34
Yɛnŋɛlɛ lìlan shɔ na fyɛrɛ kagala
ke ni fuun ke ni
ke ni fuun ke ni
1 Davidi Yɛnŋɛlɛ gbɔgɔyurugo. Davidi wìla wi yɛɛ pye paa yarafɔ yɛn wunlunaŋa Abimelɛki wi yɛgɛ sɔgɔwɔ. Naa wo la kaa wi purɔ maa yirige wa wi yɛɛ yeri, a Davidi wì sigi yurugo ŋga ki yɔnlɔgɔ†34.1: Ki kagala ŋgele pa ke yɛn wa 1 Sami 21.11-16laga ki ni. Wunlunaŋa Abimelɛki wo nuŋgba wo pàa pye na yinri Akishi, Filisiti tara fɛnnɛ wunlunaŋa we. Ki yaa pye pe sege kìla pye wunluwɔ tulugo..
2 Mi yaa la Yawe Yɛnŋɛlɛ li shari wagati wi ni fuun ni,
mi yaa la li sɔnni sanga wi ni fuun ni wa na yɔn†34.2: Ki yurugo ŋga ki vɛrise nuŋgba nuŋgba pyew wì lɛ Eburuye sɛnrɛ ti sɛnpiile mbele pe ma tɛgɛ nari yɔnlɔgi wo wa ni, maga lɛ wi sɛnpyɔ koŋgbanŋa wi na, wo ŋa pe yinri alɛfu fɔ ma saa gbɔn wi puŋgo woo wi na, wo ŋa pe yinri tavu..
3 Na nayinmɛ pi go koyi ŋga Yawe Yɛnŋɛlɛ le;
yoro mbele yè ye yɛɛ tirige, ye logo na yeri, ye ta yaa yɔgɔri!
4 Ye pan we pinlɛ waa ki yari fɔ Yawe Yɛnŋɛlɛ lì gbɔgɔ,
we pinlɛ waa li mɛgɛ ki gbogo!
5 Mìla Yawe Yɛnŋɛlɛ li yeri, a lìlan yɔn sogo,
làa na shɔ na fyɛrɛ kagala ke ni fuun ke ni.
6 Mbele pe maa wele li yeri, nayinmɛ maa yaan wa pe yɛgɛ ki na;
fɛrɛ se ka pe yigi.
7 Na fyɔnwɔ fɔ wi kaa gbele mbaa sagawa jaa, Yawe Yɛnŋɛlɛ li maga logo;
li maa shɔ wi jɔlɔgɔ kagala ke ni fuun ke kɛɛ.
8 Mbele pe maa fyɛ Yɛnŋɛlɛ li yɛgɛ, Yawe Yɛnŋɛlɛ li mɛrɛgɛ†34.8: Ŋga kì yo fɔ: Yawe Yɛnŋɛlɛ li mɛrɛgɛ, Yɛnŋɛlɛ lo jate lo laa li yɛɛ naga paa mɛrɛgɛ yɛn (Zhenɛ 16.7). wi maa wele pe na,
ma pe shɔ kaŋgbanga ki ni.
9 Ye pan yege nɛnɛ ye wele, yege jɛn yɛgɛ ŋga na Yawe Yɛnŋɛlɛ li yɛn ma yɔn;
lere ŋa wi maa yɛɛ karafa li na, fɛrɛwɛ yɛn wi woo!
10 Yoro mbele ye yɛn Yawe Yɛnŋɛlɛ li leele kpoyi, yaa fyɛ li yɛgɛ;
katugu mbele pe maa fyɛ li yɛgɛ, yaraga ko ka se pe la.
11 Ali yɛrɛ jara yirifɔnmbɔlɔ pe ma kaa na jɔlɔ yaakara lama konaa fuŋgo ki kɛɛ;
ɛɛn fɔ mbele pe maa Yawe Yɛnŋɛlɛ li lagajaa, poro na jori yarijɛŋgɛ ko ka kpɛ na.
