MALAKI
TA KITABU
Kitabu faamucogo
Cira Hagize ni Zorobabɛli ni Yosuwe sababu ra, Alabatosoba lɔra ka ban. O kɔ, Ɛsidarasi nana Zeruzalɛmu ni Yahudiya caman ye. Ɛsidarasi ka mɔgɔw karan kosɛbɛ Ala ta sariyaw ra. O kɔ fɛ Nehemi nana ka na Zeruzalɛmu dugu kogo lɔ kokura. A ka mɔgɔw karan fana Ala ta sariyaw ra, ka Ala ta Nɛnɛkirilon* ta sariya ko fɔ k’a gbɛlɛya o ma, k’a fɔ o ye ko o man kan ka siya wɛrɛ musow furu. Nehemi nana sekɔ ka taga Pɛrɛsi masacɛ fɛ tuun, nka o kɔ fɛ, a nana tuun, ka na mɔgɔw karan kokura.
Ayiwa, tuma min Nehemi tun sekɔra ka taga Pɛrɛsi jamana ra tuun, o wagati le ra cira Malaki ka ciraya kɛ.
Malaki kɔrɔ ye ko Ala ta ciraden. Izirayɛlimɔgɔw tun ka san biwolonfla kɛ Babilɔni, o juguw ta jamana ra. O kɔ, Ala ka o lana o yɛrɛ ta jamana ra; nka o belen tun bɛ Ala kan blara, ka o yɛrɛ mabɔ Ala ta sariyaw ra.
Cira Malaki tun ka mɔgɔw jaraki o ta kojuguw, ani o ta Alaɲasiranbariya kosɔn. O tun bɛ bɛgan banabagatɔw le di Ala ma saraka ye, ka ban ka yaga bɔ k’a di Ala ma, ani ka o ta furumusow bla ka siya wɛrɛ musow ta; sarakalasebagaw fana tun bɛ mɔgɔw lafiri. Malaki k’a fɔ o ye ko o ka kan ka nimisa o kojuguw ra, ka Ala ta jɛnɲɔgɔnya* ko jate, ka Ala bato ni saraka ɲanamanw ye.
Malaki ta kumaw b’a yira fana ko lon dɔ Ala bɛna a ta ciraden ci ka na, ka na kiti tigɛ a ta mɔgɔw kan, ka o saninya.
«A flɛ, ne bɛna ne ta ciraden ci, janko a ye sira labɛn ne ye. Ni o kɛra, aw bɛ Matigi min ta nawagati makɔnɔna, ale bɛna na ka bara aw ra, ka na don a ta batoso kɔnɔ. Ciraden min bɛna Ala ta jɛnɲɔgɔnya ko fɔ, o ciraden min lɔgɔ bɛ aw ra, ale natɔ le flɛ nin ye! Fangatigi Ala ko ten.»
Kitabu kɔnɔkow
Ala ta mɔgɔw mabɔra Ala ra (1–2)
Ala bɛna a ta mɔgɔw ta kojuguw hakɛ bɔ o ra (3)
1
Ala ka Izirayɛlimɔgɔw jaraki
1 Matigi Ala ka kuma min don ne Malaki da ra, k’a fɔ Izirayɛlimɔgɔw ye, o kuma le ye nin ye:
2 Matigi Ala ko: «Ne ka aw kanu,
nka aw ko: ‹I ka an kanu cogo di le?›
Yala Esawu tun tɛ Yakuba kɔrɔcɛ le ye wa?
Matigi Ala ko ten.
O bɛɛ n’a ta, ne ka Yakuba kanu,
3 ka ban Esawu ra.
Ne k’a ta jamana kuruyɔrɔw kɛ yɔrɔ lakolonw ye,
k’a sigiyɔrɔ kɛ kongowuruw toyɔrɔ ye.»
4 Edɔmukaw bɛ se k’a fɔ ko: «Hali ni an ta duguw cira,
an bɛna o dugu benninw lawuri!»
Nka Fangatigi Ala ko:
«O bɛ se k’a lawuri, nka ne bɛna a ben tuun.
Mɔgɔw bɛna o ta jamana wele ko kojugu jamana,
Matigi Ala ta dimi bɛ jamana min mɔgɔw kan wagati bɛɛ.
