AGURI WO NAA LEMUWƐLI PE SƐNYORO
30
30–31
Aguri wi sɛnrɛ
1 Yake pinambyɔ Aguri wi sɛnyoro ti nda. Sɛnrɛ nda to ki naŋa wìla yo Itiyɛli wi kan. Wìla ti yo Itiyɛli wo naa Ukali pe kan.
2 Ee, mi yɛn lembige ma wɛ sɛnwee pyew wi na;
sɛnwee tijinliwɛ woro na yeri.
3 Mi si kajɛnmɛ pi ta,
mba pi yaa ti mbe Yɛnŋɛlɛ na li yɛn kpoyi li jɛn.
4 Ambɔ wi lugu ma kari wa yɛnŋɛlɛ na, ma yiri wa ma tigi?
Ambɔ wila ya ma tifɛlɛgɛ ki yigi maga kuru wa wi kɛndala li ni?
Ambɔ wila ya ma tɔnmɔ pi fo wa wi derigbɔgɔ ki ni?
Ambɔ wi tara ti kɔngɔlɔ ke gbɔn?
Ki fɔ wi mɛgɛ ko yɛn kikiin? Wi pinambyɔ wi mɛgɛ ko yɛn kikiin?
Na kaa pye maga jɛn, ki yo!
5 Yɛnŋɛlɛ li sɛnrɛ ti ni fuun ti yɛn kaselege,
li yɛn paa tugurɔn sigeyaraga yɛn mbele fuun pe ma pe yɛɛ karafa li na pe kan.
6 Maga ka yaraga ka taga li sɛnrɛ ti na,
nakoma li yaa ma jɛrɛgi mbege naga fɔ ma yɛn yagboyoo.
7 Yɛnŋɛlɛ, mi yɛn na kagala shyɛn yɛnri ma yeri,
maga ka je mbe ke pye na kan sanni mbe sa ku.
8 Nambara sɛnrɛ naa yagbogowo sɛnrɛ ti laga lali na ni;
maga kanla pye fyɔnwɔ fɔ mbe sa toro, maga si kanla pye penjagbɔrɔ fɔ mbe sa toro,
ɛɛn fɔ yɔn suro nda ti yala na ni mbaa na yinwege ki piin, ma to kan na yeri.
9 Mà jɛn na mi ka pye penjagbɔrɔ fɔ mbe sa toro mi yaa ka ya mbe je ma na,
mbe yo fɔ: «Yawe Yɛnŋɛlɛ lo yɛn ambɔ fɔ?»
Nakosima na mi ka pye fyɔnwɔ fɔ mbe sa toro, mi yaa ka ya mbaa yuun,
mbe mboro ŋa na Yɛnŋɛlɛ ma mɛgɛ ki jɔgɔ.
10 Maga ka sa tunmbyee wa mɛpege yeri wi tafɔ wi kan;
nakoma wi yaa ma daŋga, ma yaa sɔɔn kajɔɔgɔ ki go kala li lɛ.
11 Leele pele yɛn wa, pe ma pe teele pe daŋga,
paa si sɛntanra yo pe nɛɛlɛ pe ni.
12 Leele pele yɛn wa, pe maa pe yɛɛ jate pe yɛn fyɔngɔ fu,
mbe sigi ta pe fa pe kapere fyɔngɔ ki jogo mbege laga wa.
13 Leele pele yɛn wa, pe maa pe yɛɛ gbogo fɔ ma saa toro,
ali yɛrɛ pe maa leele pe wele taw.
14 Leele pele yɛn wa, pe ŋgangala ke yɛn paa tokobiye yɛn,
pe tugbilala ŋgangala ke yɛn paa gbeŋgele yɛn;
pe ma mbele pe yɛn tege na pe kɔ mbe pe wɔ wa tara ti ni,
mbe fyɔnwɔ fɛnnɛ pe kɔ mbe pe wɔ wa sɛnwee piile pe sɔgɔwɔ.
Yomiyɛgɛlɛ ŋgele ke yɛn
na yaara yɔn nari
na yaara yɔn nari
15 Sumbonɔ shyɛn yɛn kasanwa shɔnrindɔŋgɔ ki yeri,
mbele pe maa yuun fɔ: «Ki kan! Ki kan.»
Yaara taanri yɛn wa, nda ti yɛnlɛ na tin yaraga na,
ti yɛrɛ yɛn fɔ yaara tijɛrɛ, nda tila yo fɔ: «Ki yala ma!»
16 Kuulo tara re, naa jambasee,
naa tara nda tɔnmɔ nari labɔ,
konaa kasɔn ki ni, ko ŋga kila yo fɔ: «Ki yala ma!»
17 Lere ŋa wi maa tɛgɛ wi to na,
konaa mbe je mbaa nuru wi nɔ wi yeri,
yanwira laforo kaankaanye pe yaa kaa yɛngɛlɛ ke sugulo mbe ke wɔwɔ,
yɔn piile pe yaa kaa yɔli.
18 Yaara taanri wa, nda tì toro na jɛnmɛ pi na,
ti yɛrɛ yɛn fɔ yaara tijɛrɛ, nda mi siri kɔrɔ jɛn.
