89
We Fɔ, yɔn fɔgɔlɔ ŋgele mà kɔn
wunlunaŋa Davidi wi yeri,
ke koro se yeri?
wunlunaŋa Davidi wi yeri,
ke koro se yeri?
1 Ezirahi setirige pyɔ Etan wi nagawa yurugo†89.1: 1 Wunlu 5.11.
2 Mi yaa la Yawe Yɛnŋɛlɛ li kagbaraga ki koo yurugo ni sanga pyew,
mà yɛn sɛnrɛ nuŋgba yofɔ yɛgɛ ŋga na, mi yaa laga yari sanga pyew fɔ tetete.
3 Mi yɛn naga yuun fɔ ma kagbaraga ki yɛn wa fɔ sanga pyew,
ma yɛn sɛnrɛ nuŋgba yofɔ yɛgɛ ŋga na, mà yeresaga kan ki yeri wa yɛnŋɛlɛ na.
4 We Fɔ, màa ki yo ma yo fɔ: «Mì yɔn finliwɛ le na tunmbyee Davidi ŋa mì wɔ wi ni,
mìla wugu maa kan ma yo fɔ:
5 ‹Mi yaa yeresaga kan ma setirige piile pe yeri fɔ sanga pyew,
mi yaa yeresaga kan ma wunluwɔ pi yeri sanga pyew fɔ tetete†89.4-5: 2 Sami 7.12-16; 1 Kuro 17.11; Yuuro 132.11; Kapye 2.30.› »
Wɔnmatigiwɛn laga.
6 Yawe Yɛnŋɛlɛ, naayeri wo naa wi nawa yaara ti ni ti yɛn nɔɔ sɔnni ma kagbɔgɔlɔ ke kala na,
ma yɛn sɛnrɛ nuŋgba yofɔ yɛgɛ ŋga na, mbele pe yɛn kpoyi†89.6: Ŋga kì yo fɔ mbele pe yɛn kpoyi ko yɛn na para mɛrɛgɛye poro sɛnrɛ na. pe yaa laga wogo ki yari.
7 Yawe Yɛnŋɛlɛ, ambɔ wi yɛn wa naayeri, ŋa wi mbe ya mboo yɛɛ taanla ma ni?
Yɛngɛŋgɛlɛ ke ni, liliin li yɛn wa paa mboro yɛn Yawe Yɛnŋɛlɛ?
8 Yɛnŋɛlɛ li yɛn fyɛrɛ yaraga wa mbele pe yɛn kpoyi pe gbogolomɔ pi sɔgɔwɔ,
li yɛn fyɛrɛ ni ma wɛ mbele fuun pe yɛn mali maga pe na.
9 Yawe Yɛnŋɛlɛ, Yɛnŋɛlɛ na yawa pi ni fuun fɔ, yawa yɛn ambɔ ni paa mboro yɛn, Yawe Yɛnŋɛlɛ?
Ma yɛn sɛnrɛ nuŋgba yofɔ mɔɔ yɛɛ maga kɛɛ ki ni fuun na.
10 Kɔgɔje wi ka yiri mbaa tinni, mboro ma maa pye wi ma sinlɛ,
na wi tɔnmɔ pi kaa yinrigi mbaa tuun, mboro ma maa sinŋge.
11 Mboro mà kɔgɔje yaripege Arahavu†89.11: Faa, Babilɔni tara fɛnnɛ pe muŋgooro nda ti maa para dunruya wì da yɛgɛ ŋga na ki na, wa ti ni, yaripege ŋga pe yinri Arahavu ki yɛn ma taanla kɔgɔje wo ni. Laga ki laga ŋga ki ni, ki yaa pye Arahavu wi yɛn ma taanla Ezhipiti tara to ni. ki purugu maga pye gboo,
màa ma juguye pe gbɔn ma pe jaraga ma yawa gbɔɔ pi ni.
12 Naayeri wi yɛn ma woo, tara ti yɛn ma woro fun,
mboro mà dunruya wo naa wi nawa yaara ti ni fuun ti da.
13 Mboro ma yɔnlɔparawa kamɛŋgɛ kɛɛ naa yɔnlɔparawa kalige kɛɛ ki ni ti da,
Tabɔri yanwiga naa Ɛrimɔ yanwiga ki ni, ti yɛn na jɔrɔgi na yɔgɔri ma mɛgɛ ni.
14 Fanŋga yɛn ma kɛɛ ki ni fɔ jɛŋgɛ,
yawa yɛn ma kɛɛ ki ni,
ma fanŋga kɛɛ ki yɛn ma yiri wa naayeri.
15 Kasinŋge ko naa kaselege ki ni, to tɔ̀ɔn wunluwɔ pi teŋge,
kagbaraga konaa mbe pye sɛnrɛ nuŋgba yofɔ, to ti maa yaan wa ma yɛgɛ sɔgɔwɔ.
