YUŊGBƆGƆRƆ SƐNRƐ
sɛwɛ
Sɛwɛ wi nawa sɛnrɛ
Zheremi yuŋgbɔgɔrɔ sɛnrɛ sɛwɛ wi yɛn sɛwɛ wa, ŋa yuuro tɛgɛsaga kaŋgurugo yɛn wa wi ni. Ki yuuro ti yɛn na para Zheruzalɛmu ca ki tɔngɔwɔ po sɛnrɛ na, mba pi yɛn jatere piriwɛn ni. Ki yuuro tì kɔ ma yala Eburuye pe kunwɔ yuuro kɔlɔmɔ po ni. Sɛwɛ wi go nuŋgba nuŋgba pyew fɔ sa gbɔn wa ki go ki kɔsaga ki na, ki vɛrise nuŋgba nuŋgba pyew wì lɛ Eburuye sɛnrɛ ti sɛnpiile mbele pe ma tɛgɛ nari yɔnlɔgi wo wa ni, maga lɛ ti sɛnpyɔ koŋgbanŋa wi na, wo ŋa pe yinri alɛfu fɔ ma saa gbɔn wi puŋgo woo wi na, wo ŋa pe yinri tavu.
Yurukɔɔ wi yɛn na wi nandangawa pi wogo ki yɛgɛ nari kacɛn kagala lɛgɛrɛ ni, ŋgele ke yɛn fanŋga ni. Konaa ki ni fuun, wùu jigi wi taga Yɛnŋɛlɛ li na, wi jigi wi yɛn li na sanga pyew. Wì yo fɔ:
«Yawe Yɛnŋɛlɛ li kagbaraga kii kɔ,
li yinriwɛ tawa pi fa gbɔn wa pi kɔsaga ki na.
Li kagbaraga konaa li yinriwɛ tawa pi ni ti maa kanŋgi fɔnndɔ pilige nuŋgba nuŋgba pyew;
li yɛn sɛnrɛ nuŋgba yofɔ yɛgɛ ŋga na ki yɛn ma gbɔgɔ» (Yuŋgbɔ 3.22-23).
Zhufuye cɛnlɛ woolo pe maa yɛfiile shɛrɛgɛ ŋga shɛri na nawa tuun shɛrigo gbɔgɔ ki tɔngɔwɔ wogo ki na, na ki ka gbɔn, pe maa ki yuuro ti koo. Shɛrigo gbɔgɔ kìla tɔngɔ ki yɛlɛ cɛnmɛ kaŋgurugo naa nafa tijɛrɛ ma yiri kɔgɔlɔni (586) Zhezu Kirisi wi sege ki yɛgɛ.
Sɛwɛ wi yɛn ma kɔɔnlɔ yɛgɛ ŋga na
Kunwɔ yurugo koŋgbanŋga: Yɛnŋɛlɛ lì je Zheruzalɛmu ca ki na 1
Kunwɔ yurugo shyɛn wogo: Yawe Yɛnŋɛlɛ làa pye paa jugu yɛn 2
Kunwɔ yurugo taanri wogo: Jigi tasaga yɛn wa bere 3
Kunwɔ yurugo tijɛrɛ wogo: Zheruzalɛmu ca kì tɔngɔ pew 4
Kunwɔ yurugo kaŋgurugo wogo: Leele pe yɛn na Yawe Yɛnŋɛlɛ li yinmɛ pi lagajaa 5
1
Zheruzalɛmu ca ki yɛn
paa naŋgunjɔ yɛn,
ŋa pè je wi na
paa naŋgunjɔ yɛn,
ŋa pè je wi na
1 E, kì pye mɛlɛ! Zheruzalɛmu ca kì koro waga,
ki cagbɔgɔ ŋga kìla pye ma yin lelɛgɛrɛ ni faa we!
Kì kanŋga ma pye paa naŋgunjɔ yɛn,
ko ŋga ki mɛgɛ kìla yiri wa cɛngɛlɛ ke sɔgɔwɔ faa we!
Ki ca ŋga kìla pye paa wunluwɔ sumborombyɔ yɛn, ma cɛn kindaye pe go na,
koni kì kanŋga na kulowo tunndo piin!
2 Ca ki yɛn na gbele yembinɛ li ni fuun li ni,
ki yɛntunwɔ pi yɛn na tinri na fuun wa ki mbateere ti na.
Kìla pye ma mbele fuun ndanla,
wa kpɛ si ta wa pe ni mbege kotogo ki sogo ki na.
Ki wɛnnɛ pe ni fuun pège java,
pè kanŋga ma pye ki juguye.