12 Yaa paan na piile, ye pan ye logo na yeri;
mi yaa ye naga yɛgɛ ŋga na ye daga mbaa fyɛ Yawe Yɛnŋɛlɛ li yɛgɛ.
13 Yinwege ki yɛn ma ambɔ ndanla?
Ambɔ wila jaa mbe pye fɛrɛwɛ na wi yinwege ki ni?
14 Ki fɔ wuu yɛɛ yigi sɛnpere yogo ki ni;
wuu yɔn ki yigi yagbogowo sɛnyogo ki ni.
15 Ki fɔ wuu yɛɛ laga lali kapege ki ni, wila kajɛŋgɛ piin,
wila yɛyinŋge ki lagajaa wi mara ki na.
16 Yawe Yɛnŋɛlɛ li yɛgɛ yɛn lesinmbele pe na,
li nuŋgbolo yɛn pe gbeere ti na.
17 Yawe Yɛnŋɛlɛ li ma yiri kapege pyefɛnnɛ pe kɔrɔgɔ,
jaŋgo mbe pe tɔngɔ mbe pe mɛgɛ ki kɔ mbege wɔ laga tara ti ni.
18 Na lesinmbele pe kaa gbele mbaa sagafɔ jaa, Yawe Yɛnŋɛlɛ li maga logo,
mbe pe shɔ mbe pe wɔ wa pe jɔlɔgɔ ki ni.
19 Yawe Yɛnŋɛlɛ li ma pye mbele pe nawa pì tanga pe na pe tanla,
li ma mbele pe jatere wì piri pe na pe shɔ.
20 Jɔlɔgɔ lɛgɛrɛ mbe ya gbɔn lesinŋɛ wi na,
ɛɛn fɔ Yawe Yɛnŋɛlɛ li maa wi shoo ki ni fuun ki ni.
21 Li maa wi witige lara ti ni fuun ti kɔrɔsi,
pe se ka wi kajelege ka kpɛ kaw†34.21: Ki sɛnrɛ nda tì yo Zhezu Kirisi wi wogo na wa (Ɛki 12.46; Nɔmbu 9.12; Zhan 19.36) lara ti ni..
22 Tipewe po pi ma kaa lepee wi gbo,
mbele pe ma lesinŋɛ wi panra, pe yaa ka pe le jɔlɔgɔ.
23 Yawe Yɛnŋɛlɛ li maa li tunmbyeele pe go shoo,
mbele pe ma pe yɛɛ karafa li na, wo wa kpɛ se ka ye jɔlɔgɔ.
†34:1 34.1: Ki kagala ŋgele pa ke yɛn wa 1 Sami 21.11-16laga ki ni. Wunlunaŋa Abimelɛki wo nuŋgba wo pàa pye na yinri Akishi, Filisiti tara fɛnnɛ wunlunaŋa we. Ki yaa pye pe sege kìla pye wunluwɔ tulugo.
†34:2 34.2: Ki yurugo ŋga ki vɛrise nuŋgba nuŋgba pyew wì lɛ Eburuye sɛnrɛ ti sɛnpiile mbele pe ma tɛgɛ nari yɔnlɔgi wo wa ni, maga lɛ wi sɛnpyɔ koŋgbanŋa wi na, wo ŋa pe yinri alɛfu fɔ ma saa gbɔn wi puŋgo woo wi na, wo ŋa pe yinri tavu.
†34:8 34.8: Ŋga kì yo fɔ: Yawe Yɛnŋɛlɛ li mɛrɛgɛ, Yɛnŋɛlɛ lo jate lo laa li yɛɛ naga paa mɛrɛgɛ yɛn (Zhenɛ 16.7).
†34:21 34.21: Ki sɛnrɛ nda tì yo Zhezu Kirisi wi wogo na wa (Ɛki 12.46; Nɔmbu 9.12; Zhan 19.36) lara ti ni.