2
1 N kpꞌsebe re wahn kahn ana n kpꞌnoko go eltum ni n kpꞌlimi ka-n, fere lim ka ane ba li go Laodisea, a ane bako kpee ba kal-m tob nyehn, 2 eji bo lꞌbob eltim, elkoro wahng, bo jol ajehng ana elꞌlehke kpehre a ntem, fere fang go elkahne, kꞌjo bel nfaabe anyehng anyehng, fere kahn ejum ji li mbehr mbehr ji Esowo, ji li Kraist. 3 Goji Kraist wo Esowo behre afang nya elkahne ene kpee, ni á kpꞌkahne.*2:3 1 Kor 1:24,30
4 N kp-n tongo nsol nyia, eji nne awohng awohng lꞌki-n nehm go efoolo nnyo.†2:4 Kol 2:23; 2 Tim 3:5 5 Jol eji n ki lꞌli a nahne go ngubjing, me n noa a nahne go etohko.‡2:5 1 Kor 5:3 Atahng kp-m yebe, eji m ma seb kahn ana ń kpꞌjene go nseenge, fere yiimi tꞌtahne go ekakesehk ji ń kpꞌtoono Kraist.
Jo gberen elnahne, eji nnene lꞌki-n taare afang nya Kraist
6 Anv, eji ḿ ma ko Kraist Jisos kak go egahne atahng ana Ntul ewahne, jo jenen a ne! 7 Rehnen alohk go ege ana eti kpo rehne alohk go ndi, wahn fere gbal go ekakesehk, yiimi tꞌtahne, kꞌtiki yake mbang nyi Jisos, ana bo tib-n no, wahn fere gbal go saam akake.
8 Jo gberen elnahne, eji nne lꞌkꞌrannge ntir atahng enyahne go elkahne nehka nehka ni ane leeme goji babnde ebo, ni ki li ni Kraist, fere nehm-n go awak nya atohko nya li go njini nyia. 9 Tibre Esowo ebtahm kpee woomo Jisos go ege atahng. 10 Owo wahnge ḿ ma bel elkpin kpee, eji ń sehnge go ege, ye ji li ntubesi no atul kpee, a abafiladi.§2:10 Ef 1:21 11 Go ege wo, bo yehk-n nrur, nrur nyehka nyehka sang, nrur ayehke nyi Kraist nyi, nyi lohngo re, nne bahke ludu eso jio ji abiafem tub go.*2:11 Rom 2:29; 1 Pit 3:21 12 Eji ḿ bele ewohngalahb, lohngo re, bo ma-n kpa kak a Kraist. Ewohngalahb ji ḿ bele no ebtob lohng re, wahn ebnyahme a Kraist tib go egahne eltaame, tibre wahn ebtaame tv nsahm nyi Esowo bi nyahm-e go elkv,†2:12 Rom 6:4 13 wahn ji jolo ane ba kpo no tib go egahne abiafem, a nrur nyi ń ki yehke, Esowo ma-n lim re wahn jol go elkpin a Kraist, eji á ma tahm ka-r go egahre abiafem.‡2:13 Ef 2:1,5 14 Yebyake mbong nyi e bel-e no ka-r, nyi e jol tiki gal.§2:14 Mat 18:27 Á yake ka-r, eji á rodo nwer a mbong nyio kum go ekros.
15 Go ekros wo, á ga atul kpee, a abafiladi, fere taare bo nsahm, riki bo ndon go elkab ane, fere kunu bo akpade.
16 Ano wo fvfo ń lꞌkꞌtaame nne awohng awohng jehke ntahm ka-n bada nsol nyi ń kpo li, fere jo wo, afi jolo abarebare afung, afi jolo efung bi ebareka ma lahm, afi fere jolo efung Esabat.*2:16 Gal 4:8-11 17 Nsol nyia kpee li go elfoongo ni nsol nyi kpꞌbake go esꞌsong. Atingitingi nsol li goji Kraist.†2:17 Hib 8:5; 10:1 18 Nong, nne awohng awohng ki-n were taare eltuuru enahne, ye jio ji kpo rede elne ana koro yefono antahng, fere jo kak enjel, jo yiimi go nsol nyi á kil elkahne. Elkohn nne noo kpo bum elne wahre wahre mbol mbol, tib á kpo tir ntir nyehka nyehka nyi ane kpo tir. 19 Elkohn nne noo ebyake eljabbe Kraist ji li esi, ye ji kpo le ngubjing nyi kpi akon, a ajahb, nya kpo lim ngubjing jol anyehng, eji lꞌgbal agbal ana koro Esowo re gbal.‡2:19 Ef 4:15-16
Atahm nya ane kpo tib nya foongo atingitingi atahm
20 Wahn ebkpo a Kraist, fere lohng go elwo ni atohko nya njini nyia. Jen ji wahnge elkpin enahne li ana, are ń kpeke wob go njini? Jen ji wahnge ń kpo bum atahm nyaa ana, nya bungu re,§2:20 Gal 4:3,9 21 “Kana jo kooro nsol nyio! Kana jo li nsol nyio! Kana jo lak abo go nsol nyio!”? 22 Nsol nyia kpee lohngem ejumjum. Ana li no, ano wo bahke toono o tan. Atahm nyaa ana, atahm nya ane fumu no, fere kpꞌtibi nya.*2:22 Mat 15:9 23 Etingitingi, atahm nyaa kpꞌfoongo nya nno, eji kpꞌtibi re, ane jo kak Esowo go bo a nsahm, ana koro bofono, fere jo rede elbo ana koro bo, fere jo bib a ngubjing ebo.†2:23 Luk 18:12 Nsol nyia kpee, nsehng anyehng anyehng limm. Nyao bo kpo lim re, nob a ngubjing ebo, ana bo kpꞌsebe.‡2:23 1 Tim 4:1-3
*2:3 2:3 1 Kor 1:24,30
†2:4 2:4 Kol 2:23; 2 Tim 3:5
‡2:5 2:5 1 Kor 5:3
§2:10 2:10 Ef 1:21
*2:11 2:11 Rom 2:29; 1 Pit 3:21
†2:12 2:12 Rom 6:4
‡2:13 2:13 Ef 2:1,5
§2:14 2:14 Mat 18:27
*2:16 2:16 Gal 4:8-11
†2:17 2:17 Hib 8:5; 10:1
‡2:19 2:19 Ef 4:15-16
§2:20 2:20 Gal 4:3,9
*2:22 2:22 Mat 15:9
†2:23 2:23 Luk 18:12
‡2:23 2:23 1 Tim 4:1-3