1 Woro ma we daga mbe gbɔgɔwɔ ta, Yawe Yɛnŋɛlɛ, woro ma we daga mbe gbɔgɔwɔ ta,

ɛɛn fɔ gbɔgɔwɔ kan ma yɛɛ mɛgɛ ki yeri,

ma kagbaraga konaa ma yɛn sɛnrɛ nuŋgba yofɔ yɛgɛ ŋga na ki kala na.

2 Yiŋgi na cɛngɛlɛ sanŋgala ke sila yuun fɔ:

«Pe Yɛnŋɛlɛ li yɛn se yeri?»

3 We Yɛnŋɛlɛ li yɛn wa yɛnŋɛlɛ na,

kala o kala kali ndanla, lo li ma pye.

4 Pe yarisunndo ti yɛn warifuwe naa tɛ woro,

sɛnwee kɛɛ kìri gbegele.

5 Yɔn yɛn ti na, ɛɛn fɔ tila ya mbaa para,

yɛngɛlɛ yɛn ti na, ɛɛn fɔ tila ya mbaa yaan.

6 Nuŋgbogolo yɛn ti na, ɛɛn fɔ tila ya mbaa nuru,

numagala yɛn ti na, ɛɛn fɔ tila la nuwɔ taa.

7 Kɛyɛn yɛn ti na, ɛɛn fɔ tila ya mbe yaraga yigi,

tɔɔrɔ yɛn ti na, ɛɛn fɔ tila ya mbe tanga,

magala kpɛ na ya yiri wa ti yagbowegele ke ni.

8 Ti gbegelefɛnnɛ poro naa mbele pe ma pe jigi wi taga ti na,

poro naa ki yarisunndo ti ni pè yala†115.4-8: Yuuro 135.15-18; Naga 9.20.

9 Izirayɛli woolo ye ye jigi wi taga Yawe Yɛnŋɛlɛ lo na!

Lo li yɛn ye sagafɔ konaa ye tugurɔn sigeyaraga na ye go singi.

10 Yoro Arɔn setirige piile ye ye jigi wi taga Yawe Yɛnŋɛlɛ li na!

Lo li yɛn ye sagafɔ konaa ye tugurɔn sigeyaraga na ye go singi.

11 Yoro mbele ye maa fyɛ Yawe Yɛnŋɛlɛ li yɛgɛ, ye ye jigi wi taga Yawe Yɛnŋɛlɛ li na!

Lo li yɛn ye sagafɔ konaa ye tugurɔn sigeyaraga na ye go singi.

12 Yawe Yɛnŋɛlɛ li jatere wi yɛn we na, li yaa duwaw we na;

li yaa duwaw Izirayɛli woolo pe na,

li yaa duwaw Arɔn setirige piile pe na.

13 Lo na Yawe Yɛnŋɛlɛ, mbele pe maa fyɛ li yɛgɛ, li yaa duwaw pe na,

lepigile mbe pinlɛ legbɔɔlɔ pe ni†115.13: Naga 11.18; 19.5.

14 Yawe Yɛnŋɛlɛ li ti ye seye woolo pe lɛgɛ,

yoro naa ye piile pe ni ye lɛgɛ!

15 Yawe Yɛnŋɛlɛ li duwaw ye na,

lo na lì naayeri wo naa tara ti da we!

16 Naayeri wi yɛn Yawe Yɛnŋɛlɛ lo nuŋgba woo,

ɛɛn fɔ lì tara to kan sɛnwee piile poro yeri.

17 Kuulo poro ma pe maa Yawe Yɛnŋɛlɛ li sɔnni,

mbele pè tigi wa kuulo tara, poro ma pe maa li sɔnni.

18 Ɛɛn fɔ woro we yaa la Yawe Yɛnŋɛlɛ li sɔnni,

mbege lɛ yiŋgɔ fɔ sanga pyew.

Yaa Yawe Yɛnŋɛlɛ li sɔnni!