16 Yawe Yɛnŋɛlɛ, mbaa ma sɔnni yuuro ni, cɛnlɛ na li woolo pe yɛn maga jɛn, fɛrɛwɛ yɛn pe woo!
Pe yaa la tanri ma yɛgɛ, wa ma yanwa pi ni.
17 Pe yaa la yɔgɔri suyi ma mɛgɛ ki kala na,
ma yɛn sinŋɛ yɛgɛ ŋga na, ki maa gbɔgɔwɔ kaan pe yeri.
18 Katugu mboro ma yɛn pe gbɔgɔwɔ naa pe fanŋga ye,
ma kagbaraga ko fanŋga na we ma cew ta.
19 Kaselege ko na, we tugurɔn sigeyaraga ki yɛn Yawe Yɛnŋɛlɛ mboro kɛɛ na,
mboro Izirayɛli woolo Yɛnŋɛlɛ kpoyi le, we wunlunaŋa wi yɛn mboro kɛɛ.
20 Pilige ka, màa ma yɛɛ naga yariyanga†89.20: 2 Sami 7.4-17; 1 Kuro 17.1-15 ni, mbele pè pe yɛɛ kan ma yeri, ma para pe ni, ma yo fɔ:
Mì maliŋgbɔɔn kotogofɔ wa saga,
mì lefɔnŋɔ wa wɔ wa janwa wi sɔgɔwɔ.
21 Mìlan tunmbyee Davidi wi ta,
mìla sinmɛ kpoyi pi wo wi na maa wɔ†89.21: 1 Sami 13.14; 16.12; Kapye 13.22.
22 Mi jate mi yaa kɛɛ le wi ni mboo tɔgɔ,
na yawa pi yaa fanŋga le wi ni.
23 Wi jugu wi se ya pan mboo fo,
lepee wi se ya mbe fanŋga ta wi na.
24 Mi yaa kaa winfɛnnɛ pe tɔngɔlɔ wa wi yɛgɛ,
mbe win wi panrafɛnnɛ pe ni.
25 Mi yaa pye sɛnrɛ nuŋgba yofɔ wi ni mbe kagbaraga pye wi kan,
wi wunluwɔ fanŋga ki yaa la gbogo mbaa kee yɛgɛ na mɛgɛ ko kala na.
26 Mi yaa kɔgɔje wi le wi kɛɛ,
mboo tɛgɛ gbaanla pe go na†89.26: Ki vɛrise ŋa wi sɛnrɛ ti kɔrɔ wo yɛn fɔ Yɛnŋɛlɛ li yaa wi tɛgɛ tara lombondo ti go na..
27 Wo na, wi yaa kaa na yɛnri mbaa yuun fɔ:
«Na to, na Yɛnŋɛlɛ, mboro ma yɛn walaga ŋga kìlan shɔ.»
28 Mi wo na, mi yaa kaa pye na pinambyɔ koŋgbanŋa,
mboo yirige mbe wɛ dunruya wunlumbolo pe ni fuun pe na†89.28: Naga 1.5.
29 Mi yaa ti na kagbaraga ki koro wi ni fɔ sanga pyew,
mi yaa ti na yɔn finliwɛ mba mì le wi ni pi yeresaga ta wi ni.
30 Mi yaa ti setirige piile mbaa yinrigi wi puŋgo na suyi,
mbe ti wi wunluwɔ pi koro wa suyi paa yɛgɛ ŋga na naayeri wi yɛn wa we.
31 «Na wi setirige piile paga na lasiri wi wa,
na pe woro na tanri mbaa yala na kakɔnndɛgɛŋgɛlɛ ke ni,
32 na paga na kondɛgɛŋgɛlɛ ke jɔgɔ,
na pee na ŋgasegele ke lɛ mbaa tanri ke na,
33 pa kona mi yaa yiri pe kɔrɔgɔ kanŋgaga ni mbe pe jɔlɔ pe mbalogowo pi kala na;
mbe yiri pe kɔrɔgɔ mbe pe gbɔn pe mbasinmɛ pi kala na.
34 Ɛɛn fɔ mi se na kagbaraga ki yaga wi kanŋgɔlɔ,
mi yɛn sɛnrɛ nuŋgba yofɔ yɛgɛ ŋga na, mi sege wogo ki sa wi ni.
35 Mi se na yɔn finliwɛ pi jɔgɔ wi ni,
mi se na yɔn sɛnrɛ ti kanŋga wi kanŋgɔlɔ.
36 Mìla wugu wugusaga nuŋgba ki wogo na, mi yɛn kpoyi yɛgɛ ŋga na ki na,
fɔ mi se Davidi wi fanla.
