68
Mbe yurugo kɔ
mbe Yɛnŋɛlɛ na cew tafɔ li sɔn
mbe Yɛnŋɛlɛ na cew tafɔ li sɔn
1 Yurukɔɔlɔ to wi sɛwɛ yurugo. Davidi Yɛnŋɛlɛ gbɔgɔyurugo. Yurugo.
2 Yɛnŋɛlɛ lì yiri, a li juguye pè gbɔn ma jaraga,
mbele pèli panra, pè fe li yɛgɛ.
3 Yɛgɛ ŋga na wirige ki ma jaraga ma kɔ saw, pa li ma pe jaraga pe ma kɔ ma;
yɛgɛ ŋga na kasɔn ma sɛnriŋguro yan,
pa lepeele pe yaa ka tɔngɔ mbe wɔ wa Yɛnŋɛlɛ li yɛgɛ sɔgɔwɔ ma.
4 Ɛɛn fɔ, lesinmbele pe yaa kaa yɔgɔri,
pe yaa kaa nayinmɛ nii jɛŋgɛ Yɛnŋɛlɛ li yɛgɛ sɔgɔwɔ,
pe yaa ka yin nayinmɛ ni fɔ jɛŋgɛ.
5 Yaa yuuro koo Yɛnŋɛlɛ li kan, yaa Yɛnŋɛlɛ gbɔgɔyuuro koo, yeli mɛgɛ ki gbɔgɔ;
yeli fili yeli gbɔgɔ, lo na li ma kambaara ti pye paa li malaga gbɔnwotoro yɛn na paan ti na!
Li mɛgɛ koyi ŋga Yawe Yɛnŋɛlɛ, yaa yɔgɔri li yɛgɛ sɔgɔwɔ!
6 Lo li yɛn pijiriwele pe to we, konaa li ma yere naŋgunjaala pe ni kiti kɔngɔ na.
Yɛnŋɛlɛ pa li yɛn ma, mbeli ta wa li cɛnsaga kpoyi ki ni.
7 Leele mbele pè koro pe nuŋgba nuŋgba, Yɛnŋɛlɛ lì pe pye leele fɛnnɛ,
lo li ma kasopiile pe yirige, mbe pe yaga yɛyinŋge na, mbe nayinmɛ kan pe yeri.
Ɛɛn fɔ mbele pè yiri ma je li na, poro pe yaa ka cɛn wa tara lara nda tì waga ti ni.
8 E, Yɛnŋɛlɛ, naa màa yiri ma keli ma woolo pe yɛgɛ sanga ŋa ni,
naa màa kari wa gbinri wi ni sanga ŋa ni,
Wɔnmatigiwɛn laga
9 tara tìla yɛgɛ, a naayeri wì tisaga ki yaga kì pan;
ko la pye Yɛnŋɛlɛ li yɛgɛ sɔgɔwɔ, Yɛnŋɛlɛ na lìli yɛɛ naga wa Sinayi yanwiga ki na we;
ko la pye Yɛnŋɛlɛ li yɛgɛ sɔgɔwɔ, Izirayɛli woolo Yɛnŋɛlɛ le†68.9: Ɛki 19.18.
10 E, Yɛnŋɛlɛ, mà tisagbaraga ki kan we yeri jɛŋgɛ,
ma tara tìla waga, a mà yinmɛ tirige ti na.
11 Pa ma woolo pè cɛn wa ki laga ki na.
E, Yɛnŋɛlɛ, ma kajɛŋgɛ ki kala na, màga laga ki gbɛgɛlɛ mbele pe yɛn tege na pe kan.
12 We Fɔ wì para,
jɛɛlɛ mbele ki sɛntanra ti yarifɛnnɛ, pè pan ma pye janwa gbɔlɔ.
13 Juguye pe maliŋgbɔɔnlɔ ŋgbeleye naa pe wunlumbolo pe yɛn na fee, pe yɔngɔlɔ kè wege;
jɛɛlɛ mbele pè koro wa yinrɛ ti ni, pe yɛn na juguye pe kɛɛ yaara ti yɛɛlɛ pe yɛɛ na.
14 Ali ye ni, yoro mbele yè koro ma sinlɛ wa simbaŋgbondo ti sɔgɔwɔ,
jɛndɛtuwaye yanlɛɛlɛ yɛn wa, mbele pè warifuwe wo pe kanwira ti na mari tɔn,
ma tɛ piiri wo pe kanwira sire ti na mari tɔn†68.14: Ki jɛndɛtuwaye yanlɛɛlɛ pe mbe ya pye Izirayɛli woolo pe juguye pe kɛɛ yaara nda pè shɔ pe yeri to ta. Ki yaa pye ndɛɛ ki laga ŋga ki yɛn na para malaga ka sɛnrɛ na, ŋga Yɛnŋɛlɛ làa cew kan li woolo pe yeri pe juguye pe na, a jɛɛlɛ pè juguye pe kɛɛ yaara ti yɛɛlɛ pe yɛɛ na. Ki malaga ki sɛnrɛ ti woro ma yɔnlɔgɔ wa Bibulu wi ni..
