ka kpɛ jate,
kaawɔ ma yɛɛra tɔnli wo cɛ,
konaa mbaa baga leele mbele pe yɛn jɛrɛgisaga fu pe na mbaa pe kuun,
mbaa leele pe jɔlɔ mbe pe yigilɔmɔ pi tisaw.
18 Ki kala na, Zhoziyasi pinambyɔ Yehoyakimu ŋa wi yɛn Zhuda tara ti wunlunaŋa, pa Yawe Yɛnŋɛlɛ lì yo yɛɛn wi wogo na fɔ:
«Lere se ka wi kunwɔ pi gbele paa yɛgɛ ŋga na ki maa piin, mbe yo fɔ:
‹E, na nɔsepyɔ lenaŋa!› Nakoma ‹E, na nɔsepyɔ sumboro!›
Lere se ka wi kunwɔ pi gbele paa yɛgɛ ŋga na ki maa piin, mbe yo fɔ:
‹E, we tafɔ!› Nakoma ‹E, we wunluwɔ!›
19 Pe yaa kaa gboo wi le paa yɛgɛ ŋga na pe ma kaa sofile gboo le we;
pe yaa kaa fulolo mbe saa wa wa Zheruzalɛmu ca ki puŋgo na.»
Jɔlɔgɔ yaa to Zheruzalɛmu ca ki na
20 Lugu wa Liban tara yanwiga ki na ma jɔrɔgɔ!
Lugu wa Bazan tara yanwiga ki go na mɔɔ magala li yirige ŋgbanga!
Lugu wa Abarimu yanwira ti go na ma jɔrɔgɔ!
Katugu ma ndanlafɛnnɛ pè tɔngɔ ma wɔ wa.
21 Sanga ŋa ni màa pye kaŋgbanga se gbɔn ma na, mìla ma yɛri;
ɛɛn fɔ màa pye na yuun fɔ: «Mi se logo!»
Pa ma yɛn na tanri ma, maga lɛ wa ma punwɛ sanga wi ni;
mɛɛ logo na yeri.
22 Tifɛlɛgɛ yaa ka kari ma simbaala kɔnrifɛnnɛ pe ni fuun pe ni,
pe yaa kɔɔn ndanlafɛnnɛ pe koli mbe kari pe ni tara ta yɛgɛ ni;
ko sanga wo ni, fɛrɛ ti yaa ma yigi fɔ mbɔɔn go ki sogo ma na,
ma kapere ti ni fuun ti kala na.
23 Mboro ŋa ma yɛn ma cɛn wa Liban tara†22.23: Ŋga kì yo fɔ Liban tara, wunluwɔ go ŋga kìla pye wa Zheruzalɛmu ca, a paa ki yinri Liban kɔlɔgɔ go ko sɛnrɛ ti yɛn na yuun laga ki laga ŋga ki na; 1 Wunlu 7.2.,
mɔɔ cɛnsaga ki gbegele sɛdiri tire tiyɔnrɔ ti ni we.
Na jɔlɔgɔ ka ka gbɔn ma na sanga ŋa ni,
jɔlɔgɔ ŋga ki yɛn paa yɛgɛ ŋga na jɛlɛ selara ma kaa yiri wi ni,
ma yaa kaa jɛɛn fɔ jɛŋgɛ.
Yɛnŋɛlɛ li yaa jɔlɔgɔ wa
Yehoyakimu pinambyɔ Koniya wi na
24 Yawe Yɛnŋɛlɛ lì yo fɔ: «Mì wugu mi ŋa Yɛnŋɛlɛ na yinwege wolo na yɛɛ mɛgɛ ki na, fɔ ali ndɛɛ ki pye Yehoyakimu pinambyɔ Koniya†22.24: Koniya wo nuŋgba wo wìla pye Yekoniya we. Ki mɛgɛ ŋga kìla pye wunlunaŋa Yehoyakini wi mɛgɛ ko ka. Wi wunluwɔ pi yɛlɛ tijɛrɛ wolo li ni, ko pàa Zhuda tara woolo pe koli ma kari pe ni wa Babilɔni tara; 2 Wunlu 24.8-16; 2 Kuro 36.8-10. ŋa wi yɛn Zhuda tara ti wunlunaŋa wi ja pye paa vegeŋɛ yɛn wa na kalige kɛɛ ki na, mi jɛn naa tile mboo wɔ wa. 25 Mi yaa ma le mbele pe yɛn nɔɔ gbosaga jaa pe kɛɛ, poro mbele ma yɛn na fyɛ pe yɛgɛ we, Babilɔni tara wunlunaŋa Nebukanezari wo naa Kalide tara fɛnnɛ wele. 26 Mi yaa ka mboro naa ma nɔsee wi ni ye purɔ mbe kari ye ni tara ta yɛgɛ ni, nda pe sila ye se wa ti ni. Pa ye yaa ka sa ku wa ma. 27 Ye tara ti la yaa ka ye ta fɔ yaa ki jaa mbe sɔngɔrɔ wa ti ni, ɛɛn fɔ ye se ka sɔngɔrɔ wa ti ni naa fyew.» 28 Leele pe yaa kaa yuun fɔ: «Naga yɛn ma, Koniya wi yɛn paa cɔgɔ ŋga kì ya ka yɛn, ŋga lere woro naga jate wi le? Wi yɛn paa leyaraga yɛn, ŋga lere woro ki kɔrɔgɔ naa wi le? Yiŋgi na, a pe si wo naa wi piile pe purɔ ma saa pe wa tara ta yɛgɛ ni, nda pee jɛn?»
29 E, na tara, na tara, na tara, Yawe Yɛnŋɛlɛ li sɛnrɛ ti logo! 30 Pa Yawe Yɛnŋɛlɛ lì yo yɛɛn fɔ: «Ye ki naŋa ŋa wi mɛgɛ ki yɔnlɔgɔ ndɛɛ lere ŋa pyɔ woro wi yeri, ndɛɛ lere ŋa wi wogo kì jɔgɔ wi yinwege piliye yi ni; katugu wi setirige pyɔ wa se ka ta mbe cɛn wi yɔnlɔ, wa Davidi wunluwɔ jɔngɔ ki na, mbe cɛn Zhuda tara ti go na.»

†22:23 22.23: Ŋga kì yo fɔ Liban tara, wunluwɔ go ŋga kìla pye wa Zheruzalɛmu ca, a paa ki yinri Liban kɔlɔgɔ go ko sɛnrɛ ti yɛn na yuun laga ki laga ŋga ki na; 1 Wunlu 7.2.

†22:24 22.24: Koniya wo nuŋgba wo wìla pye Yekoniya we. Ki mɛgɛ ŋga kìla pye wunlunaŋa Yehoyakini wi mɛgɛ ko ka. Wi wunluwɔ pi yɛlɛ tijɛrɛ wolo li ni, ko pàa Zhuda tara woolo pe koli ma kari pe ni wa Babilɔni tara; 2 Wunlu 24.8-16; 2 Kuro 36.8-10.

© 2014 WBT