37 Setirige piile yaa la yinrigi wi puŋgo na suyi,
wi wunluwɔ pi yaa mɔ na yɛgɛ sɔgɔwɔ paa yɔnlɔ ki yɛn.
38 Pi yaa yeresaga ta fɔ sanga pyew paa yeŋge ki yɛn,
ko ŋga ki yɛn sɛrɛfɔ ŋa wi yɛn kaselege fɔ wa kambaara ti puŋgo na.»
Wɔnmatigiwɛn laga.
39 Ɛɛn fɔ, we Fɔ, konaa ki ni fuun, mà je wunluwɔ ŋa mà sinmɛ kpoyi wo wi na maa wɔ wi na, màa wa,
mà nawa ŋgban wi ni.
40 Yɔn finliwɛ mba màa le ma tunmbyee wi ni, màa jɔgɔ,
màa wunluwɔ njala li kɔw wa wi go na mali wa tara mali tɛgɛ fyɔngɔ ni.
41 Màa malaga sigemboro ti ni fuun ti jaanri,
ma malaga sigecara ti tɔngɔ.
42 Torofɛnnɛ pe ni fuun pòo yaara ti koli,
wi cɛnyɛɛnlɛ pe yɛn naa tifaga.
43 Wi winfɛnnɛ mà pe kotogo ki kan pe na,
mà yɔgɔrimɔ kan wi juguye pe ni fuun pe yeri.
44 Màa ti wi tokobi wii ya kala la yɔn,
ma suu saga malaga ki na.
45 Wi wunluwɔ gbɔgɔwɔ màa kɔ,
màa wunluwɔ jɔngɔ ki jan tara.
46 Màa wi lefɔnrɔ piliye yi were,
ma fɛrɛ gbɔrɔ wa wi na.
Wɔnmatigiwɛn laga.
47 Yawe Yɛnŋɛlɛ, ma yaa koro mbaa ma yɛɛ lara fɔ sa gbɔn wagati wiwiin?
Ma naŋgbanwa pi yaa koro mbaa yiin paa kasɔn yɛn fɔ sa gbɔn wagati wiwiin?
48 Ma jatere wi tɛgɛ ki na fɔ na yinwege ki woro sa,
ma kaga wele, ma maga yan sɛnwee piile mà pe da pe kɔ pe wɔ wa.
49 Lere wiwiin wi yɛn wa, wi yaa koro yinwege na wi se ka ku?
Ambɔ wi mbe ya mboo yɛɛ shɔ kunwɔ pi kɛɛ?
Wɔnmatigiwɛn laga.
50 E, Yawe Yɛnŋɛlɛ, kagbaraga ŋga màa pye na piin fafafa, ki kari se yeri?
Màa wugu mbe kagbaraga ŋga pye Davidi wi kan mbe yala ma yɛn sɛnrɛ nuŋgba yofɔ yɛgɛ ŋga na ki ni, ki koro se yeri?
51 E, we Fɔ, leele pe yɛn nɔɔ tunmbyeele pe tifaga yɛgɛ ŋga na, ma jatere wi tɛgɛ ki na,
ma jatere wi tɛgɛ ki na fun fɔ ki janwa gbɔlɔ na, pa li go tuguro ti yɛn mi go na.
52 E, Yawe Yɛnŋɛlɛ, ma jatere wi tɛgɛ ki na fɔ ma juguye pe yɛn nala tifaga,
lere ŋa mà sinmɛ pi wo wi na maa wɔ, ma juguye pe yɛn naa tuuro lee naa tifaga.
53 Sɔnmɔ mbe pye Yawe Yɛnŋɛlɛ li woo fɔ sanga pyew!
Anmiina, anmiina.
†89:1 89.1: 1 Wunlu 5.11
†89:5 89.4-5: 2 Sami 7.12-16; 1 Kuro 17.11; Yuuro 132.11; Kapye 2.30
†89:6 89.6: Ŋga kì yo fɔ mbele pe yɛn kpoyi ko yɛn na para mɛrɛgɛye poro sɛnrɛ na.
†89:11 89.11: Faa, Babilɔni tara fɛnnɛ pe muŋgooro nda ti maa para dunruya wì da yɛgɛ ŋga na ki na, wa ti ni, yaripege ŋga pe yinri Arahavu ki yɛn ma taanla kɔgɔje wo ni. Laga ki laga ŋga ki ni, ki yaa pye Arahavu wi yɛn ma taanla Ezhipiti tara to ni.
†89:20 89.20: 2 Sami 7.4-17; 1 Kuro 17.1-15
†89:21 89.21: 1 Sami 13.14; 16.12; Kapye 13.22
†89:26 89.26: Ki vɛrise ŋa wi sɛnrɛ ti kɔrɔ wo yɛn fɔ Yɛnŋɛlɛ li yaa wi tɛgɛ tara lombondo ti go na.
†89:28 89.28: Naga 1.5