61
Mila jaa mbe koro
wa Yɛnŋɛlɛ li go ki ni suyi
wa Yɛnŋɛlɛ li go ki ni suyi
1 Yurukɔɔlɔ to wi sɛwɛ yurugo, ŋga pe maa koo na ŋgɔni gbɔɔn. Davidi Yɛnŋɛlɛ gbɔgɔyurugo.
2 E, Yɛnŋɛlɛ, na gbelege ki logo,
nuŋgbolo jan mala yɛnrɛgɛ ki logo!
3 Mbanla ta wa tara ti kɔsaga ki na, mi yɛn na gbele nɔɔ yinri,
katugu na jigi wì kɔn na na.
Walaga ŋga ki yɛn ma yagara ma pye mi se ya gbɔn ki na,
na luguro wa ki na, maa wele na na;
4 katugu mboro ma yɛn na larasaga ye,
ma yɛn paa malaga sigesanŋgazo yɛn mbanla shɔ na juguye pe yeri!
5 Mila jaa mbe koro wa ma go ki ni fɔ sanga pyew,
mbanla yɛɛ lara wa ma kanwira ti nɔgɔ.
Wɔnmatigiwɛn laga.
6 Katugu Yɛnŋɛlɛ, yɔn fɔgɔlɔ ŋgele mì lɛ ma yeri kagala ŋgele fuun na, mà ke pye ma ke yɔn fili;
mbele pe maa fyɛ ma yɛgɛ, kɔrɔgɔ ŋga mà tɛgɛ pe kan, ma yaa ki kan na yeri.
7 Ki yaga ma ka taga wunlunaŋa wi yinwege piliye yi na,
wi yinwetɔnlɔgɔ ta fɔ jɛŋgɛ!
8 Ki yaga wi koro wa wunluwɔ pi na mboro ŋa Yɛnŋɛlɛ ma yɛgɛ sɔgɔwɔ fɔ sanga pyew!
Ma ti ma kagbaraga konaa ma yɛn sinŋɛ yɛgɛ ŋga na tila wi kɔrɔsi!
9 Pa kona mi yaa la yuuro koo mbaa ma sɔnni sanga pyew,
yɔn fɔgɔlɔ ŋgele mì kɔn ma yeri, mi yaa la ke tɔnni mbaa ke yɔn fili pilige pyew.