5 Aw yɛrɛ ɲa bɛna o ye, fɔ aw bɛna a fɔ ko: ‹Matigi Ala ka bon dɛ!
A ta bonya tɛmɛna hali Izirayɛli jamana dan kan!› »
Ala ka sarakalasebagaw jaraki
6 «Den b’a fa bonya,
jɔn fana bɛ a matigicɛ bonya.
Ayiwa, ni ne ye fa ye,
o tuma ne ta bonya bɛ min?
Fangatigi Ala ko ten!
Ni ne ye matigicɛ ye,
mun le b’a yira ko ne ɲasiran bɛ aw ra?
Aw sarakalasebagaw, aw le bɛ ne tɔgɔ mafiyɛnyara.
Nka aw ko: ‹An ka i tɔgɔ mafiyɛnya cogo di?›
7 Aw bɛ domunifɛn saninyabariw le bla ne ta sarakabɔnan kan!
Nka aw belen ko: ‹An ka i tɔgɔ lanɔgɔ cogo di?›
Aw ka ne tɔgɔ lanɔgɔ sabu aw ko,
ko Matigi Ala ta sarakabɔyɔrɔ ye mafiyɛnyafɛn le ye.
8 Ni aw bɛ na ni bɛgan fiyenninw le ye ka na o kɛ saraka ye,
yala o tɛ kojugu le ye wa?
Ni aw bɛ na ni bɛgan senkelenw, ani bɛgan banabagatɔw le ye,
yala o tɛ kojugu le ye wa?
Aw ye o bɛgan ɲɔgɔn di aw ta jamanatigi ma k’a flɛ kɛ!
Yala a bɛna diya a ye wa?
A bɛna sɔn a ra wa?
Fangatigi Ala ko ten!»
9 «Sisan aw bɛ Ala daari ko: ‹Ala ye sabari ka hina an na!›
K’a sɔrɔ o kow bɔra aw yɛrɛ le ra.
Yala Ala bɛna sɔn ka aw flɛ wa?
Fangatigi Ala ko ten.
10 E, ni mɔgɔ dɔ yɛrɛ le tun bɛ se ka sɔrɔ aw ra, min bɛ taga Alabatoso daw datugu,
janko aw kana to ka taga tasuma don ne ta sarakabɔnan kan gbansan!
Aw ta ko si le man di ne ye!
Fangatigi Ala ko ten!
Ne tɛ sɔn aw boro ta sarakaw si ma.
11 Nka k’a ta terebɔyanfan na ka taga a bla terebenyanfan na,
siya wɛrɛw bɛ ne tɔgɔ bonya.
O bɛ wusunan sarakaw* ni saraka saninmanw bɔ ne tɔgɔ kosɔn;
siya wɛrɛw kɔni bɛ ne tɔgɔ bonya.
Fangatigi Ala ko ten.
12 Nka aw le bɛ ne tɔgɔ lanɔgɔra,
ka to k’a fɔ ko: ‹Matigi Ala ta saraka tabali saninyanin tɛ›,
ani ko: ‹a saraka domuniw man kan ka jate tuun!› »
13 «Aw b’a fɔ ko: ‹E, anw yɛrɛ sɛgɛra sa!›
Aw bɛ ne tɔgɔ mafiyɛnyara o cogo le ra.
Fangatigi Ala ko ten.
Ni aw bɛ na ni bɛgan sonyaninw, ani bɛgan senkelenw,
ani bɛgan banabagatɔw le ye, ka na o kɛ saraka ye;
ne bɛ se ka o mina cogo di aw boro?
Matigi Ala ko ten.
14 Bɛgan cɛman ɲanamanw bɛ mɔgɔ min ta bɛganw na,
nka o bɛɛ n’a ta, o tigi bɛ dajuru ta,
ka bɛgan cɔrɔkɔnin dɔ le kɛ saraka ye ka o di Matigi ma,
o nanbaramɔgɔ ɲɔgɔn danganin lo;
sabu ne ye Masacɛba le ye!
Fangatigi Ala ko ten;
ne tɔgɔ ɲasiran fana bɛ siya wɛrɛ mɔgɔw ra.»