ZANAW
KITABU
Kitabu faamucogo
Ka kaɲa ni mɔgɔ caman ta miiriya ye, Zanaw kitabu fanba sɛbɛbaga, walama a labɛnbaga ye masacɛ Sulemani ye (1–29). Masacɛ Sulemani ka zana waga saba ɲɔgɔn le sɛbɛ. O dɔw bɛ nin kitabu kɔnɔ. Nka hakiritigi wɛrɛw ka nin kitabu zana dɔw sɛbɛ, i n’a fɔ Aguri (sura 30), ani masacɛ Lemuwɛli (sura 31).
Nin zanaw fɔra Yahudiyaw ta zanafɔcogo le ra; o kɔrɔ ye ko o bɛ ko kɛcogoɲuman fɔ, k’a kɛcogojugu fana fɔ:
«Naloman t’a facɛ ta ladirikan jate,
nka mɔgɔ min bɛ sɔn korori ma, o ye mɔgɔ ceguman ye.» (15.5)
Walama ka kɛwale dɔ fɔ, ka sɔrɔ k’a kɔfɛko fɔ k’a la a kan:
«Nɛnɛ kosɔn salibagatɔ tɛ sɔn ka bɔ ka taga sɛnɛ kɛ,
ni simantigɛwagati nana se, a bɛ siman ɲini a tɛ foyi sɔrɔ.» (20.4)
Zanaw kitabu ye hakiritigiyakumaw le ye, minw bɛ mɔgɔ ladi, ka mɔgɔ karan, ka mɔgɔ bla siraɲuman kan (1.4; 4.20). A bɛ kuma ko minw kan, o ye baaraɲuman ta ko ye, ani salibagatɔya, ani adamadenya minacogo, ani terenninya, ani denlamɔcogo, ani muɲuri, ani fagantanw ta ko, ani furu, ani naforo, ani hina, ani ɲumanya. Nka a kunba ye Alaɲasiran ye: «Matigi Ala ɲasiran le ye lɔnniya damina ye» (1.7).
Kitabu sira laban, min ye sura 31, o bɛ muso barakaman le mangutu.
Kitabu kɔnɔkow
Hakiritigiya nafa ka bon (1–9)
Masacɛ Sulemani ta zanaw (10–29)
Aguri ta hakiritigiya kumaw (30)
Lemuwɛli bamuso ta ladirikanw (31)
1
Kitabu sɛbɛkun
1 Dawuda dencɛ Sulemani min tun ye Izirayɛli masacɛ ye, ale ta zanaw le ye nin ye.
2 A sɛbɛkun ye janko ka mɔgɔw sɔn hakiri ra, ani ka o karan,
janko o ye kuma kɔrɔmanw faamu.
3 A sɛbɛkun ye fana janko ka mɔgɔw ladi, k’a to o ye tagama ni hakiri ye,
ka o karan terenninya sira ra, ani can sira, ani siraɲuman.
4 A sɛbɛkun ye fana janko ka nalomanw laceguya,
ka lɔnniya ni miiricogoɲuman don denmisɛnw hakiri ra.
5 Hakiritigiw fana y’a lamɛn, ka dɔ fara o ta lɔnni kan;
faamurikɛbagaw y’a lamɛn, janko ka o tagamacogo lɔn.
6 Ni o kɛra, o bɛna zanaw, ani kuma kɔrɔmanw faamu,
ka hakiritigiw ta kumaw, ani o ta gundow faamu.
7 Matigi Ala ɲasiran le ye lɔnniya damina ye,
nka nalomanw bɛ hakiritigiya ni ladirikan mafiyɛnya.
Denmisɛn ka kan k’a yɛrɛ kɔrɔsi
8 Ne dencɛ, i facɛ ta ladirikan lamɛn,
i kana ban i bamuso ta ladirikan ma;
9 sabu o ye nɛɛma masafugula le ye i kun na,
o ye masirifɛn le ye i kan na.
10 Ne dencɛ, ni jurumunkɛbaga dɔw ko o bɛ i lafiri,
i kana sɔn.
11 Ni o ko: «Na, an ye taga dogo mɔgɔ dɔ ɲa, ka ben a kan k’a faga;
na, an ye taga dogo mɔgɔ jarakibari dɔ ɲa sira ra, ka baga a ma k’a faga.
