16
Ayare nya li ka aneb Esowo bako
1 Bade akpohko nya ń kpꞌtahbe re wahn song kak aneb Esowo bako ebo, ana n tongo aneb ero ba li go Galesa, tob limen ano fvfo!*16:1 Gal 2:10; 6:10; 2 Kor 8:7-12; Elt 11:29
2 Ngbokambang efung go erahde, nne awohng awohng ewahne jo yehke akpohko ana á bele no, kuuru go, eji n lꞌba, ń lꞌkꞌtohko kpe ji, tahb na. 3 N lꞌba, ba rehng go, owo m bahke tumu ane bao ba ḿ ma yehke bo, ka bo awer, eji bo lꞌko ayare enyahne, tahm a nya go Jeusalem. 4 Lꞌfere nob re me n tob je, bo li-m ma toono.
Nsol nyi Pol jo tir re á lim
5 N lꞌrehng go Masedonia, m bahke soro rehng go egahne. Tibre mbang a Masedonia nyi m bahke sehnge.†16:5 Elt 19:21 6 Ma m bahke kange a nahna nji. Ma n li ma ba, ba kang a nahne elkoko mal a nji, eji ń lꞌtv-m edi ajehng ajehng ji n lꞌkpe je.
7 Tibre n nehme seb re me n nyehn-n anv, eji n kpꞌsehnge na sehng. N kpꞌsebe re me n kang na abon afung a nahne, Jehova lꞌtaame. 8 M bahke kange ga Efesus tete efung Pentikost rehng.‡16:8 Elt 19:1,10 9 Tibre egburu eyake eltum eblennge ka-m, wo gana, anebekv baa gbalee.§16:9 Ell 3:8; Kol 4:3; 2 Kor 2:12
10 Timoti lꞌba go egahne, vvren ye. Tibre á kpo tob lim eltum Esowo jang jang ana n kpꞌlimi.
11 Nong, nne awohng awohng ki-e bum reed.*16:11 1 Tim 4:12 Tvvn ye go eyebatahng, eji á lꞌfeere ba tob-m ga. Tibre n kp-e siki re á ba, a aneb Esowo bako go.
12 Mmonannee Apollos, n kpo rehk-e re á ba go egahne, a aneb Esowo bako. Anv, we nehme kor re á ba nkpel anyehng anyehng. Á lꞌbel eyake, á bahke bake.
Alum nya Pol ko, kohro nwer nyia
13 Jo baaben! Yiimen tꞌtahne go egahne eltaame! Belen esahb, wahn bel nsahm! 14 Ejum ajehng ajehng ji ń kpꞌlimi, jo limen go elkoro.
15 Abonanee, ń kpꞌkahne re, Stefanas, a nlaaga enye, bo ba gbo mbang taame tv ntul a Jisos go Akaya.†16:15 Rom 16:5 Bobrod elbo kak go eltum Esowo, eji bo lꞌjo kak aneb Esowo ebo. 16 N kp-n rehke re, wahn jo wuk elkohn ane ana bao, a nne awohng awohng no kpo tob lim eltum ana bo, fere jo loko.
17 Eltim ma-m yebe sehng, eji Stefanas, a Fortunatas, go Akaikus bo ma ba. Tibre bo ba li ane ba limi re, me m bel eyebatahng, eji ń ki li. 18 Bo ma-m kak eko, fere tob kak-n eko. Jo kaken ane ba li ana bo.
19 Aneb ero ba li go Esia tong-m re, me n kak-n nnyo. Akwila abola Priskilla nkal ewe, a aneb ero kpee ba kpo je song kono asi go etahk Akwila, bo tob tong-m re, me n kak-n nnyo go mbing nyi Ntul a Jisos.‡16:19 Rom 16:3-4
20 Aneb ero kpee tongo re, me n kak-n nnyo. Eji ń kpꞌkake atemtem nnyo, jo soden atem anyo, ana abonanyehn nne.
21 Mefono antahng Pol, n kpꞌnyono nnyo akake mia go egame ebo. 22 Nne awohng awohng no Ntul a Jisos Kraist tohk-e kor, nkuk a ne!§16:22 Gal 1:8-9 Maranata! (Ji lohngo re, Ntul ewahre, ba!)
23 Nnoobo nyi Jisos Kraist Ntul ewahre jol a nahne.
24 Elkoro ename ni Kraist Jisos jol a nahne wahn ane kpee.
Emen.