15 Sanga ŋa ni Yɛnŋɛlɛ na yawa pi ni fuun fɔ làa wunlumbolo pe gbɔn ma pe jaraga,
kìla cɛn ndɛɛ fɔɔngɔ kila wuun wa Zalimɔ yanwiga ki na.
16 Yɛnŋɛlɛ li yanwiga ye, Bazan tara yanwiga ye,
yanwiga ŋga ki yinrɛ ti yɛn ma lɛgɛ, Basan tara yanwiga ye.
17 Yɛnŋɛlɛ lì yanwiga ŋga wɔ mbege pye li cɛnsaga,
yiŋgi na yoro yanwira nda ye yinrɛ ti yɛn ma lɛgɛ, kì si yenjaga yirige ye ni?
Yawe Yɛnŋɛlɛ li yaa ki pye li cɛnsaga fɔ sanga pyew.
18 Yɛnŋɛlɛ li malaga gbɔnwotoroye pe yɛn wagaye yɔn lɛgɛrɛ,
pe yɛn wagaye yɔn lɛgɛrɛ lɛgɛrɛ.
Yawe Yɛnŋɛlɛ lì pan pe ni, ma yiri wa Sinayi yanwiga ki na, ma ye wa li lajɛŋgɛ kpoyi ki ni.
19 Mà lugu ma kari wa naayeri,
mà pele yigi kasopiile ma kari pe ni.
Mà yarikanra shɔ leele pe yeri, ali leele mbele pè yiri ma je pe yeri†68.19: Efɛ 4.8;
jaŋgo mboro ŋa Yawe Yɛnŋɛlɛ, ma ki Siyɔn yanwiga ki pye ma cɛnsaga.
20 Ki daga waa Yawe Yɛnŋɛlɛ li shari pilige pyew!
Lo li yɛn ma yere we go kala li ni,
we shɔfɔ Yɛnŋɛlɛ loli.
Wɔnmatigiwɛn laga.
21 Ko Yɛnŋɛlɛ lo li yɛn we Yɛnŋɛlɛ, na we shoo;
Yawe Yɛnŋɛlɛ, we Fɔ we, pyelɔmɔ yɛn wi yeri mbe we shɔ kunwɔ pi kɛɛ.
22 Ɛɛn fɔ Yɛnŋɛlɛ li yaa kali juguye pe yinrɛ ti yaari;
mbele pè koro na kapere ti piin na kee yɛgɛ, li yaa ka pe yinrɛ ti yaari mbe pinlɛ pe yinzire ti ni.
23 We Fɔ wì yo fɔ: «Mi yaa sɔngɔrɔ mbe pan ye juguye pe ni, mbe yiri wa Bazan yanwiga ki na;
mi yaa sɔngɔrɔ mbe pan pe ni, mbe yiri fɔ wa kɔgɔje wi nɔgɔ;
24 jaŋgo ye ye tɔɔrɔ ti jogo wa pe kasanwa pi ni,
ye pyɔɔnlɔ pe pe tasaga ta wa ye juguye pe kasanwa pi ni poo laala.»
25 E, Yɛnŋɛlɛ, pɔ̀ɔn cew tawa tangala li yan ma woolo pe ni,
ma tangala lɔmɔ pòo yan ma ye wa laga kpoyi ki ni, mboro ŋa na Yɛnŋɛlɛ naa na wunluwɔ.
26 Yurukɔɔlɔ poro pàa keli yɛgɛ, a yarigbɔnrɔ fɛnnɛ pè si taga pe na;
sumborombiile poro la pye wa nandogomɔ na pimbigile gbɔɔn.
27 Yaa Yɛnŋɛlɛ li shari wa janwa wi gbogolosara ti ni!
Yaa Yawe Yɛnŋɛlɛ li shari, yoro mbele yè yiri wa Izirayɛli setirige ki ni.
28 Bɛnzhamɛ ŋa wi yɛn pe pe ni fuun jɔnlɔ, wi cɛnlɛ woolo poro pe yɛn koŋgbanmbala wele;
a Zhuda cɛnlɛ woolo teele pè si taga, naa pe maliŋgbɔɔnlɔ ŋgbelege ki ni,
naa Zabulɔn cɛnlɛ woolo teele pe ni konaa Nɛfitali cɛnlɛ woolo teele pe ni.
