Yɛnŋɛlɛ yɔn sɛnrɛ yofɔ
NAWUMU
wi sɛwɛ we
Sɛwɛ wi nawa sɛnrɛ
Laga ki sɛwɛ ŋa wi ni, Yɛnŋɛlɛ yɔn sɛnrɛ yofɔ Nawumu wi yɛn na para cagbɔgɔ Ninive ki tɔngɔwɔ po sɛnrɛ na. Ninive ca ko kìla pye Asiri tara ti wunluwɔ cagbɔgɔ ye. Ki tara woolo pàa Yɛnŋɛlɛ li woolo pe jɔlɔ fɔ ma saa toro. Ɛɛn fɔ, koni poro jate, maliŋgbɔɔnlɔ yaa pan mbe pe tara ti tɔn muŋga, mberi pye titɛgɛrɛ yaraga konaa mberi tɔngɔ pew. Yɛnŋɛlɛ li yɔn sɛnyoro ti lɛgɛrɛ ni, pe ma para Yɛnŋɛlɛ li kiti kɔngɔ ki sɛnrɛ na, konaa ma para fun li yinriwɛ tawa gbɔɔ pi wogo na. Ɛɛn fɔ, laga ki sɛwɛ ŋa wi ni, ki woro ma. Ninive ca ki se shɔ Yɛnŋɛlɛ li kiti kɔngɔ ki ni. Sɛwɛ wì yo fɔ:
Yawe Yɛnŋɛlɛ li yɛn Yɛnŋɛlɛ na laa li yenjɔ wi yaga.
Yawe Yɛnŋɛlɛ li maa kapege ki kayaŋga woo.
Li naŋgbanwa pi yɛn ma tijanga fɔ jɛŋgɛ.
Yawe Yɛnŋɛlɛ li ma kayaŋga wɔ li winfɛnnɛ pe ni,
li mali naŋgbanwa jɔlɔgɔ ki tɛgɛ li juguye pe mɛgɛ ni.
Yawe Yɛnŋɛlɛ laa la nawa ŋgbanni jaga jaga.
Yawa gbɔɔ yɛn li ni.
Ɛɛn fɔ laa kapege pyefɔ wi yaga mbajɔlɔwɔ (1.2-3a).
Sɛwɛ wi yɛn ma kɔɔnlɔ yɛgɛ ŋga na
Yɛnŋɛlɛ làa nawa ŋgban Ninive cagbɔgɔ ki ni 1.1-6
Mbele pe yɛn Yɛnŋɛlɛ li woolo pe juguye, leele pele yaa ka ya pe ni 1.7-14
Ninive ca ki yaa ka tɔngɔ pew 2.1–3.19
1
1 Yɛnŋɛlɛ yɔn sɛnrɛ nda tìla yo Ninive ca ki wogo na, tori nda yɛɛn. Kagala ŋgele Yɛnŋɛlɛ làa naga Ɛlikɔshi ca fɛnnɛ naŋa Nawumu wi na, ki sɛwɛ wowi ŋa yɛɛn.
Yɛnŋɛlɛ li yaa ka kiti kɔn
Ninive ca ki na
Ninive ca ki na
2 Yawe Yɛnŋɛlɛ li yɛn Yɛnŋɛlɛ na laa li yenjɔ wi yaga.
Yawe Yɛnŋɛlɛ li maa kapege ki kayaŋga woo,
li naŋgbanwa pi yɛn ma tijanga fɔ jɛŋgɛ.
Yawe Yɛnŋɛlɛ li ma kayaŋga wɔ li winfɛnnɛ pe ni,
li mali naŋgbanwa jɔlɔgɔ ki tɛgɛ li juguye pe mɛgɛ ni.
3 Yawe Yɛnŋɛlɛ laa la nawa ŋgbanni jaga jaga.
Yawa gbɔɔ yɛn li ni.
Ɛɛn fɔ laa kapege pyefɔ wi yaga mbajɔlɔwɔ.
Yawe Yɛnŋɛlɛ li ma torosaga wɔ wa tifɛlinjolo lo naa tifɛliŋgbɔgɔ ti sɔgɔwɔ pi ni.