19 Yɔn wi torokonɔ wa naayeri,
naa wɔɔgɔ ki torokonɔ wa walaga ki na,
naa tɔnmɔkɔrɔ ki torokonɔ wa kɔgɔje wi nandogomɔ,
konaa naŋa wi torokonɔ mbe kari wa sumboro wi yeri†30.19: Ŋga kì yo fɔ: Konaa naŋa wi torokonɔ mbe kari wa sumboro wi yeri pele maa ki jate ma yo ki sɛnrɛ ti kɔrɔ wi mbe ya logo fun fɔ naŋa naa jɛlɛ pe ma pe yɛɛ ndanla yɛgɛ ŋga na mbe sa gbɔn pe yɛɛ na..
20 Nandaa wi maa piin yɛgɛ ŋga na koyi yɛɛn:
Wi ma li mboo yɔn ki turugo,
mbe sho fɔ: «Mii kapege pye†30.20: Wi ma li mboo yɔn ki turugo, ko kɔrɔ wo yɛn fɔ na wi ka saa naŋgala li pye mbe kɔ, wi ma saa woli jaŋgo lere ka kaga jɛn..»
21 Yaara taanri yɛn wa, nda ti ma ti tara ti ma yɛgɛyɛgɛ,
ti yɛrɛ yɛn yaara tijɛrɛ nda ti kala li se kun tara ti ni.
22 Kulonaŋa wi pye wunluwɔ,
tijinliwɛ fu fɔ wi yarijɛndɛ lɛgɛrɛ ta wi tin,
23 jɛlɛ ŋa wi jogo wii yɔn, wi naŋa ta wi pɔri wi yeri,
konaa kulojɔ wi cɛn wi tafɔ jɛlɛ wi yɔnlɔ.
24 Yaara yɛnwere tijɛrɛ yɛn laga tara ti na, nda ti yɛn ma tunmɔlɔ fɔ jɛŋgɛ,
ɛɛn fɔ kajɛnmɛ gbɔɔ si yɛn ti yeri jɛŋgɛ.
25 Mimbele pe yɛn yaara cɛnlɛ na fanŋga woro li ni,
ɛɛn fɔ pe ma pe yaakara ti wulo mari gbogolo yarilire kɔnsanga ni.
26 Yan yaara nda pe yinri damaye†30.26: Dama wi yɛn ma yiri polo kɔrɔgɔ., pe yɛn yaara cɛnlɛ na fanŋga woro li ni,
ɛɛn fɔ pe ma saa pe sinlɛsara ti gbegele wa waliwere ti sɔgɔwɔ.
27 Wunluwɔ woro kambɛɛrɛ ti go na,
ɛɛn fɔ ti maa yinrigi ŋgbeleye ŋgbeleye na kee na yala.
28 Lere mbe ya faramandana li yigi kɛɛ,
ɛɛn fɔ li ma ye wa wunlumbolo pe wunluwɔ yinrɛ ti ni.
29 Yaara yɛnwere taanri wa, nda ti tangala lɔmɔ pi yɛn ma yɔn,
ti yɛrɛ yɛn yaara yɛnwere tijɛrɛ, nda ti karilɔmɔ pi yɛn ma yɔn.
30 Jara we, wo ŋa wi yɛn kotogo ni ma wɛ woŋgaala pe ni fuun pe na,
wila sɔngɔrɔ puŋgo yaraga ka kpɛ yɛgɛ.
31 Ŋgopɔlɔ we, wo ŋa wi ma yiri ma yere wi tɔɔrɔ ti na konaa sikapɔlɔ†30.31: Sikapɔlɔ ŋa sɛnrɛ tì yo wi ma pye ma yagara ma tɔnlɔ, wi tangala lɔmɔ pi si yɛn ma yɔn. wi ni;
naa wunlunaŋa ŋa wi ma keli maliŋgbɔɔnlɔ pe yɛgɛ na tanri.
32 Na kaa pye kambajɛnmɛ pì toro ma ni, fɔ a mɔ̀ɔ yɛɛ gbɔgɔ,
nakoma na kaa pye mà jatere pee pye,
koni ma daga mbɔɔn yɔn ki tɔn mbe pyeri;
33 katugu na maga nɔnɔ ŋa wì tanga wi gbɔn, wi ma yiri nɔnɔ nara;
na maga ma numala li tɛrɛ, li ma kasanwa yiri;
na maga naŋgbanwa kala pye, ma ma maara kɔn.
†30:19 30.19: Ŋga kì yo fɔ: Konaa naŋa wi torokonɔ mbe kari wa sumboro wi yeri pele maa ki jate ma yo ki sɛnrɛ ti kɔrɔ wi mbe ya logo fun fɔ naŋa naa jɛlɛ pe ma pe yɛɛ ndanla yɛgɛ ŋga na mbe sa gbɔn pe yɛɛ na.
†30:20 30.20: Wi ma li mboo yɔn ki turugo, ko kɔrɔ wo yɛn fɔ na wi ka saa naŋgala li pye mbe kɔ, wi ma saa woli jaŋgo lere ka kaga jɛn.
†30:26 30.26: Dama wi yɛn ma yiri polo kɔrɔgɔ.
†30:31 30.31: Sikapɔlɔ ŋa sɛnrɛ tì yo wi ma pye ma yagara ma tɔnlɔ, wi tangala lɔmɔ pi si yɛn ma yɔn.