Biblu Ala ta Kuma Ayuba 1

AYUBA

TA KO KITABU

Kitabu faamucogo

Ayuba ta ko kitabu bɛ min fɔ an ye a ta ko ra, ni a bɔra o ra, an ma foyi wɛrɛ lɔn Ayuba ta ko ra, walama nin kitabu sɛbɛbaga ta ko ra.

Ayuba tun ye mɔgɔ terennin ye, nka Ala sɔnna k’a to a ye kɔrɔbɔ. A borofɛnw bɛɛ cɛnna, bana k’a yɛrɛ fana mina. Ayuba teri dɔw nana ko o bɛna a jusu saaro, nka olugu k’a jaraki le, ko a ka kojugu minw kɛ, o le kɛra a tɔɔrɔkun ye. O kumaw ka Ayuba jusu kasi. A fana kumana k’a yira ko ale ma jaraki foyi ra, ko mun kosɔn Ala ka nin tɔɔrɔ lase ale ma. O bɛɛ kɔ fɛ, Ala yɛrɛ nana Ayuba jaabi, k’a ta danfɛnw kɛ sababu ye k’a ta sebagaya yira Ayuba ra.

Ayuba nimisara, ka lɔ a ra ko jo bɛ Ala fɛ ko bɛɛ ra. Nka Ala ka Ayuba teriw jaraki o ta kumaw kosɔn.

Ayuba ta ko b’a yira an na ko ni adamaden ka tɔɔrɔ cogo o cogo, a man kan ka a jigi tigɛ Ala ra, ka ban Ala ta ma. Ayuba tɔɔrɔra, nka o tɔɔrɔw bɛɛ kɛra Ala sago ye. Mɔgɔ tɛ se ka a ta tɔɔrɔ bɛɛ kun lɔn, mɔgɔ ta tɔɔrɔ bɛɛ fana tɛ jurumun nɔ ye.

Kitabu kɔnɔkow

Cɛnri ni banajugu sera Ayuba ma (1–2)

Ayuba k’a ta tɔɔrɔ lakari (3)

Ayuba teriw ta kumako fɔlɔ (4–14)

Ayuba teriw ta kumako flanan (15–21)

Ayuba teriw ta kumako sabanan (22–26)

Ayuba k’a ta terenninya lakari (27–31)

Elihu ta kuma (32–37)

Ala ka Ayuba jaabi (38.1–42.6)

Ala ka koɲuman min kɛ Ayuba ye (42.7-17)

Ayuba ta tagamacogoɲuman

1 Cɛ dɔ tun bɛ Usi* jamana ra, min tɔgɔ tun ye ko Ayuba. O cɛ tun ye mɔgɔ jusukungbɛnin ye, ani mɔgɔɲuman. A tun bɛ siran Ala ɲa, k’a yɛrɛ mabɔ kojugu ra. 2 Dencɛ wolonfla ni denmuso saba le tun b’a fɛ. 3 A ta bɛganw tun ye saga waga wolonfla, ani ɲɔgɔmɛ waga saba, ani sɛnɛkɛmisi fla fla sigiyɔrɔma kɛmɛ looru, ani fali kɛmɛ looru. A ta baaradenw fana tun ka ca kosɛbɛ. Mɔgɔw tun bɛ ale le jate ka tɛmɛ Zuridɛn ba terebɔyanfan jamana mɔgɔ tɔw bɛɛ kan.

4 Ayuba dencɛw tun bɛ to ka taga ɲɔgɔn ta so ka taga ɲanagbɛw kɛ. Ni o tun bɛ o kɛ, o tun bɛ o balemamusow fana wele ka taga domuni kɛ, ani ka duvɛn min ɲɔgɔn fɛ. 5 Nka ni ɲanagbɛ tun nana ban tuma o tuma, Ayuba tun bɛ a ta denw wele ka na o saninya. A tun bɛ wuri sɔgɔmada joona fɛ ka saraka jɛnita* kelen bɔ o bɛɛ kelen kelen tɔgɔ ra. Sabu Ayuba tun b’a fɔ a yɛrɛ kɔnɔ ko: «A bɛ se ka kɛ ko ne ta denw barokɛtɔ ka Ala tɔgɔ cɛn o jusukun na, ka jurumun kɛ.» Ayiwa, Ayuba tun b’a kɛ ten le wagati bɛɛ.

