Yɛnŋɛlɛ yɔn sɛnrɛ yofɔ
SOFONI
wi sɛwɛ we
Sɛwɛ wi nawa sɛnrɛ
Yɛnŋɛlɛ yɔn sɛnrɛ yofɔ Sofoni wìla ki yari Zhuda tara woolo pe kan fɔ Yawe Yɛnŋɛlɛ li pilige ki yɛn na paan. Ki pilige ki woro yɔgɔrimɔ pilige. Ki yɛn pilige ŋga Yɛnŋɛlɛ li yaa jɔlɔgɔ wa Zhuda tara woolo pe na, mbe tara ti tɔngɔ pew. Yawe Yɛnŋɛlɛ li yaa jɔlɔgɔ wa cɛngɛlɛ sanŋgala ke na fun. Ali mbege ta Zhuda tara woolo pè kapege pye, pe daga mbe sɔngɔrɔ mbe pan Yɛnŋɛlɛ li kɔrɔgɔ. Pilige ka, dunruya woolo pe ni fuun pe yaa ka Yɛnŋɛlɛ li gbɔgɔ. Sofoni wi yɛn na yɛrɛwɛ kaan Yɛnŋɛlɛ li woolo pe yeri na yuun fɔ:
Yoro mbele fuun ye yɛn ma ye yɛɛ tirige laga tara ti ni,
yoro mbele ye yɛn na tanri we Fɔ wi kakɔnndɛgɛŋgɛlɛ ke na,
yaa Yawe Yɛnŋɛlɛ li lagajaa.
Yaa kasinŋge piin,
ye ye yɛɛ tirige li yɛgɛ sɔgɔwɔ.
Kana ye yaa larasaga ta, na Yawe Yɛnŋɛlɛ li naŋgbanwa pilige ki ka ka gbɔn we (Sofo 2.3).
Sɛwɛ wi yɛn ma kɔɔnlɔ yɛgɛ ŋga na
Yawe Yɛnŋɛlɛ li pilige ki yaa ka pye fyɛrɛ gbɔrɔ ni 1.1–2.3
Yawe Yɛnŋɛlɛ li yaa kiti kɔn cɛngɛlɛ ŋgele ke yɛn ma Zhuda tara ti maga ke na 2.4-15
Zheruzalɛmu ca kì kapege pye, ɛɛn fɔ ki yaa ka sɔngɔrɔ mbe cɛn wa ki yɔnlɔ li ni 3.1-20
1
1 Sɛnrɛ nda to Yawe Yɛnŋɛlɛ làa le Sofoni wi yɔn, Zhuda tara wunlunaŋa Zhoziyasi wi sanga wi na, Amɔ pinambyɔ we. Sofoni to wo lawi ŋa Kushi; Kushi to wo lawi ŋa Gedaliya; Gedaliya to wo lawi ŋa Amariya; Amariya to wo lawi ŋa Ezekiyasi.
Yɛnŋɛlɛ li yaa kiti kɔn
dunruya woolo pe na
dunruya woolo pe na
2 Yawe Yɛnŋɛlɛ lì yo fɔ:
«Mi yaa yaraga ki ni fuun ki tɔngɔ mbege wɔ laga tara ti ni.
3 Mi yaa sɛnweele poro naa woŋgaala pe tɔngɔ.
Mi yaa sannjɛrɛ to naa ŋgbanra nda wa kɔgɔje wi ni ti tɔngɔ.
Mi yaa lepeele poro naa ŋga ki maga kan pe maa tipege piin ki kɔ mbege wɔ wa.
Mi yaa sɛnweele pe ni fuun pe tɔngɔ mbe pe kɔ laga tara ti ni.»
Yawe Yɛnŋɛlɛ lo lì yo ma.
Yɛnŋɛlɛ li yaa kiti kɔn
Zhuda tara naa Zheruzalɛmu
ca woolo pe na
Zhuda tara naa Zheruzalɛmu
ca woolo pe na
4 «Mi yaa jɔlɔgɔ wa Zhuda tara woolo pe na,
konaa Zheruzalɛmu ca woolo pe na.