3 Pè Zhuda tara woolo pe koli ma kari pe ni;
pe go kì sogo pe na, a paa kulowo tunndo ŋgbanra piin.
Pe yɛn ma cɛn wa cɛngɛlɛ sanŋgala ke sɔgɔwɔ,
ɛɛn fɔ pe woro na wogosaga taa.
Pe purɔfɛnnɛ pè pe purɔ ma saa pe yigi,
ma pe jori jɛŋgɛ fɔ yirisaga si ta pe na.
4 Siyɔn ca koŋgolo kè pye kunwɔ gbelesara,
katugu lere kpɛ woro na paan mbaa shɛrɛgɛ fɛtiye pe piin wa.
Ca ki mbogo yeyɔnrɔ ti ni fuun tì jɔgɔ,
ki saraga wɔfɛnnɛ pe yɛn na jɛɛn kayaŋga ki kala na;
ca ki sumbonɔ naŋambajɛɛnlɛ pe yɛn na jɔlɔ,
kala pyew li yɛn nandangawa kala Siyɔn ca ki kan.
5 Pe winfɛnnɛ pè cew ta pe na,
pe juguye pe yɛn ma cɛn yɛyinŋge na pe go na;
katugu Yawe Yɛnŋɛlɛ lo lìgi jɔlɔgɔ ki wa pe na
pe kapere lɛgɛrɛ pyewe pi kala na.
Pè pe piile pe yigi ma kari pe ni,
pè pye pe juguye pe kasopiile.
6 Siyɔn ca ki gbɔgɔwɔ pì kɔ ma wɔ wa,
ca ki legbɔɔlɔ pè pye paa wolowoye yɛn,
mbele kasaga woro pe yeri naa.
Pe yɛn na fee pe purɔfɔ wi yɛgɛ,
fanŋga kpɛ si koro pe ni.
7 Yarijɛndɛ nda tìla pye Zheruzalɛmu ca woolo pe yeri faa,
koni wa pe jɔlɔgɔ wagati wi ni,
ma pe ta pe yɛn na yanri na toro,
pe yɛn na nawa tuun ki yarijɛndɛ ti ni fuun ti na.
Naa ca woolo pàa ye pe juguye pe kɛɛ,
lere kpɛ sila ta mbe pe shɔ.
Pe winfɛnnɛ pàa pe tɔngɔwɔ pi yan,
nɛɛ tɛgɛ pe na.
8 Zheruzalɛmu ca ki kapere tì lɛgɛ fɔ ma toro,
ki kala na kì kanŋga ma pye fyɔngɔ yaraga.
Mbele fuun pàa pye naga jate,
pe yɛn naga tifaga,
katugu pège fɛrɛ laga ki yan.
Ko jate ki yɛn na jɛɛn kayaŋga ki kala na,
fɔ naga yɛgɛ ki lara.
9 Ki fyɔngɔ ki yɛn wa ki deritɔnlɔgɔ ki nɔgɔna yɔnrɔ ti na.
Ki sila jatere pye ŋga ki mbaa kaga ta ki na.
Ki tolo lì pye kaparaga,
lere kpɛ si ta mbege kotogo ki sogo ki na.
Kì yo fɔ: «E, Yawe Yɛnŋɛlɛ, na jɔlɔgɔ ki wele,
katugu na jugu wì cew ta na na.»
10 Juguye pè Zheruzalɛmu ca yarijɛndɛ sɔnŋgbanga woro ti ni fuun ti koli.
Kì cɛngɛlɛ kele yɛgɛ woolo yan paa yiin wa laga kpoyi ki ni,
ma si yala mboro Yɛnŋɛlɛ, màa ki cɛngɛlɛ ke yɛgɛ kɔn
ma yo kee daga mbe ye wa ma woolo pe gbogolomɔ pi ni.
11 Zheruzalɛmu ca woolo pe ni fuun pe yɛn na jɛɛn,
na pe yaakara ti lagajaa.
Pe yarijɛndɛ nda ti wogo kì ŋgban pe ni, pe yɛn nari kaan yaakara na,
jaŋgo mbe yaakara ta mbe ka mbe fanŋga jɛnri ta.
Zheruzalɛmu ca kì yo fɔ: «E, Yawe Yɛnŋɛlɛ, ma yɛgɛ ki yirige ma wele,
yɛgɛ ŋga na pe yɛn nala tifaga we!»
12 Yoro mbele fuun ye yɛn na tooro wa konɔ li ni,
we jɔlɔgɔ ki woro yaraga ka ye yɛgɛ na wi le?
