Yiri ma sa kiti kɔngɔ sɛnrɛ yo wa yanwira ti yɛgɛ sɔgɔwɔ,

tinndiye fun paa nuru ma yeri.

2 Yoro yanwira, ye Yawe Yɛnŋɛlɛ li kiti kɔngɔ sɛnrɛ ti logo;

tara ti nɔgɔna cɛnyaara nda ti yɛn fanŋga ni, yege sɛnrɛ nda ti logo.

Mà jɛn Yawe Yɛnŋɛlɛ li yaa kiti kɔn li woolo pe na,

li yaa yiri Izirayɛli woolo pe kɔrɔgɔ.

3 «Na woolo, yiŋgi mi pye ye na?

Yiŋgi mi pye ye na ki ye te?

Yanla yɔn sogo.

4 Naa mìla ye yirige wa Ezhipiti tara ko kala na le?

Naa mìla ye wɔ wa kulowo pi ni ko kala na le?

Naa mìla Moyisi, naa Arɔn konaa Miriyamu pe pye ye yɛgɛ sinfɛnnɛ ko kala na le†6.4: Ɛki 4.10-16; 12.50-51; 15.20?

5 Na woolo, ŋga Mowabu tara wunlunaŋa Balaki wìla pye ye na,

konaa Bewɔri pinambyɔ Balaamu wìla wi yɔn sogo sɛnrɛ nda ni,

ye nawa to ti na.

Ye nawa to ye kondangala li na, maga lɛ wa Shitimu ca fɔ ma saa gbɔn wa Giligali ca ki na, yege jɛn mi ŋa Yawe Yɛnŋɛlɛ kajɛŋgɛ mì pye ye kan†6.5: Nɔmbu 22.2–24.25; Zhozu 3.1–4.19.»

6 Mi daga sa yere Yawe Yɛnŋɛlɛ li yɛgɛ sɔgɔwɔ yiŋgi yarikanga ni?

Yɛnŋɛlɛ na yaara ti ni fuun ti go na, mi yaa sa kanŋguuro kan li yɛgɛ sɔgɔwɔ, mbeli gbɔgɔ yiŋgi ni?

Mi daga mbe kari li yɛgɛ sɔgɔwɔ saara sogoworo ni le?

Nakoma napire ni nda tì ta yɛlɛ nuŋgba nuŋgba.

7 Naga yɛn ma, Yawe Yɛnŋɛlɛ li mbe yɛnlɛ simbapɛnɛ lɛgɛrɛ na le?

Li mbe yɛnlɛ sinmɛ lɛgɛrɛ na, mba pila fuun paa lɔgɔ yɛn le?

Na pinambyɔ koŋgbanŋa wo mi daga mbe wɔ saraga na mbasinmɛ pi kala na le?

Na yɛɛra latirige ko mi daga mbe wɔ saraga na kapege ki kala na le?

8 Mboro sɛnwee pyɔ, ŋga ki yɛn ma sin, pège naga ma na.

Ŋga Yawe Yɛnŋɛlɛ li yɛn na jaa ma yeri, ko yɛn fɔ maa kasinŋge piin,

kagbaraga pyege kɔɔn ndanla,

mɔɔ yɛɛ tirige maa tanri ma Yɛnŋɛlɛ li ni.

9 Yawe Yɛnŋɛlɛ li yɛn na para ca woolo pe ni.

Mbaa fyɛ Yɛnŋɛlɛ li yɛgɛ ko ki yɛn tijinliwɛ we.

Jɔlɔgɔ ŋga ki yaa to ye na ye kapere ti kala na,

konaa ŋa wi yaa kaga jɔlɔgɔ ki wa ye na, ye logo wi yeri!

10 Lepeele pè koro na yarijɛndɛ gbogolo wa pe yinrɛ ti ni pe nambara wi fanŋga na,

pe ma pe tiwiyaara ti kologo fɔ tipege.

Ki wogo ki yɛn mala mbɛn fɔ jɛŋgɛ.

Mbe ya mbege kun na yɛɛ ni mɛlɛ?

11 Lere ŋa wi ma culo wi gbɔn maa piri,

konaa puwakuruye mbele pe woro ma yala, pe ma pye wa wi kasha,

mi yaa ki lerefɔ wi yaga mbajɔlɔwɔ mɛlɛ?

12 Ki ca ŋga ki penjagbɔrɔ fɛnnɛ pe yɛn lewɛlimbɛlɛ fɔ jɛŋgɛ.

Ki ca woolo pe maa finlɛlɛ ma toro.

Lefanlaga sɛnrɛ ti maa yinrigi wa pe yɔn.

13 Ki kala na, mi yaa jɔlɔgɔ wa ye na;

mi yaa ye tɔngɔ ye kapere ti kala na.

14 Ye yaa kaa kaa, ɛɛn fɔ ye se kaa tinni;

fuŋgo ki se ka kɔ ye na.

Ye yaa ka yarilire tɛgɛ, ɛɛn fɔ yaraga se ka ta ye yeri.

Na yaraga ka ta ye yeri, mi yaa ki jɔgɔ malaga ni.

15 Ye yaa ka yariluguro lugu,

ɛɛn fɔ ye se ka yarilire kɔn.

Ye yaa ka ye oliviye tige pire sinmɛ pi wɔ,

ɛɛn fɔ ye se ka pa fa.

Ye yaa ka ye ɛrɛzɛn pire tɔnmɔ pi wɔ,

ɛɛn fɔ ye se kaga duvɛn wa wɔ.

16 Ye yɛn na tanri wunlunaŋa Omiri wi kondɛgɛŋgɛlɛ koro na,

ye yɛn na tanri na yala wi pinambyɔ Ashabu naa wi go woolo pe tangalɔmɔ po ni,

pe kapyere to ye yɛn na fɔrɔgi.

Ki kala na, mi yaa ca ŋga ki tɔngɔ,

mi yaa ti ca woolo pe pye titɛgɛrɛ yaraga.

Fɛrɛ nda ti yɛn na woolo pe na, ti yaa pye ye woro.