Yɛnŋɛlɛ yɔn sɛnrɛ yofɔ
MISHE
wi sɛwɛ we
Sɛwɛ wi nawa sɛnrɛ
Yɛnŋɛlɛ yɔn sɛnrɛ yofɔ Mishe wìla wi yinwege ki pye wagati nuŋgba ni Yɛnŋɛlɛ yɔn sɛnrɛ yofɔ Ezayi wi ni. Wi sɛnrɛ tì yo ma kari wunluwɔ cagbɔrɔ shyɛn to yeri: Ki koŋgbanŋga Samari ca ye, ko ki yɛn Izirayɛli tara wunluwɔ mba wa yɔnlɔparawa kamɛŋgɛ kɛɛ yeri pi wunluwɔ cagbɔgɔ ye. Ki shyɛn wogo Zheruzalɛmu ca ye, ko ki yɛn Zhuda tara wunluwɔ mba wa yɔnlɔparawa kalige kɛɛ yeri pi cagbɔgɔ ye. Mishe wi yɛn na sɛnŋgbanra yuun yɛkeele, naa saraga wɔfɛnnɛ, naa kiti kɔnfɛnnɛ konaa penjagbɔrɔ fɛnnɛ pe na, na para pe mbasinmɛ wogo ki na. Yɛnŋɛlɛ yɔn sɛnrɛ yofɛnnɛ mbele pe yɛn yagboyoolo wìla pe kala li yirige funwa na, poro mbele pàa pye naga yuun leele pe kan ma yo yɛyinŋge ki yaa ka ta, na pe punŋgu we. Mishe wìla ki naga ma yo ki cagbɔrɔ shyɛn ti yaa ka tɔngɔ, ca woolo pe yaa ka ye jɔlɔgɔ.
Ɛɛn fɔ Mishe wi sɛnyoro ti yɛn na jigi tagasaga jɛnri kaan konaa na kotogo nii lere ni. Yɛnŋɛlɛ lì yo fɔ li woolo pe yaa ka sɔngɔrɔ mbe pan li kɔrɔgɔ. Cɛngɛlɛ ke ni fuun ke yaa kaga jɛn mbe yo fɔ lo li yɛn Yɛnŋɛlɛ le (4.1-4). Yɛnŋɛlɛ li yaa Davidi setirige pyɔ wa torogo, wi pan wi cɛn tegere ti na, pa kona yɛyinŋge sanga yaa ka ta (5.1-4a).
Mishe wìla ki jɛn ma yo wi woolo pàa kapere pye, ɛɛn fɔ wìla wi jigi wi taga Yɛnŋɛlɛ li na. Wìla yo fɔ:
Ma yaa we yinriwɛ ta naa,
ma se we kapere ti jate we go na naa,
ma yaa we kapere ti ni fuun ti wa fɔ wa kɔgɔje wi nɔgɔ.
Ma yɛn sɛnrɛ nuŋgba yofɔ yɛgɛ ŋga na, ma yaa ki naga Zhakɔbu setirige piile pe na.
Ma yaa kajɛŋgɛ pye poro mbele Abirahamu setirige piile pe kan,
paa yɛgɛ ŋga na màa wugu ki na faa we tɛlɛye pe kan we (7.19-20).
Sɛwɛ wi yɛn ma kɔɔnlɔ yɛgɛ ŋga na
Yawe Yɛnŋɛlɛ li yaa ka jɔlɔgɔ wa li woolo pe na 1–3
Yawe Yɛnŋɛlɛ li yaa kaa li wunluwɔ pi piin konaa mbe leele pe shɔ 4–5
Yawe Yɛnŋɛlɛ làa Izirayɛli woolo pe yɛri konaa ma yɔn fɔgɔlɔ kɔn pe yeri 6–7
1
1 Yawe Yɛnŋɛlɛ làa li sɛnrɛ nda yo Moreshɛti ca fɛnnɛ naŋa Mishe† 1.1: Mishe mɛgɛ ki kɔrɔ wowi ŋa fɔ: Ambɔ wi yɛn paa Yawe Yɛnŋɛlɛ li yɛn? wi kan tori yɛɛn. Kìla pye Zhuda tara wunlumbolo Yotamu, naa Ahazi konaa Ezekiyasi pe ni fuun nuŋgba nuŋgba pe sanga wi na. Yariyanra nda làa naga wi na Samari ca naa Zheruzalɛmu ca ti wogo na, ti nda† 1.1: 2 Wunlu 15.32–16.20; 18.1–20.21; 2 Kuro 27.1-7; 28.1–32.33.