Yege wele yege yan,
na kaa pye we jɔlɔgɔ ki cɛnlɛ lere wa ta?
Ko ŋga kì to we na we.
Yawe Yɛnŋɛlɛ lìgi jɔlɔgɔ ki wa we na,
li naŋgbanwa gbɔɔ pilige ki na.
13 Lì kasɔn tirige we na ma yiri wa naayeri,
a kì ye we ni na we sori fɔ wa kajeere ti na;
lì mɛrɛ jan we na wa we tɔɔrɔ ti nɔgɔ,
lì we jan ma kari we ni puŋgo na.
Lì we yaga we yɛ pew,
we yɛn jɔlɔgɔ gbɔgɔ na pilige pyew.
14 Lì yɛgɛ yɛn we kambasinnde ti na,
lìri pɔ ti yɛɛ na li kɛyɛn yi ni;
lìri pɔ ti yɛɛ na mari taga wa we yɔlɔgɔ ki na,
fɔ ma we fanŋga ki kɔ we ni.
We Fɔ wì we le leele pele kɛɛ,
mbele we fanŋga ki se ya pe ni.
15 Maliŋgbɔɔnlɔ kotogofɛnnɛ mbele fuun pàa pye we ni,
we Fɔ wì pe purɔ;
wì maliŋgbɔɔnlɔ ŋgbelege ka yeri we na,
jaŋgo mbe we lefɔnmbɔlɔ pe tɔngɔlɔ;
we Fɔ wì Zhuda ca tiyɔngɔ ki tɔngɔlɔ,
paa yɛgɛ ŋga na pe ma kaa ɛrɛzɛn pire tangala mari tɔngɔlɔ wa ti tɔnmɔ wɔsaga ki ni.
16 Poro kala na we yɛn na gbele,
we yɛngɛlɛ kè yin yɛntunwɔ pi ni,
katugu ŋa wi yaa we kotogo ki sogo we na, wùu yɛɛ laga lali we ni,
wo ŋa wi mbe ja ya mbe kotogo le we ni we.
We piile pè tɔngɔ ma kɔ,
katugu we juguye pè fanŋga ta we na.
17 Siyɔn ca kìgi kɛyɛn yi yirige na sagawa jaa,
ɛɛn fɔ lere kpɛ si ta mbege kotogo ki sogo ki na.
Yawe Yɛnŋɛlɛ lì konɔ kan Zhakɔbu setirige piile pe juguye pe yeri,
fɔ pe pan pe pe maga kɛɛ ki ni fuun ki na.
Zheruzalɛmu ca kì pye fyɔngɔ yaraga wa pe sɔgɔwɔ.
18 Tanga yɛn Yawe Yɛnŋɛlɛ li yeri,
katugu muwi mì je li sɛnrɛ ti na.
Yoro cɛngɛlɛ sanŋgala woolo, ye ni fuun ye logo na yeri!
Yanla jɔlɔgɔ ki wele!
Na sumborombiile naa na lefɔnmbɔlɔ pè pe koli ma kari pe ni kulowo ni.
19 Mìla pye ma mbele ndanla faa, mì pe yeri panla saga,
ɛɛn fɔ pànla fanla.
Na saraga wɔfɛnnɛ naa na lelɛɛlɛ pe ni,
pè ku wa ca nawa.
Pàa pye na yaakara lagajaa mbe ka,
jaŋgo mbe fanŋga le pe yɛɛ ni.
20 Yawe Yɛnŋɛlɛ, na yɛsanga kala li wele.
Na nawa pì wɔ na na fɔ ma toro;
na jatere wì piri na na,
katugu mì yiri ma je kaselege.
Wa funwa na, pànla piile pe gbo tokobi ni,
wa go ki ni, kunwɔ po pi yɛn leele pe na.
21 Mìla pye na jɛngɛ ŋga jɛɛn, leele pàa ki logo,
ɛɛn fɔ lere kpɛ sila pan mbanla kotogo ki sogo na na.
Jɔlɔgɔ ŋga kìlan ta, na juguye pe ni fuun pège wogo ki logo;
mboro Yɛnŋɛlɛ naa mà yɛnlɛ ma ko pye na na, pe nawa pì yinŋgi pe na.
Pilige ŋga sɛnrɛ màa yo, ki yaga ki gbɔn,
ma ti na juguye pe kala li pye paa na wolo li yɛn.
22 Tipege ŋga pè pye na na, ki wele!
Ŋga mà pye na na, na kambasinnde ti kala na,
ma ko cɛnlɛ pye pe na;
katugu mi yɛn na jɛngɛ lɛgɛrɛ jɛɛn,
na jatere wì piri na na.