3
Mbe kajɛnmɛ ta
konaa mbaa fyɛ Yɛnŋɛlɛ li yɛgɛ
konaa mbaa fyɛ Yɛnŋɛlɛ li yɛgɛ
1 Na pinambyɔ, maga ka fɛgɛ na nagawa sɛnrɛ ti na,
na ŋgasegele ke tɛgɛ wa ma kotogo na maa tanri ke na;
2 katugu ki sɛnrɛ ti yaa yinwetɔnlɔgɔ kan ma yeri,
mbe ka taga ma yinwege piliye yi na, mbe yɛyinŋge kan ma yeri.
3 Maga ka ti kagbaraga pyege konaa mbe pye tagawa ni tɔɔn la,
mari pye fereyaara wa ma yɔlɔgɔ,
ma ti ti cɛnsaga ta wa ma kotogo na.
4 Kona, ma kala li yaa Yɛnŋɛlɛ li ndanla mbe sɛnweele pe ndanla,
pe yaa lɔɔn jate tijinliwɛ fɔ†3.4: Luki 2.52.
5 Ma jigi wi taga Yawe Yɛnŋɛlɛ li na ma kotogo ki ni fuun ni,
maga ka kɛɛ kan ma yɛɛra tijinliwɛ po na.
6 Ma li wogo ki tɛgɛ wa ma jatere wi na ma kapyege ki ni fuun ni,
ki ka pye ma, li yaa ma koŋgolo ke yɔn yala ma kan.
7 Maga kaa ma yɛɛ jate kajɛnŋɛ,
ɛɛn fɔ ta fyɛ Yawe Yɛnŋɛlɛ li yɛgɛ,
mɔɔ yɛɛ laga kapege pyege ki na†3.7: Ɔrɔmu 12.16.
8 Ko ki yaa ma wire ti sagala,
mbɔɔn kajeere ti kan fanŋga ni.
9 Ta Yawe Yɛnŋɛlɛ li gbogo ma kɛɛ yaara ti ni,
maa li gbogo ma kɛɛrɛ yarilire pyew ti koŋgbannda ti ni.
10 Pa kona ma bondoolo pe yaa yinyin yarilire ti ni fɔ mbaa wuun,
ma kopɛrɛ ti yaa yinyin ɛrɛzɛn pire tɔnmɔ pi ni fɔ mbaa wuun.
11 Na pinambyɔ, maga ka Yawe Yɛnŋɛlɛ li korowo pi tifaga,
maga ka ti li yɛrɛwɛ sɛnrɛ ti pye tege ni ma yeri†3.11: Zhɔbu 5.17;
12 katugu ŋa wi yɛn ma Yawe Yɛnŋɛlɛ li ndanla, li maa koro,
paa yɛgɛ ŋga na pyɔ ŋa wi yɛn maa to ndanla wi maa wi koro we†3.11-12: Ebu 12.5-6; Naga 3.19.
Kajɛnmɛ pi tɔnli wi yɛn ma gbɔgɔ
13 Lere ŋa ka kajɛnmɛ pi ta, fɛrɛwɛ yɛn wi woo,
lere ŋa ka tijinliwɛ pi ta, fɛrɛwɛ yɛn wi woo!
14 Katugu pi tawa pì mbɔnrɔ ma wɛ warifuwe tawa na,
tɔnli ŋa wi maa taa wa pi ni, wì wɛ tɛ na.
15 Kajɛnmɛ pi sɔnŋgɔ kì ŋgban ma wɛ somu sɔnŋgbanga woo na;
yaraga ŋga fuun ma yɛgɛ maa yinrigi ki na, ko ka kpɛ woro kayɔngɔ ni mboo bɔ.
16 Yinwetɔnlɔgɔ maa taa wa pi kalige kɛɛ ki ni,
yarijɛndɛ naa gbɔgɔwɔ maa taa wa pi kamɛŋgɛ kɛɛ ki ni.