KITI YAA KA KƆN IZIRAYƐLI TARA TI NA
1.2–7.20
2 Cɛngɛlɛ ke ni fuun ye logo na yeri.
Tara to naa ti nawa yaara ti ni fuun, ye nuŋgbogolo jan ye logo.
We Fɔ, Yawe Yɛnŋɛlɛ li yaa ka ye jɛrɛgi,
lo na we Fɔ mbeli ta wa li cɛnsaga kpoyi ki ni we.
Yɛnŋɛlɛ làa yo li yaa kiti kɔn
Izirayɛli woolo pe na
Izirayɛli woolo pe na
3 Ye wele, Yawe Yɛnŋɛlɛ li yɛn na yinrigi wa li cɛnsaga na paan.
Li yɛn na tinri, li yɛn na tanri wa tara ti lara nda tì yagara ti na.
4 Yanwira ti yɛn na yanni wa li tɔɔrɔ ti nɔgɔ† 1.4: Yanwira ti yɛn na yanni: Ko yɛn naga nari ma yo yaraga ko ka se ya yere mbe Yɛnŋɛlɛ li sige. Li yɛn yaraga pyew ki go na (Kiti 5.4-5; Yuuro 97.2-5).,
Gbunlundɛrɛ ti yɛn na jɛɛnri,
paa yɛgɛ ŋga na sɛnriŋguro ma kaa na yanni kasɔn we,
paa yɛgɛ ŋga na tɔnmɔ ma kaa yiri tinndi na na fuun we.
5 Ko ki ni fuun ŋga ko yɛn na piin Zhakɔbu setirige piile pe kambasinnde to kala na,
poro mbele Izirayɛli woolo pe kapere to kala na.
Ambɔ wi ti, a Zhakɔbu setirige piile pe nɛɛ kambasinnde to piin?
Mì yo Samari ca koyi.
Ambɔ wi ti sunzara nda wa tinndiye pe na ti si yɛn wa Zhuda tara?
Mì yo Zheruzalɛmu ca koyi.
6 Ki kala na, we Fɔ wì yo fɔ: «Mi yaa Samari ca ki pye paa kataga yɛn wa wasege.
Ki yaa pye ɛrɛzɛn tiire sanrisaga ko cɛ.
Mi yaa ka ki sinndɛɛrɛ ti koŋgo mberi wa wa gbunlundɛgɛ ki ni;
pège mbogo ki nɔgɔ le yaara nda ni, mi yaa ti yirige funwa na.
7 Ki yarisunndo yanlɛrɛ nda pè tɛ, ti ni fuun ti yaa yaari.
Ki tɔnli pee wi ni fuun wi yaa ka sogo.
Mi yaa ki yarisunndo yanlɛrɛ ti ni fuun ti jɔgɔ.
To nda kì ta wa ki nanjara ti tɔnli wi ni we.
Ti yaa tɛgɛ fun mbe nanjaala pele yɛgɛ sara ti ni.»
Jɔlɔgɔ yaa to Zheruzalɛmu ca ki na
8 Ki kala na, mi Mishe, mi yaa kaa yanli, mbaa kunwɔ gbelege gbele.
Mi yaa kaa tanri tɔwara, mbe koro witiwaga.
Mi yaa kaa gbele paa dabaaga yɛn,
mbaa yuŋgbɔgɔrɔ gbelege gbele paa kɔnrɔsogolo yɛn.
9 Katugu Samari ca fɛnnɛ pe sagbanga ki se ya gbara mbe kɔ.
Kì gbɔgɔ fɔ ma saa gbɔn wa Zhuda tara ti na yɛrɛ;
ma ye ma saa gbɔn fɔ wa na woolo pe cagbɔgɔ ki na, Zheruzalɛmu ca ye.
10 Yaga ka saga sɛnrɛ ti yari wa Gati ca (juguye pe kan).
Yaga ka gbele wa Ako ca fyew.
