2 Yawe Yɛnŋɛlɛ, wunlunaŋa wi yɛn na yɔgɔri ma fanŋga ko kala na.

Naa màa shɔ ki kala na, wi yɛn ma yin nayinmɛ ni.

3 Ŋga wìla pye na jaa wa wi nawa, màga kan wi yeri,

ŋga wìla pye na yɛnri ma yeri, ma sila je ki na.

4 Màa pan wi kɔrɔgɔ mbe duwaw jɛnŋɛ lɛgɛrɛ tirige wi na;

mà tɛ piiri wunluwɔ njala kan wi kan.

5 Wìla ma yɛnri yinwege ki ni, a màga kan wi yeri,

mà yinwetɔnlɔgɔ kan wi yeri sanga pyew fɔ tetete.

6 Naa màa shɔ ki kala na, wi gbɔgɔwɔ gbembe ta;

màa fere gbɔgɔwɔ naa tiyɔnwɔ pi ni.

7 Màa pye duwaw pyɔ fɔ sanga pyew;

mà nayinmɛ kan wi yeri ma yɛɛ yɛgɛ sɔgɔwɔ.

8 Ee, wunlunaŋa wùu jigi wi taga Yawe Yɛnŋɛlɛ li na;

Yɛnŋɛlɛ na yaara ti ni fuun ti go na li kagbaraga ki kala na, yaraga ko ka se wunlunaŋa wi ta.

9 E, wunlunaŋa, ma yaa kɔɔn juguye pe ni fuun pe yigi ma kɛɛ ki ni;

ma fanŋga kɛɛ ki yaa kɔɔn panrafɛnnɛ pe yigi.

10 Na maga kɔɔn yɛɛ naga, ma yaa ka pe sogo kasɔn ni paa yira kasɔn yɛn.

Wa Yawe Yɛnŋɛlɛ li naŋgbanwa gbɔɔ pi ni, li yaa ka pe jɔgɔ,

kasɔn ki yaa ka pe sogo mbe pe kɔ.

11 Ma yaa ka pe setirige piile pe kɔ mbe pe wɔ laga tara ti ni,

ma yaa ka pe cɛnlɛ li kɔ mbeli wɔ sɛnwee piile pe sɔgɔwɔ.

12 Na paga tipege jate ma ni,

na paga yɔn le ma na,

pe se ya yaraga ko ka kpɛ pye ma na,

13 katugu ma yaa ka pe wɔn ma wangala ke ni,

pe yaa ka fe ma yɛgɛ.

14 Yawe Yɛnŋɛlɛ, yiri mɔɔ fanŋga ki naga!

Woro wo na, we yaa kaa yuuro koo mbaa ma sɔnni ma yawa pi kala na.