YƐNŊƐLƐ LAA ZHƆBU
WI YƆN SOGO
WI YƆN SOGO
38
38.1–42.6
Yɛnŋɛlɛ làa naayeri wo naa tara
ti dakala li yɛgɛ yo Zhɔbu
wi kan
ti dakala li yɛgɛ yo Zhɔbu
wi kan
1 Kona, a Yawe Yɛnŋɛlɛ lì si yɔn sogomɔ kan Zhɔbu wi yeri, mali ta wa tisaga tifɛlɛgɛ ki nandogomɔ, ma yo fɔ:
2 Ambɔ wi mboro, mboro ŋa maa na kagala ŋgele mì kɔn mbe pye ke tɔnni
ma kambajɛnmɛ sɛnrɛ ti ni we?
3 Ma kurusijara wi pɔ wa ma sɛnnɛ paa lenaŋa kotogofɔ yɛn;
mi yaa ma yewe, mala naga.
4 Sanga ŋa ni mìla pye na tara ti nɔgɔ nii, maa pye se yeri?
Ki yo na kan na kaa pye tijinliwɛ yɛn ma ni.
5 Ambɔ wila tara ti gbemɛ naa ti titɔnlɔwɔ pi kɔn maa tɛgɛ, maa jɛn le?
Ambɔ wila mana li sanga mari taanla?
6 Tara ti nɔgɔ ki yɛn ma teŋge yiŋgi na?
Ambɔ wila ti yɛnlɛ sinndɛlɛgɛ koŋgbanŋga ki tɛgɛ;
7 sanga ŋa lalaaga wɔnŋgɔlɔ kaa pinlɛ na yɔgɔrimɔ yuuro koo,
a Yɛnŋɛlɛ li mɛrɛgɛye paa yɔgɔri na jɔrɔgi we?
8 Sanga ŋa ni kɔgɔje wìla janri ma yiri ndɛɛ pòo se,
ambɔ wila saa kɔɔrɔ le wi na, maa yɔn tɔn maa yerege?
9 Sanga ŋa ni mìla kambaara ti pye wi yaripɔrɔ maa tɔn,
ma diwi gbɔlɔ lo pye wi paara maa maga we?
10 Sanga ŋa ni mìla ŋgasegele tɛgɛ wi na,
ma kɔɔrɔ le wi na maa yɔn tɔn, ma sɔgɔyaara le wi na we?
11 A mì suu pye ma yo fɔ:
«Ma yaa pan mbe gbɔn fɔ namɛna, ɛɛn fɔ mɛɛ daga mbe ko laga ŋga ko kaanla,
katugu ma tɔnŋgbɔɔ mba pi maa kɔɔn na tuun, pa pi yɛɛ gbɔgɔwɔ pi yaa yere namɛna!»
12 Maga lɛ ma yɛn yinwege na, maa ki yo lalaaga ki kan ma yo ki laga le?
Maa lalaaga ki lagasanga wi naga ki na le,
13 jaŋgo ki yanwa pi tara ti lagapyew ki laga,
mbe lepeele pe purɔ le?
14 Ko wagati wo ni, tara ti yɛgɛ cɛnwɛ pi ma kanŋga paa joro yɛn, nda pè mɛgɛ tɛgɛrɛ tɛgɛyaraga taga ti na,
ti ma pye ndɛɛ tiri yɛɛ fere yaripɔrɔ ni.
15 Ɛɛn fɔ lepeele pe yanwa pi ma shɔ pe yeri;
kɛɛ ŋga pàa yirige mbe gbɔnrɔ pye, ki ma kaari.
16 Naga yɛn ma, ma ye ma gbɔn wa kɔgɔje wi tɔnmɔ pi yirisaga ki na le?
Ma ye maa latijuro ti yanri mari yan le?
17 Pe kunwɔ pi yeyɔngɔ kɔɔrɔ ti yɛngɛlɛ mari naga ma na le?
Naga yɛn ma, ma kunwɔ pi diwi yeyɔngɔ ki yan le?
18 Naga yɛn ma, ma tara ti gbemɛ pi yan maa jɛn ma kɔ le?
Na kaa pye ma ki kagala ke ni fuun ke jɛn, ki yo!
19 Yanwa pi ca konɔ li yɛn se yeri?
Diwi wi cɛnsaga ki yɛn se yeri?
20 Ma mbe ya yanri mberi wele fɔ wa ti cɛnsaga,
na kaa pye pe ma gbɔn wa ti na yɛgɛ ŋga na maga jɛn we?
21 Màga jɛn jate, katugu kìla yala pɔ̀ɔn se makɔ,
ma yɛgɛlɛ yɔn kì lɛgɛ fɔ jɛŋgɛ!
22 Maa gbɔn wa nɛzhi wi tɛgɛsaga ki na wi le?
Maa sinndɛɛrɛ tisaga ki tɛgɛsaga ki yan wi le?
23 Mì ki yaara ti tɛgɛ wa pilipeye yo kala na,
malaga gbɔnpilige naa malaga ko kala na.
