74
Yɛnŋɛlɛ, yiŋgi na, a mà si juguye
pe yaga pè shɛrigo gbɔgɔ ki tɔngɔ
pe yaga pè shɛrigo gbɔgɔ ki tɔngɔ
1 Asafu†74.1: 50.1; 73.1 nagawa yurugo.
E, Yɛnŋɛlɛ, yiŋgi na, a ma si we wa pew?
Woro mbele we yɛn ma simbaŋgbelege ŋga ma maa kɔnri,
yiŋgi na, a ma si nawa ŋgban we ni?
2 Ki yaga ma jatere pye ma gbogolomɔ woolo pe na,
poro mbele màa wɔ ma yɛɛ kan maga lɛ wa fafafa!
Ki cɛnlɛ na li yɛn ma woolo, a mà pe go shɔ, jatere pye pe na;
jatere pye Siyɔn yanwiga ŋga ki yɛn ma cɛnsaga ki na!
3 Kari ma sa jɔgɔwɔ mba pì pye, a kì mɔ pi wele;
we juguye pè yaraga pyew ki jɔgɔ wa ma laga kpoyi ki ni.
4 Ma winfɛnnɛ pè cew tawa kɔnnɔ wa wa laga ŋga leele pe maa finli ma ni ki ni yɛrɛ,
pè pe dirapoye pe pɔ wa, mbege naga fɔ pè cew ta.
5 Pè pe yɛɛ naga paa tire janfɛnnɛ yɛn,
mbele pè pe gbɔɔnrɔ ti yirige tire ti na wa kɔlɔgɔ ki ni.
6 Yaara yanlɛrɛ nda tìla pye ma shɛrigo gbɔgɔ ki nawa pi fere,
pèri gbɔn mari yaari gbɔɔnrɔ naa maritoye pe ni.
7 Pè kasɔn le ma cɛnsaga kpoyi ki ni maga sogo;
ma mɛgɛ ki yɛn go ŋga na, pège jan maga tɛgɛ fyɔngɔ ni.
8 Pàa pye naga yuun wa pe yɛɛ nawa fɔ: «We yaa pe ni fuun pe pinlɛ mbe pe tɔngɔ pew.»
Yɛnŋɛlɛ gbɔgɔsara nda fuun ti yɛn wa tara ti ni, pè ti ni fuun ti sogo.
9 We woro nɔɔ kacɛn kagala ke yaan naa,
Yɛnŋɛlɛ yɔn sɛnrɛ yofɔ woro wa naa,
lere kpɛ woro we ni, ŋa wi yɛn ma ki kala na li kɔsanga wi jɛn.
10 E, Yɛnŋɛlɛ, we winfɛnnɛ pe yaa lɔɔn tegele fɔ sa gbɔn wagati wiwiin?
Naga yɛn ma, pa we jugu wi yaa koro mbaa ma tifaga yɛɛn wi le?
11 Yiŋgi na, ma si woro na kala la piin mbe we saga?
Ma kɛɛ ki yirige ma pe tɔngɔ!
12 E, Yɛnŋɛlɛ, mboro ma yɛn na wunlunaŋa maga lɛ wa fafafa;
mboro ma maa leele pe shoo tara ti lagapyew ki ni.
13 Mboro màa kɔgɔje tɔnmɔ pi kɔn shyɛn ma yawa pi fanŋga na;
mboro màa yarifɛlɛyɛ yi yinrɛ ti yaari wa tɔnmɔ pi ni.
14 Mboro màa yarifɛlɛgɛ Leviyatan†74.14: Leviyatan, yarifɛlɛgɛ tipege kayi, ŋga pàa pye na para ki sɛnrɛ na muŋgooro ni faa wa Izirayɛli tara kɛɛ ki yeri. Kìla pye ma taanla tipege fanŋga ko ni. Pàa pye naga jate yanyaraga cinjannji kayi, ŋga yinrɛ kɔlɔshyɛn la pye ki na, nakoma naga jate paa wɔɔgɔ nakoma wojɔn yɛn. ki yinrɛ ti yaari,
mɛɛ ki kara ti kan yanyaara ti yeri yaakara wa gbinri wi ni.