29 Ma Yɛnŋɛlɛ lìgi konɔ kan ma yo ma fanŋga ta†68.29: Ŋga kì yo fɔ: Ma Yɛnŋɛlɛ lìgi konɔ kan ma yo ma fanŋga ta, wa Yɛnŋɛlɛ sɛnrɛ sɛwɛlɛɛlɛ mbele pe yɛn Girɛki sɛnrɛ ni konaa ŋa pe yinri Siriyaki wi ni, ki yɛn ma yɔnlɔgɔ ma yo fɔ: E, Yɛnŋɛlɛ, ma yawa pi naga..
E, Yɛnŋɛlɛ ŋga mà pye we kan, yeresaga kan ki yeri!
30 Mbɔɔn ta wa ma shɛrigo gbɔgɔ ki ni, ko ŋga kì yiri Zheruzalɛmu ca ki go na,
wunlumbolo pe yaa kaa paan yarikanra ni wa ma kan.
31 Sɛnŋgbanra yo Ezhipiti tara ti na, to nda ti yɛn paa wojɔn yɛn wa gbagara wi sɔgɔwɔ;
sɛnŋgbanra yo cɛngɛlɛ ke na, koro ŋgele ke yɛn paa napɛnɛ ŋgbelege yɛn mbe pinlɛ ki napire ti ni.
Poro mbele pe ma pan na kanŋguuro kanni na warifuwe kaan ma yeri;
malaga ki yɛn ma cɛngɛlɛ ŋgele ndanla, ma ke purɔ ma ke jaraga!
32 Legbɔɔlɔ†68.32: Ŋga kì yo fɔ legbɔɔlɔ, ki sɛnrɛ ti woro ma filige Eburuye sɛnrɛ ti ni. yiri wa Ezhipiti tara na paan;
Etiyopi tara fɛnnɛ pè pe kɛyɛn yi yirige fyɛlɛgɛ na wa Yɛnŋɛlɛ li yeri mbeli yɛnri.
33 Dunruya wunluwɔ pyew yaa yuuro koo Yawe Yɛnŋɛlɛ li kan;
yaa Yɛnŋɛlɛ gbɔgɔyuuro koo we Fɔ wi kan.
Wɔnmatigiwɛn laga.
34 Lì lugu naayeri wi na paa shɔn yɛn, naayeri ŋa wì da maga lɛ wa fafafa;
ye wele, li yɛn nali magala li yinrigi, li yɛn nali magala na yawa wolo li yinrigi.
35 Yege jɛn ye yo fɔ yawa pi yɛn Yɛnŋɛlɛ lo yeri,
li tegere ti yɛn Izirayɛli woolo pe go na,
li yawa pi yɛn naayeri wi lagapyew.
36 E, Yɛnŋɛlɛ, ma yɛn fyɛrɛ ni, mbɔɔn ta wa ma cɛnsaga kpoyi ki ni!
Izirayɛli woolo Yɛnŋɛlɛ lo li ma fanŋga naa yawa kan poro mbele li woolo pe yeri.
Sɔnmɔ yɛn Yɛnŋɛlɛ li woo!
†68:9 68.9: Ɛki 19.18
†68:14 68.14: Ki jɛndɛtuwaye yanlɛɛlɛ pe mbe ya pye Izirayɛli woolo pe juguye pe kɛɛ yaara nda pè shɔ pe yeri to ta. Ki yaa pye ndɛɛ ki laga ŋga ki yɛn na para malaga ka sɛnrɛ na, ŋga Yɛnŋɛlɛ làa cew kan li woolo pe yeri pe juguye pe na, a jɛɛlɛ pè juguye pe kɛɛ yaara ti yɛɛlɛ pe yɛɛ na. Ki malaga ki sɛnrɛ ti woro ma yɔnlɔgɔ wa Bibulu wi ni.
†68:19 68.19: Efɛ 4.8
†68:29 68.29: Ŋga kì yo fɔ: Ma Yɛnŋɛlɛ lìgi konɔ kan ma yo ma fanŋga ta, wa Yɛnŋɛlɛ sɛnrɛ sɛwɛlɛɛlɛ mbele pe yɛn Girɛki sɛnrɛ ni konaa ŋa pe yinri Siriyaki wi ni, ki yɛn ma yɔnlɔgɔ ma yo fɔ: E, Yɛnŋɛlɛ, ma yawa pi naga.
†68:32 68.32: Ŋga kì yo fɔ legbɔɔlɔ, ki sɛnrɛ ti woro ma filige Eburuye sɛnrɛ ti ni.