Yaraga ŋga fuun kì koro laga ki laga ŋga ki ni yarisunŋgo Baali ki wogo, mi yaa ki tɔngɔ mbege wɔ wa.
Mi yaa ki tunmbyeele naa ki saraga wɔfɛnnɛ pe mɛgɛ ki kɔ mbege wɔ wa.
5 Mbele pe ma lugu wa pe biriyinrɛ ti go na, mbaa fɔli naayeri yanwa yirigeyaara ti yɛgɛ sɔgɔwɔ mbaa ti gbogo
konaa mbele pe maa fɔli mi ŋa Yawe Yɛnŋɛlɛ na yɛgɛ sɔgɔwɔ na wungu na mɛgɛ ki na,
mbe si sɔngɔrɔ mbaa wungu fun pe yarisunŋgo Milikɔmu†1.5: Milikɔmu wìla pye Amɔ cɛnlɛ woolo pe yarisunŋgo gbɔgɔ; Levi 18.21. ki na,
mi yaa pe tɔngɔ mbe pe wɔ wa.
6 Mi ŋa Yawe Yɛnŋɛlɛ, mbele pè puŋgo le na ni,
poro mbele pe woro nala lagajaa,
pe si woro nala yewe mbaa pe yɛgɛ sinni,
mi yaa pe tɔngɔ mbe pe wɔ wa.»
7 «Ye pyeri, we Fɔ, Yawe Yɛnŋɛlɛ li yɛgɛ sɔgɔwɔ,
katugu Yawe Yɛnŋɛlɛ li pilige kì yɔngɔ.
Yawe Yɛnŋɛlɛ lì saraga gbɛgɛlɛ†1.7: Ŋga kì yo fɔ: Yawe Yɛnŋɛlɛ lì saraga gbɛgɛlɛ, ko yɛn naga nari fɔ Yawe Yɛnŋɛlɛ lì gbɛgɛlɛ mbeli woolo pe yaga juguye pe pan pe pe gbo, paa yɛgɛ ŋga na pe ma kaa saraga yaayoro kɔnlɔgi we.,
mbele li yaa yeri ki na, lì pe yeri makɔ.»
8 Yawe Yɛnŋɛlɛ lì yo fɔ:
«Kundigile, naa wunlunaŋa wi pinambiile,
konaa mbele pe maa tara ta yɛgɛ yaripɔrɔ nii,
mi yaa jɔlɔgɔ wa pe na, na saraga wɔpilige ki na.
9 Ko pilige ko ni, mbele pe maa yeni na yarisunndo gbɔgɔyinrɛ ti yeyɔnrɔ shɔnye pe kaanla†1.9: Mbaa yeni mbaa yarisunndo gbɔgɔyinrɛ ti yeyɔnrɔ shɔnye pe kaanla, kìla pye kapyege ka, ŋga pàa pye na piin yarisunndo gbɔgɔwɔ pi na.,
mbele pe maa pe tafɔ wi go ki yinni yarijɛndɛ ni, pe lewɛlɛwɛ kapyere to naa pe nambara wi kala na,
mi yaa ka yiri pe kɔrɔgɔ.
10 «Ko pilige ko ni, ye yaa kaa leele pe jɔrɔgɔmɔ pi nuru wa Mbɛŋgɛlɛ yeyɔngɔ ki na,
mbaa gbelege gbɔgɔ nuru wa ca ki laga fɔnŋgɔ ki ni.
Jɔgɔwɔ tinmɛ gbɔɔ yaa ka yiri wa tinndiye pe na.
Yawe Yɛnŋɛlɛ lo lì yo ma.
11 Yoro mbele ye yɛn ma cɛn wa ca ki tigiwɛn laga ki ni,
yaa jɔrɔgi ŋgbanga;
katugu pe yaa safari wafɛnnɛ pe ni fuun pe tɔngɔ;
pɛrɛfɛnnɛ mbele fuun pe maa penjara ti tungu,
pe yaa pe tɔngɔ mbe pe wɔ wa.
