47
Yɛnŋɛlɛ yɔn sɛnrɛ nda tìla yo
Filisiti tara ti wogo na
Filisiti tara ti wogo na
1 Sɛnrɛ nda Yawe Yɛnŋɛlɛ làa yo Yɛnŋɛlɛ yɔn sɛnrɛ yofɔ Zheremi wi kan Filisiti tara fɛnnɛ pe wogo na, sanni Farawɔn wi sa pan wi to Gaza ca ki na ti nda.
2 Yawe Yɛnŋɛlɛ pa lì yo yɛɛn fɔ:
«Wele, tɔnŋgbɔɔ pa yɛn na yinrigi wa yɔnlɔparawa kamɛŋgɛ kɛɛ ki yeri na paan,
pi kanŋga ma pye paa lafogo yɛn, ŋga kì yin ma jaraga na fuun.
Pì pan na tara ti nii konaa ti nawa yaara ti ni,
na cara to naa ti woolo pe ni fuun pe nii.
Leele pe yɛn na jɔrɔgi,
tara woolo pe ni fuun pe yɛn na yuŋgbɔgɔrɔ gbeere gbele.
3 Shɔnye fanŋga fɛnnɛ, naa paa gbinri, pe yenjoro tinmɛ pi kala na,
naa malaga gbɔnwotoroye tinmɛ pi kala na,
naa malaga gbɔnwotoroye ŋgeere tinmɛ pi kala na,
teele pe yɛrɛ woro na kanŋgi na pe piile pe wele naa,
katugu pe wire ti fanŋga kì kɔ pe ni.
4 Filisiti tara ti tɔngɔpilige kì gbɔn,
mbele fuun pàa koro go na mbe ya mbaa Tiri naa Sidɔn cara ti sari,
pe yaa ka pe ni fuun pe gbo;
katugu Yawe Yɛnŋɛlɛ li yaa ka Filisiti tara ti jɔgɔ,
poro mbele pe yɛn Kafitɔri lɔgɔ fugo tara fɛnnɛ sanmbala wele.
5 Gaza ca woolo pè pye yumbɛrɛ fɛnnɛ jatere piriwɛn pi na,
Asikalɔn ca fɛnnɛ pè pyeri dinw.
Yoro sanmbala mbele yè koro wa funwa laga falafala ki ni,
ye yaa koro mbaa njelewe gbɔɔn ye yɛɛ na†47.5: Ki laga ŋga ki kɔrɔ wowi ŋa fɔ leele pàa pe yinrɛ ti kulu, ma njelewe gbɔn pe yɛɛ na ma yala pe kalɛgɛ ko ni, mbege naga fɔ kapege gbɔgɔ pe ta. sa gbɔn fɔ wagati wiwiin?
6 «Ye yɛn na yuun fɔ: ‹E, Yawe Yɛnŋɛlɛ tokobi,
ma yaa ma legbogo ki yerege mbe cɛn mbe wogo sanga wiwiin ni san?
Ye wa ma wofogo ki ni ma,
yere yɛw ma koro yɛyinŋge na!›
7 «Ɛɛn fɔ tokobi wi yaa wogo mɛlɛ san?
Yawe Yɛnŋɛlɛ lo lì konɔ kan wi yeri,
ma yo wi kari Asikalɔn ca naa kɔgɔje yɔn tara ti mɛgɛ ni.
Pa lùu tun wa ki lara ti ni.»
†47:5 47.5: Ki laga ŋga ki kɔrɔ wowi ŋa fɔ leele pàa pe yinrɛ ti kulu, ma njelewe gbɔn pe yɛɛ na ma yala pe kalɛgɛ ko ni, mbege naga fɔ kapege gbɔgɔ pe ta.