Ayuba ta kɔrɔbɔriko fɔlɔ

6 Ayiwa, lon dɔ Ala ta mɛlɛkɛw nana lɔ Matigi Ala ɲa kɔrɔ; Setana fana nana lɔ o cɛ ra. 7 Matigi Ala ko Setana ma ko: «I bɔra min?» Setana ka Matigi Ala jaabi ko: «Ne tun bɛ dunuɲa le laminina dɔrɔn, ka yɔrɔw yaalayaala!» 8 Matigi Ala ko Setana ma ko: «I ka ne ta jɔncɛ Ayuba kɔrɔsi kɛ? A ɲɔgɔn tɛ dunuɲa ra; mɔgɔ jusukungbɛnin lo, mɔgɔɲuman lo fana. A bɛ siran Ala ɲa, a b’a yɛrɛ mabɔ kojugu ra.» 9 Setana ka Matigi Ala jaabi ko: «Yala Ayuba bɛ siranna Ala ɲa gbansan le wa? 10 Yala i m’a tanga, a ni a ta somɔgɔw ni a borofɛnw bɛɛ wa? I ka baraka don a ra a ta baara bɛɛ ra; a ta bɛganw bɛ jamana yɔrɔ bɛɛ ra. 11 Nka ele ye i boro se a borofɛnw ni a ta mɔgɔw ma k’a flɛ sa; sigiya t’a ra, a bɛna i tɔgɔ cɛn mɔgɔ bɛɛ ɲa na sisan.» 12 Matigi Ala ko Setana ma ko: «Ayiwa, ne b’a borofɛnw bɛɛ labla i ye, nka i kana i boro se ale yɛrɛ ma.» O fɔra minkɛ, Setana bɔra Matigi Ala kɔrɔ ka taga.

13 Ayiwa, lon dɔ Ayuba dencɛw, ani a denmusow tun bɛ domuni kɛra, ka duvɛn min o kɔrɔcɛ ta so. 14 O wagati yɛrɛ ra, ciraden dɔ nana a fɔ Ayuba ye ko: «Misiw tun bɛ sɛnɛ kɛra, faliw tun bɛ bin ɲimina o kɛrɛ fɛ; 15 Sabeka† dɔw nana ben an kan, ka i ta baaradenw bɛɛ faga, ka bɛganw mina ka taga ni o ye. Ne kelen le sera ka bɔsi, ka n’a fɔ i ye.» 16 Sani ale ye ban kuma ra, dɔ wɛrɛ nana ka na a fɔ ko: «Sanpɛrɛn jigira ka sagaw, ani baw, ani baaradenw bɛɛ jɛni ka o faga. Ne kelen le sera ka bɔsi, ka n’a fɔ i ye.» 17 Sani ale ye ban kuma ra, dɔ wɛrɛ nana tuun ka n’a fɔ ko: «Kalideka‡ dɔw ka o yɛrɛ taran jɛnkuru saba ka na ben baaradenw kan ka o faga, ka ɲɔgɔmɛw mina ka taga ni o ye. Ne kelen le sera ka bɔsi, ka n’a fɔ i ye.» 18 Sani ale ye ban kuma ra, dɔ wɛrɛ nana tuun ka na a fɔ ko: «I dencɛw, ani i denmusow tun bɛ domuni kɛra ka duvɛn min o kɔrɔcɛ ta so; 19 fɔɲɔba dɔ bɔra kongokolon fan na ka na bon fan naani bɛɛ ben; bon benna denw kan ka o faga. Ne kelen le sera ka bɔsi, ka n’a fɔ i ye.»

20 Ayuba wurira ka lɔ; a k’a ta deregeba mina k’a faran, k’a kun li. A k’a yɛrɛ firi dugu ma, k’a kinbiri gban, 21 k’a fɔ ko:

«Ne borolakolon le bɔra ne bamuso kɔnɔ,

ne borolakolon le fana bɛna sekɔ ka taga.

Matigi Ala le k’a di,

Matigi Ala le fana k’a ta.

Bonya ye la Matigi Ala tɔgɔ kan.»

22 Ayiwa, nin bɛɛ ra, Ayuba ma jurumun kɛ, a ma kuma bɛnbari si fɔ Ala ma.

Ayuba
<
1
>

*1:1 1.1 Usi jamana tun bɛ Izirayɛli jamana woroduguyanfan ni a terebɔyanfan na, Edɔmu mara ra, Arabi jamana ra (Damina 36.28; Yeremi 25.20; Kasikan 4.21).

†1:15 1.15 Sabekaw tun ye benkannikɛbaga dɔw ye, minw tun bɛ bɔ Arabi jamana woroduguyanfan fɛ, ka na ben mɔgɔw kan kongokolon kɔnɔ.

‡1:17 1.17 O Kalidekaw tun ye kongokolon yaalabaga dɔw ye, minw tun bɛ bɔ Arabi jamana sahiliyanfan fɛ.