12 An ye o bɛɛ ɲanaman latunu i ko saya dibi bɛ mɔgɔ latunu cogo min na!
An ye o bɛɛ lajɛnnin latunu i ko o bɛ mɔgɔ lajigi kaburu kɔnɔ cogo min na!
13 An bɛna fɛn nafaman suguya bɛɛ sɔrɔ,
ka o cɛ, ka an ta bonw fa.
14 Ele fana bɛna i ninyɔrɔ sɔrɔ ni an ye;
ni an ka fɛn o fɛn sɔrɔ, o bɛna kɛ an bɛɛ ta jɛn le ye.»
15 Ne dencɛ, i kana tagama ni o mɔgɔw ye;
i sen bɔ o ta sira kan pewu!
16 Sabu o senw bɛ bori kojugu le nɔ fɛ,
o ka teri mɔgɔfaga le fɛ.
17 Nka ni jɔ min sirira kɔnɔw bɛɛ ɲa na,
o jɔ kɔni sirira gbansan le.
18 Nka o mɔgɔ minw bɛ dogo mɔgɔw ɲa, ka na ben o kan, a laban olugu yɛrɛ le bɛna faga;
o bɛ jan min la tɔw ye, o jan bɛna olugu yɛrɛ le mina.
19 Mɔgɔ o mɔgɔ bɛ naforo ɲini benkanni sababu ra, o tigi labancogo bɛ ten le;
o naforo sɔrɔbaga yɛrɛ nin le bɛ to a ra.
Hakiritigiya bɛ adamadenw wele
20 Hakiritigiya bɛ pɛrɛnna siradaw ra,
a b’a kan kɔrɔtara dugu jamalajɛnyɔrɔw ra.
21 A bɛ kule cira jamayɔrɔw ra,
a b’a fɔra mɔgɔw ye dugu dondaw ra ko:
22 «Aw nalomanw, aw bɛna ceguya tuma juman le sa?
Aw kumakolonfɔbagaw, aw bɛna kumakolonfɔ dabla tuma juman le sa?
Aw hakirintanw, aw bɛna sɔn lɔnniya ma tuma juman le sa?
23 Aw ye sekɔ ka na sɔn ne ta korori ma.
Ni o kɛra, ne bɛna ne yɛrɛ nin lajigi aw kan;
ne bɛna aw karan ne ta kumaw ra.
24 «Nka i n’a fɔ ne ka aw wele, aw banna,
ne ka ne boro lɔ aw ye, mɔgɔ si m’a janto o ra;
25 i n’a fɔ aw banna ne ta ladiriw bɛɛ ma,
aw ma sɔn ne ta korori ma,
26 o ra, ni cɛnri nana se aw ma, ne fana bɛna yɛrɛko;
ni jatigɛ nana ben aw kan, ne fana bɛna aw lɔgɔbɔ.
27 Ni jatigɛ nana ben aw kan i ko sanfɔɲɔba,
ni cɛnri nana ben aw kan i ko folonkonto,
ni degu ni kɔnɔnɔfiri nana ben aw kan tuma min na, ne fana bɛna aw lɔgɔbɔ.
28 «O wagati le ra o bɛna ne wele, nka ne tɛna o jaabi,
o bɛna ne ta jɛnɲɔgɔnya ɲini, nka o tɛna ne sɔrɔ;
29 sabu o ka lɔnniya kɔninya,
min fana ye Matigi Ala ɲasiran ye, o ma sɔn o ma.
30 O ma sɔn ne ta ladiriw ma,
o ma ne ta korori jate.
31 O kosɔn o bɛna o yɛrɛ ta kɛwalew tɔnɔ le domu,
o bɛna o yɛrɛ ta ladirikanw tɔnɔ le domu fɔ ka fa.
32 Sabu nalomanw ta yɛrɛlafiri le bɛ o faga;
hakirintanw ta jateminabariya le bɛ o halaki.
33 Nka ni mɔgɔ min ka ne lamɛn, o tigi bɛna sigi hɛra ni laganfiya ra;
a bɛna sigi ɲasuma ra, kojugu si tɛna a ja tigɛ.»