ZHƆBU WI SƐNYORO
PUŊGO WORO
PUŊGO WORO
27
27–31
Zhɔbu wi yɔn sogomɔ sanmba:
Wì yo wi yɛn jɛrɛgisaga fu
Wì yo wi yɛn jɛrɛgisaga fu
1 Kona, a Zhɔbu wì si ka taga wi lelɛɛlɛ sɛnyogo ki na, ma yo fɔ:
2 Yɛnŋɛlɛ na yinwege wolo, mì wugu li mɛgɛ ki na, lo na lì je mbanla tanga ki yo,
lo na yawa pi ni fuun fɔ ŋa wìlan nawa pi tanga na na,
3 mbanla ta yinwege na sanga ŋa fuun ni,
mbege ta Yɛnŋɛlɛ li wɔnwɔn tifɛlɛgɛ ki yɛn na yinrigi wa na numawegele ke ni sanga ŋa fuun ni,
4 mi se sɛnrɛ mbasinnde yo,
mi se si java sɛnrɛ yo wa na yɔn.
5 Mi kɔnli se tanga kan ye yeri fyew!
Fɔ sa gbɔn na kunwɔ pi na, mi yɛn jɛrɛgisaga fu, mi se je ki na.
6 Mì taga ki na ma yo mi yɛn sinŋɛ, mi se ki wogo ki yaga;
na nawa pii na jɛrɛgi kala la kpɛ na, na yinwege ki ni.
7 Ŋga ki ma pye lepee wi na, ko mbe pye na jugu wi na,
lere ŋa wi woro ma sin, ŋga ki ma pye wi na, ko mbe pye na winfɔ wi na.
8 Jigi tasaga kikiin ki yaa koro ŋa wi woro na fyɛ Yɛnŋɛlɛ yɛgɛ wi kan naa,
na wi yinwege ki ka ka kɔ,
a Yɛnŋɛlɛ lùu ni wi wɔ we?
9 Naga yɛn ma, na jɔlɔgɔ ki ka gbɔn wi na sanga ŋa ni,
Yɛnŋɛlɛ li maa wi gbelege ki nuru wi le?
10 Naga yɛn ma, wi mbe yɔgɔrimɔ ta yawa pi ni fuun fɔ wi yeri naa wi le?
Naga yɛn ma, wi mbe koro mbaa Yɛnŋɛlɛ li yɛnri sanga wi ni fuun wi le?
11 Koni, mi yaa ye naga Yɛnŋɛlɛ li yawa kapyegele ke ni,
mi se yawa pi ni fuun fɔ wi nawa kagala ke lara ye na.
12 Ye ni fuun yège yan yɛnlɛ ni;
naga yɛn ma, yiŋgi ki yɛn na ye nii ki jatere fu sɛnrɛ nda ti yowo pi ni?
13 Wele, tasaga ŋga lì tɛgɛ lepee wi kan koyi yɛɛn;
kɔrɔgɔ ŋga yawa pi ni fuun fɔ wila kaan lepee wɛlɛwɛ wi yeri koyi we†27.13: Mbege lɛ konɔ 13 sa gbɔn 23, sɛnrɛ nda tì yo le ki laga ki ni, tì yiri Zhɔbu wi wɛnnɛ pe sɛnyoro ti kɔrɔgɔ. Ki kala na, pele yɛn naga jate ndɛɛ Zofari wi yɛrɛwɛ sɛnrɛ taanri woro tori..
14 Na wi ka piile lɛgɛrɛ ta, tokobi wi yaa pe gbo,
wi setirige piile pe se kaa yaakara taa mbaa tinni.
15 Mbele ka shɔ mbe koro go na, tifɛlɛgɛ yama yaa ka poro gbo,
pe naŋgunjaala pe se ka ya mbe pe kunwɔ pi gbele.
16 Ali na paga warifuwe lɛgɛrɛ gbogolo pe yɛɛ kan paa taambugɔ yɛn,
ali na paga yaripɔrɔ lɛgɛrɛ gbogolo ti yɛɛ na paa joro yɛn,
17 ye pe yaga paa ti gbogolo, ɛɛn fɔ lesinŋɛ wa wi yaa kaa ti nii;
ki warifuwe wi yaa ka pye lere ŋa wi yɛn jɛrɛgisaga fu wo wa woo.
18 Lepee wi ma go ŋga kan, ki ma tifaga paa fyɛngɛ forogo yɛn;
ki maa yɛgɛ paa kɛrɛ welefɛnnɛ gbata yɛn.
19 Wi ma sinlɛ na wɔnlɔ paa penjagbɔrɔ fɔ yɛn, ɛɛn fɔ ki mɛɛ pye ko ki yɛn wi kɔsaga ye;
na wi ka ka yɛngɛlɛ ke yɛngɛ, yaraga kpɛ na koro wi kɛɛ naa.
20 Fyɛrɛ gbɔrɔ ma fo maa yigi paa yɛgɛ ŋga na tɔnŋgbɔɔ ma kaa fo ma yaraga lɛ;
tifɛlinjolo maa lɛ ma kari wi ni yembinɛ.
21 Yɔnlɔ yirisaga tifɛlɛgɛ wɛrɛgɛ ki maa lɛ ma kari wi ni lege,
ki maa lɛ fanŋga na maa wɔ wa wi cɛnsaga ki ni.
22 Yɛnŋɛlɛ li maa wɔn wangala ke ni, laa wi yinriwɛ ta,
wo wi ma bala ma fe, jaŋgo mboo yɛɛ shɔ ke kɛɛ.
23 Pe maa kɛndagala gbɔɔn wi tolo li kala na,
wìla pye ma cɛn laga ŋga na, pe maa ki wele na kawa, fɔ na wofegele wiin.
†27:13 27.13: Mbege lɛ konɔ 13 sa gbɔn 23, sɛnrɛ nda tì yo le ki laga ki ni, tì yiri Zhɔbu wi wɛnnɛ pe sɛnyoro ti kɔrɔgɔ. Ki kala na, pele yɛn naga jate ndɛɛ Zofari wi yɛrɛwɛ sɛnrɛ taanri woro tori.