5
Ejoro bi Esowo
1 N kpꞌrehke anebkul ero ba wob go egahne ellong, eji me n tob li nnenkul ero,*5:1 2 Jon 1 n fere jol ntianse, n nyehne ana Kraist nyehne erem go egame amahr. M bahke tob jol go ellong ane ba bahke bele ellub ni Esowo bahke lennge. 2 N kp-n rehke re wahn jo baabe ejoro bi Esowo kak-n go ebo. Kana jo lim ana bo bob-n na. Jo limen go elkoro. Kana jo lim eltum nio ana eltum akpohko. Jo limen na a ntim a ntim enyahne.†5:2 Elt 20:28; 1 Tim 3:2-7 3 Kana jo seb re wahn jol atul ba ane bao ba bo kak-n go ebo.‡5:3 2 Kor 1:24 Nobo re wahn jol ane ba ejoro bahke jo leeme eljini enahne, 4 eji ntubesi abaabebul lꞌlohng ba, ḿ bahke bele ekpasi ntul ji ellub ene, ji lꞌkꞌtiki rannge.
5 Ano wo fvfo tob li ka wahn ji li ajangkun re, wahn woomo anebkul go elwo. Wahn ane kpee jo woomen atemtem go elwo.§5:5 Ef 5:21 Jo reden elnahne, tibre nwer Esowo bungu re,
“Esowo kpehme ko ane ba kpo geere,
á kpo ka ane ba ma rede elbo nnoobo enye.”*5:5 Jems 4:6,10
6 Jo reden elnahne go esamahr Esowo bi gbale sehng, eji á lꞌmehl-n wahre go ege a ngare.
7 Jo roden afemfem enyahne kpee, wahn song ka-e, tibre ye wo kp-n tiiri.†5:7 Fil 4:6
Nnehm li ana egabe ji kpꞌbiingi yannge
8 Kana jo lal! Nong, amahr enyahne jol sange sange.‡5:8 1 Tes 5:6 Nnehm nnekv ewahne kpꞌjene yannge, jo biingi ana egabe ji kpꞌsebe nne no á bahk-e bobo li. 9 Yiimen tꞌtahne go mbang nyi Esowo,§5:9 Ef 6:11-13 wahn fere ten nnehm, tibre ń kpꞌkahne re, abon Esowo bako ba li go njini kpee, bo kpꞌtob nyehn erem ana wahn kpꞌnyehne. 10 Eji ḿ ma nyehn erem mmongare ntiil, Esowo bi kpi nnoobo kpee, ye ji yehk-n no re wahn bel ellub ene, ni li go njinanjini, ni li goji Kraist, ye wo bahk-n limi, tete ḿ mal mbang enye go eltoono. Á bahk-n kake atahne, fere ka-n eko, eji nnene lꞌki-n nyeenge.
11 Nong, nsahm jol ka ye go njinanjini. Emen.
12 Me n nyon mmonkpehrekahba mmonwer noa ka Silvanus ji n kpo bum-e ana nkakesehk a mmonannee re, á ko ba ka-n. N kpꞌsebe re me n kak-n eltim fere tong-n re, nsol nyi m ma nyon a, nyi ḿ ma taame tv, fere kpꞌlimi, etingitingi nnoobo nyi Esowo nyi.
13 Aneb ero ba li go Bebilon, ba Esowo ma tob yehke bo kp-n kake nnyo. Mak mmon ewame re, me n tob kak-n nnyo fvfo.*5:13 Elt 12:12,25
14 Jo kaken atemtem nnyo go nnyo asodo mio mi elkoro. Nong, elkoono jol a nahne, wahn kpee ji li ka Kraist.