2 Na jatere wi yɛn ma cɛn na na, e, Yɛnŋɛlɛ;

mi yaa yurugo shɔ, mi yaa yurugo shɔ mbe Yɛnŋɛlɛ li sɔn yarigbɔnrɔ ni.

3 Na juru naa na ŋgɔni, ye yɛn ye yiri!

Mi yaa keli mbe yɛn lalaaga ki yɛgɛ mbe leele pe yɛn.

4 Yawe Yɛnŋɛlɛ, mi yaa ma sɔn tara woolo pe sɔgɔwɔ,

mi yaa yurugo kɔ mbɔɔn sɔn cɛngɛlɛ sanŋgala ke sɔgɔwɔ;

5 katugu ma kagbaraga kì gbɔgɔ ma gbɔn fɔ wa yɛnŋɛlɛ na,

ma yɛn sɛnrɛ nuŋgba yofɔ yɛgɛ ŋga na, kì yagara ma wɛ kambaara ti na.

6 E, Yɛnŋɛlɛ, ma gbɔgɔwɔ po mba pì wɛ naayeri wi ni fuun wi na, pi naga,

ki yaga ma gbɔgɔwɔ yanwa pi pye tara ti lagapyew ki ni†108.2-6: Yuuro 57.8-12!

7 Na yɔn sogo, ma we shɔ ma fanŋga ki ni,

jaŋgo woro mbele we kala li yɛn mɔɔ ndanla we ta we shɔ!

8 Yɛnŋɛlɛ lì para wa li cɛnsaga kpoyi ki ni ma yo fɔ: «Mi yaa cew ta.

Mi yaa Sishɛmu ca ki yɛɛlɛ,

mbe Sukɔti gbunlundɛgɛ ki taanla mana ni, mbege kɔɔnlɔ kɔɔnlɔ.

9 Galaadi tara ti yɛn na woro,

Manase tara ti yɛn na woro;

Efirayimu tara ti yɛn paa na tugurɔn njala yɛn mala go ki tɔn;

Zhuda tara to yɛn paa na wunluwɔ kanŋgala yɛn.

10 Mowabu tara to yɛn paa na woliyaraga yɛn, ŋga mi maa wunru wa ki ni,

Edɔmu tara ti tegere ti yɛn na yeri, mi mala sawira ti wɔ mberi wa wa;

mi yɛn na cew tawa kɔnnɔ waa Filisiti tara ti mɛgɛ ni.»

11 Ambɔ wi yaa kari na ni wa ca ŋga pè malaga sigembogo kan maga maga ki ni?

Ambɔ wi yaa sanla torogo fɔ wa Edɔmu tara?

12 Kaawɔ Yɛnŋɛlɛ mboro ma mbe ya mbege pye, mboro ŋa màa we wa we.

E, Yɛnŋɛlɛ, mboro ŋa ma sila pye na pinlɛlɛ we maliŋgbɔɔnlɔ pe ni mbaa kee wa malaga we.

13 Pan ma we saga, ma we shɔ we winfɛnnɛ pe kɛɛ,

katugu sɛnweele pe sagawa pi woro yaraga ka!

14 Na Yɛnŋɛlɛ li ka pye we ni, we yaa kagbɔgɔlɔ pye,

lo li yaa we winfɛnnɛ pe tɔngɔ†108.7-14: Yuuro 60.7-14.