12 «Ko sanga wo ni, mi yaa fitanla mu mbe ye, mbe Zheruzalɛmu ca ki san;
mbele fuun pe yɛn ma cɛn yɛyinŋge na, ma yo pe yɛn ma taga pe yɛɛ na,
mi yaa ka jɔlɔgɔ wa pe ni fuun pe na,
poro mbele pe maa ki yuun wa pe yɛɛ nawa fɔ: ‹Yawe Yɛnŋɛlɛ li se kajɛŋgɛ nakoma kapege pye we na.›
13 Pe juguye pe yaa pan mbe pe yarijɛndɛ ti koli.
Pe yinrɛ ti yaa ka tɔngɔ mbe wɔ wa.
Pe yaa yinrɛ kan, ɛɛn fɔ pe se ka cɛn wa ti ni.
Pe yaa ɛrɛzɛn tiire sanri, ɛɛn fɔ pe se kari duvɛn wa wɔ.»
Yawe Yɛnŋɛlɛ li piligbɔgɔ ye
14 «Kì yɔngɔ, Yawe Yɛnŋɛlɛ li piligbɔgɔ kì yɔngɔ;
kì yɔngɔ, ki yɛn na paan fyɛlɛgɛ na.
Pe yaa ka sunndo kɔngɔ gbelege logo Yawe Yɛnŋɛlɛ li pilige ki na.
Maliŋgbɔɔn ŋa wi yɛn kotogo ni ma wɛ, wi yaa kaa gbele mbaa sagafɔ jaa.
15 Ki pilige ki yaa ka pye Yɛnŋɛlɛ li naŋgbanwa gbɔɔ pilige,
naa jɔlɔgɔ pilige konaa jatere piriwɛn pilige,
naa jɔgɔwɔ pilige konaa yaara tɔngɔ pilige,
naa wɔwɔ konaa diwi pilige,
naa kambaara konaa diwi wɔlɔ pilige.
16 Ki pilige ki yaa ka pye pilige ŋga pe yaa kaa maliŋgbɔɔnlɔ pe mbanlaga magala li nuru,
mbaa malaga kɔnŋgɔlɔ ke nuru,
ŋgele pe yɛn na waa malaga sigecara ti mɛgɛ ni konaa sanŋgazoye titɔnlɔmbɔlɔ pe mɛgɛ ni.»
17 Yawe Yɛnŋɛlɛ lì yo fɔ:
«Mi yaa ka jɔlɔgɔ wa leele pe na,
fɔ pe yaa kaa tanri paa fyɔɔnlɔ yɛn,
katugu pè kapege pye mi ŋa Yawe Yɛnŋɛlɛ na na.
Pe juguye pe yaa ka pe kasanwa pi jaraga lagapyew paa gbanŋgban yɛn.
Pe gboolo pe yaa ka pye le tara mbaa fɔnri paa kayangara yɛn.
18 Pe warifuwe, pe tɛ wi se ka ya mbe pe shɔ Yawe Yɛnŋɛlɛ li naŋgbanwa pilige ki na.
Tara ti ni fuun ti yaa ka sogo li kayaŋga gbɔgɔ ki kala na.
Ee, ki yaa ka pye fyɛrɛ gbɔrɔ pilige,
katugu li yaa ka tara na woolo pe ni fuun pe tɔngɔ yɔnlɔ nuŋgba.»
†1:5 1.5: Milikɔmu wìla pye Amɔ cɛnlɛ woolo pe yarisunŋgo gbɔgɔ; Levi 18.21.
†1:7 1.7: Ŋga kì yo fɔ: Yawe Yɛnŋɛlɛ lì saraga gbɛgɛlɛ, ko yɛn naga nari fɔ Yawe Yɛnŋɛlɛ lì gbɛgɛlɛ mbeli woolo pe yaga juguye pe pan pe pe gbo, paa yɛgɛ ŋga na pe ma kaa saraga yaayoro kɔnlɔgi we.
†1:9 1.9: Mbaa yeni mbaa yarisunndo gbɔgɔyinrɛ ti yeyɔnrɔ shɔnye pe kaanla, kìla pye kapyege ka, ŋga pàa pye na piin yarisunndo gbɔgɔwɔ pi na.