1 Ye yurugo fɔnŋgɔ kɔ ye Yawe Yɛnŋɛlɛ li sɔn!

Dunruya woolo ye ni fuun yaa yuuro koo Yawe Yɛnŋɛlɛ li kan!

2 Yaa yuuro koo Yawe Yɛnŋɛlɛ li kan, yaa li sɔnni,

yaa ki sɛntanra ti yari pilige nuŋgba nuŋgba pyew fɔ lo li yɛn shɔfɔ we.

3 Yaa li gbɔgɔwɔ yanwa pi sɛnrɛ yuun dunruya cɛngɛlɛ ke sɔgɔwɔ,

yaa li kagbɔgɔlɔ ke yɛgɛ yuun tara nuŋgba nuŋgba pyew ti woolo pe kan.

4 Katugu Yawe Yɛnŋɛlɛ li yɛn ma gbɔgɔ, li daga paa li sɔnni fɔ jɛŋgɛ;

li yɛn fyɛrɛ yaraga ma wɛ yarisunndo ti ni fuun ti na.

5 Katugu yarisunndo nda fuun cɛngɛlɛ sanŋgala ke maa gbogo ti woro yaraga ka,

ɛɛn fɔ Yawe Yɛnŋɛlɛ lo lì naayeri wi da.

6 Gbɔgɔwɔ yanwa naa tiyɔnwɔ pi yɛn li woo,

fanŋga naa tiyɔnwɔ pi yɛn wa li cɛnsaga kpoyi ki ni.

7 Cɛngɛlɛ ŋgele laga tara na, yaa Yawe Yɛnŋɛlɛ li gbogo,

yaa li gbɔgɔwɔ yanwa naa li yawa pi sɛnrɛ yuun!

8 Yaa Yawe Yɛnŋɛlɛ li mɛgɛ ki gbogo,

yaa paan ye yarikanra ti ni yaa yiin wa li shɛrigo gbɔgɔ londo ti ni.

9 Ye fɔli ye ye yɛrɛ ti jiile wa tara Yawe Yɛnŋɛlɛ li yɛgɛ sɔgɔwɔ yeli gbɔgɔ, li yɛn kpoyi yɛgɛ ŋga na ki kala na†96.9: Yuuro 29.1-2!

Dunruya woolo ye ni fuun yaa fyɛ yaa seri li yɛgɛ!

10 Yaa ki yuun wa cɛngɛlɛ ke sɔgɔwɔ fɔ: «Yawe Yɛnŋɛlɛ lo li yɛn wunluwɔ we!»

Ko kì ti tara ti yɛn wa ti yɔngɔlɔ ke ni, ti se yɛri mbe wɔ wa ti yɔngɔlɔ ke ni.

Yawe Yɛnŋɛlɛ li yaa ka kiti kɔn cɛngɛlɛ ke na kasinŋge ni.

11 Naayeri yaara, yaa yɔgɔri, tara na yaara, ye yin nayinmɛ ni,

kɔgɔje wo naa wi nawa yaara ti ni fuun, yaa tinmɛ gbɔɔ yinrigi!

12 Yan nawa naa yanyaara ti ni fuun yaa yɔgɔri!

Kɔɔrɔ tire ti ni fuun yaa jɔrɔgi nayinmɛ ni!

13 Yaa ki piin Yawe Yɛnŋɛlɛ li yɛgɛ sɔgɔwɔ, katugu li yɛn na paan,

li yɛn na paan mbe kiti sinŋɛ kɔn tara woolo pe na,

li yaa kiti kɔn dunruya woolo pe na mbe yala kasinŋge ki ni,

li yaa kiti kɔn cɛngɛlɛ ke na mbe yala li kaselege ki ni.