Ye kari ye saa koŋgi wa gbanŋgban wi ni, wa Bɛti Leyafira ca mbege naga fɔ ye jatere wì piri ye na† 1.10: Mbege lɛ vɛrise 10-15: Kapege ŋga ki sɛnrɛ ti yo cara nda wa ti wogo na, ki kapege ki yolɔmɔ po naa cara ti mɛrɛ yerilɔmɔ pì yiri pi yɛɛ kɔrɔgɔ. Bɛti Leyafira kɔrɔ wo yɛn fɔ cɔnrɔ ca; pe pye na koŋgi wa cɔnrɔ ti ni..
11 Yoro Safiri ca fɛnnɛ, ye toro yaa kee wa kulowo pi ni witiwaga ni naa fɛrɛ ti ni.
Zaana ca fɛnnɛ pe se ya yiri yɛrɛ wa pe ca.
Bɛti Ezɛli ca fɛnnɛ pe yɛn na kunwɔ gbelege gbele, pe se ya kala la pye mbe ye saga.
12 Marɔti ca fɛnnɛ pe jatere wì piri pe na fɛrɛwɛ mba pè ta pi wogo na,
katugu jɔlɔgɔ yiri wa Yawe Yɛnŋɛlɛ li yeri ma pan ma gbɔn fɔ le Zheruzalɛmu ca yeyɔnrɔ ti na.
13 Lakishi ca fɛnnɛ, ye ye wotoroye pe pɔpɔ wa shɔnye pe na,
katugu yoro ye pye koŋgbanmbala, ma ti a Siyɔn ca woolo pè kapege pye.
Mbe yiri mbe je, poro Izirayɛli woolo pa pège fɔrɔgɔ wa yoro yeri.
14 Ko kala kì ti ye daga mbe laga Moreshɛti Gati ca fɛnnɛ pe na† 1.14: Pe daga mbe laga Moreshɛti Gati ca fɛnnɛ pe na, katugu juguye pe yaa pan mbege ca ki shɔ..
Akizibu ca woolo poro na, pe se ya sagawa kpɛ kan Izirayɛli tara wunlumbolo pe yeri.
15 Yoro Maresha ca fɛnnɛ wele, mi yaa maliŋgbɔɔn wa yirige mbe wa ye na naa.
Izirayɛli tara teele mbele gbɔgɔwɔ yɛn pe yeri, pe yaa ka fe sa lara wa Adulamu ca waliwege ki ni† 1.15: 1 Sami 22.1.
16 Zheruzalɛmu ca woolo, ye ye yinzire ti kɔɔnlɔ.
Ye ye yinrɛ ti kulu mbege naga fɔ kunwɔ kayaŋga yɛn ye ni ye pinambiile mbele pe ye ndanla pe kala na.
Ye ye yinrɛ ti kulu ye pye yumbɛrɛ fɛnnɛ paa pɛtɛɛlɛ yɛn,
katugu pe yaa ye pinambiile pe koli mbe kari pe ni kulowo mbe pe lali ye ni.
†1:1 1.1: Mishe mɛgɛ ki kɔrɔ wowi ŋa fɔ: Ambɔ wi yɛn paa Yawe Yɛnŋɛlɛ li yɛn?
†1:1 1.1: 2 Wunlu 15.32–16.20; 18.1–20.21; 2 Kuro 27.1-7; 28.1–32.33
†1:4 1.4: Yanwira ti yɛn na yanni: Ko yɛn naga nari ma yo yaraga ko ka se ya yere mbe Yɛnŋɛlɛ li sige. Li yɛn yaraga pyew ki go na (Kiti 5.4-5; Yuuro 97.2-5).
†1:10 1.10: Mbege lɛ vɛrise 10-15: Kapege ŋga ki sɛnrɛ ti yo cara nda wa ti wogo na, ki kapege ki yolɔmɔ po naa cara ti mɛrɛ yerilɔmɔ pì yiri pi yɛɛ kɔrɔgɔ. Bɛti Leyafira kɔrɔ wo yɛn fɔ cɔnrɔ ca; pe pye na koŋgi wa cɔnrɔ ti ni.
†1:14 1.14: Pe daga mbe laga Moreshɛti Gati ca fɛnnɛ pe na, katugu juguye pe yaa pan mbege ca ki shɔ.
†1:15 1.15: 1 Sami 22.1