2
Ninive dugu bencogo
1 Mɔgɔ min bɛ nana ni hɛra kibaro diman ye,
o tigi natɔ flɛ kuruw kan!
Zuda mara mɔgɔw, aw ye aw ta ɲanagbɛw kɛ,
ka aw ta dajuruw dafa;
sabu mɔgɔjugu tɛna tɛmɛ aw cɛ ra tuun.
A bɛna halaki ka bɔ yi pewu!
2 Aw Ninivekaw, cɛnrikɛbaga natɔ ye nin ye aw kama!
Aw ye aw ta masabonbaw kɔrɔsi,
aw ye aw janto aw ta siraw ra.
Aw ye aw yɛrɛ cɛsiri,
ka baraka don aw yɛrɛ ra ka jija kosɛbɛ!
3 Sabu Matigi Ala bɛna Yakuba ta somɔgɔw ta bonya lasekɔ o ma,
a bɛna Izirayɛli ta bonya lasekɔ a nɔ ra;
cɛnrikɛbagaw tun ka o borofɛnw cɛ,
o tun ka o ta rɛzɛnsunw yiriborow karikari.
4 O ta kɛrɛkɛcɛw ta nɛgɛbɛnnanw wulennin lo.
O ta cɛfariw ka faniwulenw le don.
O ta sowotorow nɛgɛw bɛ manamana.
O labɛnnin lo kɛrɛ kama;
o ta tamanw yiriw bɛ lamaga!
5 Sowotorow bɛ girin dugu siraw fɛ;
o bɛ boribori kɛnɛgbɛw ra.
O bɛ manamana i ko tasumamana,
o bɛ tɛmɛtɛmɛ yɔrɔ bɛɛ i ko sanmanamana.
6 Ninive masacɛ k’a ta cɛfariw wele,
nka olugu natɔ bɛ talontalonna.
Juguw girinna ka la dugu kogow kan,
o ka o yɛrɛ dogo o ta nɛgɛbɛnnanw jukɔrɔ.
7 Dugu donda minw ɲasinna ba ma, o ka olugu kari ka o ben.
Masaso mɔgɔw jigi tigɛra pewu!
8 O ka dugu ta jo musoman bɔ a dogoyɔrɔ ra
k’a mina ka taga ni a ye.
Muso minw tun bɛ o jantora a ra,
olugu bɛ ŋunana i ko jɛnɛtuganiw,
ka to ka o disi gbasigbasi.
9 Ninive bɛ i ko jimarayɔrɔ min karira k’a ji bɔn.
Mɔgɔw boritɔ flɛ!
Aw ye lɔ! Aw ye lɔ!
Nka mɔgɔ si yɛrɛ t’a kɔ flɛra!
10 Aw ye o ta wariw cɛ!
Aw ye o ta saninw cɛ!
O ta naforo tɛ ban.
Fɛn dawulaman suguya bɛɛ le bɛ o ta naforow ra.
11 Cɛnri, ani ciri, ani cɛri!
Bɛɛ jigi tigɛra, bɛɛ sen bɛ yɛrɛyɛrɛra,
bɛɛ soro tigɛra, bɛɛ ɲada yɛlɛmana.
Ninive baraka banna
12 Jaraw ta dogoyɔrɔ kɛra di le?
Jarakanbelenw ta dinga kɛra di?
Jaracɛ tun bɛ yaala dinga kɔnɔ, ani jaramuso ni jaradenw;
foyi tun tɛ o lasiran!
13 Jaracɛ tun ka sogo caman mina a ta jaradenw ye.
A tun ka sogo caman faga a ta jaramusow ye.
A tun k’a ta dingaw fa ni sogo ye;
a tun k’a dogoyɔrɔw fa ni sogosuw ye.
14 «A flɛ, ne wurira aw kama!
Fangatigi Ala ko ten.
Ne bɛna aw ta sowotorow jɛni ka o kɛ sisi ye.
Aw ta jaradenw kɔni, kɛrɛkɛmuru le bɛna olugu faga.
Ne bɛna aw ta domuni ban dugukolo kan.
Mɔgɔ si tɛna aw ta ciradenw kan mɛn tuun.»