2
1 Mi wo na, mi yɛn ma yɔn paa yarifyɛɛnrɛ yɛn wa Sarɔn funwa laga falafala ki ni,
mi yɛn paa masho pɔlɔ yarifyɛɛnrɛ yɛn, nda ti ma fi wa yanwira gbunlundɛrɛ ti ni.
(Lefɔnŋɔ wi sɛnyoro)
2 Yɛgɛ ŋga na masho pɔlɔ yarifyɛɛnrɛ tiyɔnrɔ ma pye wuuro sɔgɔwɔ,
pa na wɔnlɔnjɔ jɛnŋɛ wi yɛn ma wa sumbonɔ sanmbala pe sɔgɔwɔ.
(Sumboro wi sɛnyoro)
3 Yɛgɛ ŋga na pɔmu tige ki ma pye wa kɔlɔgɔ tire ti sɔgɔwɔ,
pa na ndanlafɔ wi yɛn ma wa lefɔnmbɔlɔ sanmbala pe sɔgɔwɔ.
Ki yɛn mala ndanla mbaa cɛɛn wa wi yinmɛ pi ni,
wi tige pire ti yɛn ma tanla wa na yɔn.
4 Wì ye na ni wa nayinmɛ go ki ni,
wùu ndanlawa pi tɛgɛ mala go tɔn.
5 Ye ɛrɛzɛn piwara shashara kan na yeri mbe ka mbe fanŋga ta,
ye pɔmu tige pire kan na yeri mbe ka mbe fanŋga le na yɛɛ ni;
katugu ndanlawa kala lìlan tɛgɛ yaŋa.
6 Wi kamɛŋgɛ ko mbanla go ki tɔgɔ,
wi kalige ko mbaa na talitali.
(Lefɔnŋɔ wi sɛnyoro)
7 Zheruzalɛmu ca sumbonɔ, mi yɛn na ye yɛnri ŋgbanga,
yaga kanla ndanlafɔ wi yirige,
yaga kaa yɛn mboo yirige
mbege ta wi faa ki jaa gbɛn.
Lefɔnŋɔ wi yɛn na paan
(Sumboro wi sɛnyoro)
8 Ye wele, na ndanlafɔ wi magala lo li.
Wi ŋa wila paan!
Wi yɛn na yeni wa yanwira ti na,
wi yɛn na yeni na kanni wa tinndiye pe na na paan!
9 Na ndanlafɔ wi yɛn ma yɔn paa lufaa yɛn,
nakoma paa safuwe pyɔ yɛn.
Ye wele, wi yɛn ma yere wa funwa na, wa we go mbogo ki puŋgo na.
Wi yɛn na wele wa fenɛtiri wi ni,
wì yɛgɛ le na wele wa fenɛtiri mɛrɛ wegele ke ni.
10 Na ndanlafɔ wì para na ni ma yo fɔ:
«Yiri, na wɔnlɔnjɔ, na sumboriŋgbarawa, ma pan laga!
11 Wele, were sanga wì toro,
tisara tì yere, tisara tì kari.
12 Yan yaara ti yɛn na fyɛnwɛ laga tara ti na;
yuuro kɔsanga wì gbɔn,
keteŋgele ke magaŋgala ke yɛn na yinrigi laga we tara ti ni.
13 Figiye tire pire koŋgbannda ti yɛn na yanlagi makɔ,
ɛrɛzɛn tiire tì fyɛnwɛ na nuwɔ taan yinrigi.
Yiri, na wɔnlɔnjɔ, na sumboriŋgbarawa, ma pan laga!
14 E, na Jɛndɛtuwa, mboro ŋa ma yɛn fɔ wa waliwere ti sɔgɔwɔ,
ma yɛn ma lara wa yanwira were ti ni.
Ki yaga mbɔɔn yɛgɛ ki yan,
ki yaga mbɔɔn magala li logo,
katugu ma magala li yɛn ma tanla, ma yɛgɛ ki yɛn ma yɔn.»
(Sumboro wi nɔ wi sɛnyoro)
15 Ye dabaala pe yigi we kan,
ki dabaala tunmɔmbɔlɔ mbele pe yɛn na ɛrɛzɛn tiire ti jogo we,
ma si yala, we ɛrɛzɛn tiire tì fyɛnwɛ.
(Sumboro wi sɛnyoro)
16 Na ndanlafɔ wi yɛn na woo, mi fun mi yɛn wi woo.
Wi maa wi yaayoro ti kɔnri tila kaa wa masho pɔlɔ yarifyɛɛnrɛ ti sɔgɔwɔ.
17 Sanni yɔnlɔ ki sa tigi wa,
sanni tire yinmɛ pi sa to tara mbe kari yɛgɛ,
ma sɔngɔrɔ ma pan na ndanlafɔ;
maa fee maa paan paa lufaa yɛn,
nakoma paa safuwe pyɔ yɛn, ŋa wi yɛn wa Betɛri†2.17: Betɛri kɔrɔ wi mbe ya pye fɔ yanwira nda tì lagala ti yɛɛ na nakoma yanwira nda tì tigitigi ma yiriyiri. yanwira ti na.
†2:7 2.7: Eburuye sɛnrɛ ti ni, lufaa mɛgɛ konaa Yɛnŋɛlɛ na yaara ti ni fuun ti go na, ki mɛrɛ shyɛn ti yerewe pì kari pi yɛɛ kɔrɔgɔ; safuwe mɛgɛ konaa Yɛnŋɛlɛ na yawa pi ni fuun fɔ, ki mɛrɛ shyɛn ti yerewe pì kari pi yɛɛ kɔrɔgɔ. Wa Izirayɛli tara kɛɛ ki yeri, kìla pye faa, lufaa wo naa safuwe wi ni pàa pye ndanlawa pi kacɛn.
†2:17 2.17: Betɛri kɔrɔ wi mbe ya pye fɔ yanwira nda tì lagala ti yɛɛ na nakoma yanwira nda tì tigitigi ma yiriyiri.