36
Elihu ta ladirikan naaninan: Mɔgɔ tɛ Ala sɔsɔ
1 Elihu ka dɔ fara a ta kuma kan tuun k’a fɔ Ayuba ye ko:
2 Ne makɔnɔ dɔɔnin, ne bɛna a ɲafɔ i ye;
sabu kuma dɔ belen bɛ ne fɛ k’a fɔ i ye Ala ta ko ra.
3 Ne bɛna ne ta lɔnniya ɲini fɔ yɔrɔjan,
ne bɛna kuma ka can di ne Danbaga ma.
4 Can ra, ne ta kuma tɛ faninyakuma ye;
mɔgɔ min ta lɔnniya bɔra jusukun gbɛnin na, o tigi le bɛ i kɔrɔ tan!
5 Ala ka bon, a fana tɛ ban mɔgɔ ra;
a baraka ka bon, a hakiri ka bon.
6 A tɛ mɔgɔjugu to a ye si sɔrɔ;
nka a bɛ ɲanibagatɔw ta jo di o ma.
7 A t’a ɲa yɛlɛma k’a kɔ don mɔgɔ terenninw na;
a bɛ o lasigi masasiginanw kan i ko masacɛw,
ka o sabati kosɛbɛ, ka o kɔrɔta.
8 Ni nɛgɛjɔrɔkɔ dɔ ka o siri,
walama ni ɲani benna o kan,
9 o tuma o ta kɛwale min ka o kow lase o ma, a bɛ o fɔ o ye;
o tara wasoya fɛ ka hakɛko minw kɛ, a bɛ o fɔ o ye.
10 A bɛ o toro dayɛlɛ, janko o ye a ta karan lamɛn;
a b’a fɔ o ye ko o ye terenbariyakow dabla.
11 Ni o k’a lamɛn ka sɔn a ta ma,
o tuma o bɛ o ta dunuɲalatigɛ tɔ kɛ hɛra ra,
ka o si tɔ kɛ o diyanyakow ra.
12 Nka ni o m’a lamɛn, a b’a to o ye faga ni taman ye,
o bɛ sa o ta kolɔnbariya kosɔn.
13 Alaɲasiranbariw diminin bɛ to;
hali ni Ala ka o siri ni a ta sirinanw ye, o tɛ kule ko a ye o bɔsi.
14 O kosɔn o bɛ sa ka o to kanbelenya ra,
ka o to ni cɛ jatɔyakɛbagaw*36.14 Cɛ jatɔyakɛbagaw: o mɔgɔw tun bɛ o jatɔya kɛ o ta jobonw le kɔnɔ (Masacɛw fɔlɔ 14.24; 22.47). ye o ta sɔnnikɛyɔrɔw ra.
15 Nka Ala bɛ ɲanibagatɔ bɔsi a ta ɲani sababu ra,
a bɛ sɛgɛ kɛ sababu ye k’a toro dayɛlɛ, janko a ye mɛnni kɛ.
16 Ayiwa, a bɛna ele fana sama ka i bɔ sɛgɛ ra,
ka i laganfiya; foyi tɛna i degu tuun;
domuni dimanw bɛna caya i kɔrɔ.
17 Bi, mɔgɔjuguw ka kan ni jaraki min ye, o le sera ele ma;
jaraki ni kiti benna i kan.
18 Nka i kana ta jusugban fɛ ka i yɛrɛ bla kumakolonfɔ ra;
i kana a to tɔɔrɔ bonyakojugu ye i lafiri.
19 Yala i kulekan bɛ se ka i bɔ i ta degu ra wa,
walama i yɛrɛ ta baraka fanga bɛɛ bɛ se wa?
20 I kana kɔrɔtɔ ko su ye ko,
su min bɛ siyaw ta ka o bɔ o sigiyɔrɔw ra.
21 I yɛrɛ kɔrɔsi, i kana i yɛrɛ bla terenbariyakow ra;
sabu ɲani bɛ se ka i bla o ra.
Ala ta sebagaya ka bon
22 A flɛ, Ala ni a ta sebagaya ka bon.
Jɔn le bɛ se ka mɔgɔ karan i ko ale?
23 Jɔn le bɛ a ta kokɛtaw fɔra a ye?
Jɔn le bɛ se k’a fɔ a ma ko: «I ka kojugu kɛ»?
24 I hakiri to Ala ra k’a bonya a ta kokɛninw kosɔn;
mɔgɔw bɛ dɔnkiri la k’a tando a ta ko minw kosɔn.
25 Adamaden bɛɛ ɲa b’a ra,
mɔgɔw bɛ to fɔ yɔrɔjan k’a ye.
26 Ala ka bon, nka a ta bonya tɛmɛna an ta hakiri dan kan;
a sandaw tɛ se ka jate k’a da lɔn.
27 A bɛ jiw sama ka o layɛlɛn san fɛ,
ka o kɛ sanji ye sankabaw kɔnɔ.
28 Sankabaw bɛ sanji lajigi,
k’a bɔn adamadenw kan caman.
29 Ala bɛ sankabaw yɛrɛgɛ san fɛ cogo min na,
ani sanpɛrɛn bɛ mankan bɔ cogo min na a ta so kɔnɔ, jɔn bɛ se ka o faamu?
30 A flɛ, a bɛ a ta sanmanamanaw bɔ cogo min na sankolo fan bɛɛ ra,
k’a sɔrɔ kɔgɔji jukɔrɔyɔrɔw bɛ dibi ra.
31 A bɛ kiti ben siyaw kan o fɛnw sababu ra,
a bɛ domuni di o ma caman o fɛnw sababu ra.
32 A bɛ sanmanamanaw kɛ k’a borotɛgɛw fa,
ka o ci ka taga o tagayɔrɔw ra.
33 A ta sanpɛrɛn le b’a ko fɔ;
hali bɛganw bɛ bɔ a nako kala ma.
*36:14 36.14 Cɛ jatɔyakɛbagaw: o mɔgɔw tun bɛ o jatɔya kɛ o ta jobonw le kɔnɔ (Masacɛw fɔlɔ 14.24; 22.47).