15 Mboro mà puluyo naa laforo ti yɔn yɛngɛ, a tila fuun,
gbaanla mbele pe tɔnmɔ pila waga, mà ti a pè waga.
16 Yɔnlɔ ki yɛn ma wogo, yembinɛ li yɛn ma wolo;
mboro mà yɔnlɔ naa yeŋge ki da.
17 Mboro mà tara ti kɔngɔlɔ ke ni fuun ke gbɔn,
mboro mà kanga naa yɔnrɔ ti tɛgɛ.
18 Ma jatere wi tɛgɛ ki wogo ŋga ki na Yawe Yɛnŋɛlɛ, fɔ we juguye pe yɛn nɔɔ tegele,
cɛnlɛ na li woolo pe yɛn tijinliwɛ fu fɛnnɛ pe yɛn nɔɔ tifaga.
19 Ma woolo poro mbele pe yɛn kagbɔgɔ yɔn ma yeri, maga ka pe go pɛrɛ yan cɛnrɛ ti yeri†74.19: Ŋga kì yo fɔ: Ma woolo mbele pe yɛn kagbɔgɔ yɔn ma yeri, Eburuye sɛnrɛ ti ni, ki yɛn ma yɔnlɔgɔ ma yo fɔ: Ma jɛndɛtuwa. Izirayɛli woolo poro pe yɛn ma taanla jɛndɛtuwa wi ni, poro pe yɛn Yɛnŋɛlɛ li jɛndɛtuwa ŋa wi kala li yɛn ma ŋgban li ni.;
ma woolo mbele pe yɛn tege na, maga ka fɛgɛ pe na fɔ sanga pyew!
20 Ta jatere piin yɔn finliwɛ mba mà le pe ni pi na;
katugu lewɛlimbɛlɛ pe yɛn na lewɛlɛwɛ kapyere piin tara ti lologoŋgolo ke ni fuun ke ni.
21 Maga ka ti lere ŋa wi yɛn tege na, wi sɔngɔrɔ wi kari fɛrɛ ni;
Ma ti mbele pe yɛn yuŋgbɔgɔrɔ ni konaa fyɔnwɔ fɛnnɛ pe ni paa ma sɔnni!
22 E, Yɛnŋɛlɛ, yiri ma yere ma yɛɛ ni,
ma jatere wi tɛgɛ ki na fɔ tijinliwɛ fu fɛnnɛ pe yɛn nɔɔ tegele pilige nuŋgba nuŋgba pyew.
23 Kɔŋgɔlɔ ŋgele ma winfɛnnɛ paa waa, maga ka fɛgɛ ke na;
mbele pè yiri ma kɔrɔgɔ pe yɛn na tinmɛ gbɔɔ mba tinni suyi, maga ka fɛgɛ pi na!
†74:1 74.1: 50.1; 73.1
†74:14 74.14: Leviyatan, yarifɛlɛgɛ tipege kayi, ŋga pàa pye na para ki sɛnrɛ na muŋgooro ni faa wa Izirayɛli tara kɛɛ ki yeri. Kìla pye ma taanla tipege fanŋga ko ni. Pàa pye naga jate yanyaraga cinjannji kayi, ŋga yinrɛ kɔlɔshyɛn la pye ki na, nakoma naga jate paa wɔɔgɔ nakoma wojɔn yɛn.
†74:19 74.19: Ŋga kì yo fɔ: Ma woolo mbele pe yɛn kagbɔgɔ yɔn ma yeri, Eburuye sɛnrɛ ti ni, ki yɛn ma yɔnlɔgɔ ma yo fɔ: Ma jɛndɛtuwa. Izirayɛli woolo poro pe yɛn ma taanla jɛndɛtuwa wi ni, poro pe yɛn Yɛnŋɛlɛ li jɛndɛtuwa ŋa wi kala li yɛn ma ŋgban li ni.