137
Izirayɛli woolo pe jɔlɔgɔ ma pe ta
pe yɛn ma cɛn wa Babilɔni tara
gbaanla pe yɔn na
pe yɛn ma cɛn wa Babilɔni tara
gbaanla pe yɔn na
1 Ma we ta wàa pye ma cɛn wa Babilɔni tara gbaanla pe yɔn na,
wa ki laga ki na, a Siyɔn ca wogo kì si tigi wa we kotogo na,
a we nɛɛ gbele.
2 Tipire nda tìla pye wa ki laga ki na,
wàa we ŋgɔniye pe yanŋga yanŋga wa ti ni.
3 Ma we ta wa ki laga ki na, mbele pàa we yigi kasopiile,
pàa pye naga yuun we kan ma yo waa yuuro koo;
we jɔlɔfɛnnɛ pàa pye na we piin ma yo we yuuro kɔ we pe nawa pi yinŋgi.
Pàa yo fɔ: «Ye Siyɔn ca yuuro ta kɔ we kan ye!»
4 Naga yɛn ma, we mbe ya mbaa Yawe Yɛnŋɛlɛ li yuuro ti koo
tara ta yɛgɛ ni mɛlɛ san?
5 E, Zheruzalɛmu ca, na mi ka fɛgɛ ma na,
pa kona, na kalige kɛɛ ki shɔ na na!
6 Na mi woro na nawa tuun ma na,
na mi woro na Zheruzalɛmu ca ki jate mbe wɛ na yɔgɔrimɔ kagala ke ni fuun ke na,
pa kona na ŋgayinnɛ li mara wa na yɔn ki naayeri!
7 Yawe Yɛnŋɛlɛ, ŋga Edɔmu cɛnlɛ woolo pàa pye we na, ma jatere wi tɛgɛ ki na,
pilige ŋga ni Babilɔni tara fɛnnɛ pàa Zheruzalɛmu ca ki shɔ we;
poro pàa pye naga yuun fɔ: «Ye ca ki ya, ye ca ki ya,
fɔ sa gbɔn wa yinrɛ ti nɔrɔ nda pè le ti na†137.7: Eza 63.1-4; Zhere 49.7-22; Eze 25.8,12-14; 35; Abi 11-14!»
8 Mboro Babilɔni tara, sanni jɛnri pe yaa ma tɔngɔ;
tipege ŋga mà pye we na, lere o lere wi yaa ki yɔngɔ pye ma na,
fɛrɛwɛ yɛn ki fɔ wi woo†137.8: Naga 18.6!
9 Lere o lere wi yaa ma piile pe yigi, mbe pe gbɔn mbe pe tɔngɔlɔ wa walaga ki na,
fɛrɛwɛ yɛn ki fɔ wi woo!