6
1 Isunga kiapú ta makidkidnu kami kan Apo Dios, epakpakaasimi na kan chakayu: Achiyu eparufus ay nan grasyan Apo Dios ay enawatyu at mamaid nan kotokna as nan panagfiyagyu. 2 Tay wacha nan naisurat as nan Kalen Apo Dios ay kanana,
“Chinngorku nan kararagyu as nan timpu ay enkeddengku ay manug-angak kan chakayu, ya finadngak chakayu as nan inumchanan nan ustu ay urkiw ay enkeddengku ay mangesarakanak kan chakayu.”*Isa. 49:8
Chungrunyu na! Ad wani nan hana ustu ay timpu ay mang-awatanyu as nan grasyan Apo Dios. Ad wani nan hana ustu ay urkiw ay maesarakananyu.
Nan Chiyuycha Liglikiat Pablo
3 Achimi laychun ay wachay kaskas-otan nan enpadnon Apo Dios kan chakami. Isunga il-ilaunmi ta maid ekamkamanmi as kiapón chi maesakiawan chi pachongmi ay tataku.†1 Co. 10:32 4 Kunmi at epaila ay munserserfi kami kan Apo Dios as nan am-in ay atunmi. O, anosanmi nan am-in ay mailiwliwas, liglikiat, ya kauugyat ay cha om-ommat kan chakami. 5 Enan-anosanmi ay napakpak-or, naifiarfiarud ya nakurkuru. Nabnabray kami as solet, ya napachasanmi ay chaan nasnassuy ya nangnangan.‡Ara. 16:23; 19:23; 1 Co. 4:11; 2 Co. 11:23-33 6 Epailami us ay munserserfi kami kan Apo Dios babaen as nan nacharos ay ukialimi, pannakaammumi kan Apo Dios, kenamanang-eta-unmi ya nan kenamanangsug-angmi as nan iib-ami. O, epailami chasa babaen as nan pannakafialin nan Espiritu Santo ay wacha kan chakami, ya babaen as nan tit-iwa ay layadmi 7 ya mangisursuruwanmi as nan kenatit-iwa, ya babaen as nan pannakafialin Apo Dios. Wacha us nan kenalintigmi ay inchat Apo Dios ay maepachong as nan fiangkaw ya karasaymi. 8 As nan munserserfiyanmi at mapadpachayawan kami, ya mu mamingsan at mapabpafiainan kami. Masmas-ot kami, ngem mu mamingsan at marisrispitu kami. Uray mu maifilang kami as nangutum, tit-iwa challu nan chami ifiagfiakia. 9 Kanan nan tapina un maid filangmi as tataku, ngem nunchinngor kami met. Kaman kami natuy as nan mangiilan nan tapina, ngem kukutug kami met ay matataku. Maparpaliwasan kami, ngem chaan kami met challu natuy. 10 Uray mu mamingsan at ngumuyus kami, kanayon kami challu ay munlagsak. Uray mu pugli kami, pafiaknangunmi nan ongor ay tataku. Maid kinakumi asna's luta, ngem kuwami nan am-in.
11 Iib-ak ay i-Corinto, maid poros entafunmi kan chakayu, ngem kunmi at infiakia kan chakayu. Ongor pay chi layadmi kan chakayu. 12 Fiakun chakami nan achi manglaylayad kan chakayu, ngem kun at chakayu nan nafiaiw nan layadna kan chakami. 13 Isunga chakayu ay ifilangku as an-akku, pangaasiyu ta sufialetanyu nan ongor ay layadmi kan chakayu.
Nan Tukun Maepangkep As Nan Makekadkadwaan As Nan Achi Omaafurot
14 Achi kayu makius-usa as nan chiyuycha achi omaafurot. Tay ay kun mafialin ay munkatornosan nan nalintig ya nan achi nalintig ay taku? Ay kun mafialin ay munlamong nan lawag ya nan ngongot? 15 Achi poros munpachong nan numnum cha Cristo kan Satanas, isunga achi us munpachong nan omaafurot ya achi omaafurot. 16 Ay kun mafialin ay maetapi nan didiosen as nan templon Apo Dios? Achi! Isunga assesa us kan chitaku, tay chitaku nan templo ay omaafongan nan matataku ay Apo Dios. Tay kanan Apo Dios ay mismu,
“Omafongak kan chicha ya kadkadwaok chicha. Ha-un nan Apo Dioscha ya chicha nan tatakok.”§Lev. 26:12; Jer. 32:38; Pal. 21:3
17 Isunga kanan us Apo Dios,
“Taynanyu chicha ta maisiyan kayu kan chicha. Achi kayu maes-esnop as nan assi ta awatok chakayu.”*Isa. 52:11
18 “Mu hiyasa nan atunyu, ha-untu nan Amayu ya chakayuntu nan an-akku.”
Hiyachi nan kenalen nan Mannakafialin ay Apo Dios.†Isa. 43:6; Jer. 31:9