Kambaara to ti yɛn gbanŋgban ŋa li tɔɔrɔ ti ma yirige we.
4 Li ma gbanla kɔgɔje wi na, wi ma waga,
li ma ti gbaanla pe ni fuun pe ma waga.
Bazan tara naa Karimɛli yanwira lara tì waga,
Liban tara ti tire fyɛɛnrɛ tì fanla.
5 Yanwira ti maa yɛgɛ li yɛgɛ sɔgɔwɔ,
tinndiye pe maa yanni.
Tara ti maa tigile li yɛgɛ sɔgɔwɔ,
konaa dunruya wo naa wi nawa yaara ti ni fuun ti ni.
6 Ambɔ wi mbe ya yere mbeli naŋgbanwa ndorogo ki sige?
Ambɔ wi mbe ya yere mbeli naŋgbanwa gbɔɔ pi sige?
Na li ka nawa ŋgban, ki ma gbɔn lagapyew paa kasɔn yɛn,
waara ti ma jɛɛnri wa li yɛgɛ.
7 Yawe Yɛnŋɛlɛ li yɛn jɛnnɛ,
li yɛn larasaga jɔlɔgɔ pilige ki na.
Mbele pe ma pe yɛɛ karafa li na,
li maa pe go singi.
8 Ɛɛn fɔ li yaa ti jɔlɔgɔ ki to paa tɔnŋgbɔɔ mba pi maa fuun ŋgbanga pi yɛn, mbege Ninive ca ŋga ki tɔngɔ pew.
Li yaa kali juguye pe purɔ fɔ sa pe le wa kunwɔ pi ni.
Sɛnrɛ nda tìla yo ma wa
Zhuda tara teele
naa Ninive ca woolo pe na
Zhuda tara teele
naa Ninive ca woolo pe na
Nda tì yo Zhuda tara teele pe kan
9 Yiŋgi yɔn lemɛ ye yɛn na jate mbe le Yawe Yɛnŋɛlɛ li na?
Li yaa ye tɔngɔ mbe ye kɔ pew,
ye se ka ya yiri li kɔrɔgɔ naa ki shyɛn wogo na.
10 Ye juguye pe yɛn paa wuuro tire yɛn, nda tì migi ti yɛɛ ni,
pe wɔ ma tin fɔ na sinndire piin.
Pe yaa ka sogo mbe kɔ pew paa yan waga yɛn.
Nda tì yo Ninive ca woolo pe kan
11 Mboro Ninive ca, lere wà yiri wa ma ni,
ŋa wìla pye na kapege jate Yawe Yɛnŋɛlɛ li ni,
ŋa wìla pye na tipege sɔnri li ni.
Nda tì yo Zhuda tara woolo pe kan
12 Pa Yawe Yɛnŋɛlɛ lì yo yɛɛn fɔ:
Ali na kaa pye Asiri tara fɛnnɛ pè lɛgɛ,
ali na kaa pye pe fanŋga kì gbɔgɔ,
pe yaa ka tɔngɔ, mbe wɔ wa pew.
Yoro Zhuda tara woolo, mìla ye go sogo,
ɛɛn fɔ mi se ka ye go sogo naa.
13 Koni, jɔlɔgɔ ŋga pè taga ye na, mi yaa ki laga ye na;
pè ye pɔ manda nda ni mberi sangala ye na.
Nda tì yo Ninive ca woolo pe kan
14 Yawe Yɛnŋɛlɛ lì sɛnrɛ nda yo mboro Ninive ca ma wogo na, ti nda:
Ma se ka setirige piile ta ma puŋgo na,
pɔɔn mɛgɛ ki taga.
Yaara yanlɛrɛ nda mà tɛ to naa yarisunndo nda mà tugurɔn yan mari gbegele,
mi yaa kari tɔngɔ mberi wɔ wa ma yarisunndo gbɔgɔgo ki ni.
Mi yaa ma fanga ki gbɛgɛlɛ,
katugu ma woro yaraga ka na yɛgɛ na.