17 Pi maa kee sɛnwee wi ni koŋgolo ŋgele ni, ke tangala yɛn ma tanla;
yɛyinŋge yɛn wa pi kombigile ke ni fuun ke ni.
18 Pi yɛn yinwege tige ma mbele kaa yigi pe kan,
mbele kaa yigi mbe koro pi na, fɛrɛwɛ yɛn pe woo.
19 Yawe Yɛnŋɛlɛ lì tara ti nɔgɔ ki teŋge kajɛnmɛ po fanŋga na;
tijinliwɛ po fanŋga na, lì naayeri wi gbegele maa tɛgɛ.
20 Li jɛnmɛ po fanŋga na, tara ti nɔgɔna tɔnmɔ were tì yɛngɛlɛ;
po fanŋga na kambaara ti maa fɔɔngɔ wuun.
Yɛnŋɛlɛ lo
li maa kajɛnŋɛ wi go singi
li maa kajɛnŋɛ wi go singi
21 Na pinambyɔ, tijinliwɛ po naa jatere pyelɔmɔ jɛmbɛ pi yigi ma mara pi na,
maga ka ti pi lali ma ni.
22 Ti yaa yinwege kan ma yeri,
mbe pye fereyaara wa ma yɔlɔgɔ.
23 Pa kona ma yaa la tanri wa ma konɔ li ni yɛyinŋge na pɔw,
ma se kurugo yaraga ka kpɛ na.
24 Na maga sinlɛ, ma se ka fyɛ yaraga ka kpɛ na,
na maga sinlɛ, ma yaa wɔnlɔ yinŋge.
25 Fyɛrɛ kala kɔɔn fo, maga ka fyɛ;
nakoma na lepeele paga yiri ma kɔrɔgɔ, maga ka fyɛ;
26 katugu Yawe Yɛnŋɛlɛ li yaa pye ma jigi tagasaga,
mbaa ma tɔlɔgɔ ki kɔrɔsi kiga ka ye pɛnɛ.
Ma lewee yɛnlɛ
wi daga mbɔɔn ndanla
wi daga mbɔɔn ndanla
27 Na kaa pye lere wa daga ma kajɛŋgɛ pye wi kan,
na ki fanŋga ka pye ma ni, maga pye wi kan,
maga ka je mbege kajɛŋgɛ ki pye wi kan.
28 Maga kɔɔn lewee yɛnlɛ wi pye mbe yo fɔ:
«Kari ma sɔngɔrɔ ma pan, goto mi yaa ki kan ma yeri,»
mbe sigi ta yaraga yɛn ma yeri maa kan.
29 Maga ka kapege jate ma lewee yɛnlɛ wi ni,
wo ŋa wi yɛn ma cɛn le ma tanla, maa jigi wi taga ma na we.
30 Maga ka win lere ni go fu,
ŋa wii kapege kpɛ pye ma na.
31 Maga ka yɛgɛ yirige lewɛlɛwɛ wa na,
maga kaa tanri wi tangalɔmɔ pa kpɛ na.
32 Katugu lepeele pe kala li yɛn ma tijanga Yawe Yɛnŋɛlɛ li yɛgɛ na;
ɛɛn fɔ li ma wɛɛnrɛ le lesinmbele poro ni.
33 Yawe Yɛnŋɛlɛ li ma lepee wi go ki daŋga,
ɛɛn fɔ li ma duwaw lesinŋɛ wi go ki na.
34 Mbele pe maa tɛgɛ li na, li maa tɛgɛ pe na fun,
ɛɛn fɔ mbele pè pe yɛɛ tirige, li yɛn na yinmɛ kaan pe yeri†3.34: Zhaki 4.6; 1 Pyɛ 5.5.
35 Kajɛnmbɛlɛ pe yaa gbɔgɔwɔ ta kɔrɔgɔ,
ɛɛn fɔ lembire to yaa fɛrɛ gbɔrɔ shɔ.