24 Yanwa pi ma toro konɔ liliin ni mbe si gbɔn lagapyew ki ni?
Yɔnlɔ yirisaga tifɛlɛgɛ ki ma yiri se yeri mɛɛ tara ti tɔn?
25 Ambɔ wi ma konɔ yɛngɛ tisaga ki kan?
Ambɔ wi ma konɔ wɔ yɛnŋɛlɛ yɛngɛlɛmɛ naa yɛnŋɛlɛ gbaanra ti kan?
26 Tara nda lere woro ma cɛn wa ti ni, ambɔ wi ma ti tisaga ki ma to wa ti ni,
mbe ti ki ma to wa gbinri ŋa lere woro wa wi ni,
27 jaŋgo mbe tara nda tì waga ma jɔgɔ ti kan tɔnmɔ ni,
mbe ti yan mbe fi wa ki yiri?
28 Naga yɛn ma, to yɛn tisaga ki yeri le?
Ambɔ wi fɔɔngɔ ŋga ki maa wuun ki sɔɔlɔsaga nuŋgba nuŋgba pyew ki da?
29 Tɔnmɔ mba pi ma simbi pi ma yiri se yeri?
Ambɔ wi tisaga yaanŋgumbire ti da?
30 Ko sanga wo ni, tɔnmɔ pi ma simbi ma sheli paa sinndɛlɛgɛ yɛn,
pi gona wi ma pinlɛ ma sheli ma pye nuŋgba.
31 Wɔnŋgɔlɔ ke wele, mboro mbe ya mbe Ŋgonɔ gbɔgɔ pire ti pɔ ti yɛɛ na,
nakoma mbe wɔnndaanla pe sangala mbe pe lagala pe yɛɛ na?
32 Ma mbe ya ti yɔnlɔparawa kalige kɛɛ wɔnŋgɔlɔ kaa yinrigi ke yirisanga wi ni le?
Ma mbe ya mbe konɔ wɔ yɔnlɔparawa kamɛŋgɛ kɛɛ wɔnŋgɔlɔ naa ke wɔnmbigile ke kan le?
33 Naga yɛn ma, ma naayeri kondɛgɛŋgɛlɛ ke jɛn wi le,
ke maa ŋga piin laga tara ti ni mboro ma maa ki yɛgɛ nari ke na wi le?
34 Naga yɛn ma, mboro mbe ya para ŋgbanga kambaara ti ni,
mbe ti ti pan tisagbɔgɔ ni ma na wi le?
35 Mboro ma ma ti yɛnŋɛlɛ yɛngɛlɛmɛ pi maa yinrigi na kee wa pi karisaga wi le?
Naga yɛn ma, na maga pi yeri pi mɔɔ pye mbe yo fɔ: «Mi ŋa» wi le?
36 Ambɔ wila kajɛnmɛ pi le wa sɛnwee wi kotogo na,
ambɔ wila kagala kɔrɔ jɛnmɛ pi le wa wi tijinliwɛ pi ni†38.36: Ki vɛrise ŋa, Yɛnŋɛlɛ sɛnrɛ sɛwɛɛlɛ pele ni, ki yɛn ma yɔnlɔgɔ ma yo fɔ: Ambɔ wi kajɛnmɛ pi kan tɔnmɔ sannjɛgɛ ki yeri, konaa ma tijinliwɛ pi kan ŋgopɔlɔ wi yeri, a wi sigi jɛn ma yo gbaan wi yaa yin??
37 Ambɔ wi mbe ya wi kajɛnmɛ pi ni mbe kambaara ti jiri?
Ambɔ mbe ya mbe naayeri tɔnmɔ kugboro ti go sogo mbe ti tisara ti pan,
38 mbe taambugɔ ki yinŋgi mbege pye fɛnrɛgɛ,
mbe tara ti kanimboro ti mara ti yɛɛ na?
39 Mboro ma ma kara lagaja mberi kan jara nɔ wi yeri wi le?
Mboro ma ma yaakara kan jara piile pe yeri mbe pe fuŋgo ki kɔ wi le,
40 sanga ŋa ni ti ma pye ma sinlɛ wa ti were ti ni,
nakoma sanga ŋa ni ti ma pye ma lara wa kɔlɔgɔ ki ni na kara singi mbe to ti na we?
41 Na kaankaan pire ti kaa gbele mbaa Yɛnŋɛlɛ li yinri liri saga sanga ŋa ni,
mbaa yanri la toro yaakara lama pi kala na,
ambɔ wi ma ti yaakara ti kan ti yeri?
†38:36 38.36: Ki vɛrise ŋa, Yɛnŋɛlɛ sɛnrɛ sɛwɛɛlɛ pele ni, ki yɛn ma yɔnlɔgɔ ma yo fɔ: Ambɔ wi kajɛnmɛ pi kan tɔnmɔ sannjɛgɛ ki yeri, konaa ma tijinliwɛ pi kan ŋgopɔlɔ wi yeri, a wi sigi jɛn ma yo gbaan wi yaa yin?