4
1 Babnde aju, jo filen aju enyahne nob nob go mbang anyehng anyehng, wahn fere jo buumu re, n tob kpi Nde go ejahbetul Esowo.
Erehke ji Pol gohro rehke aneb ero
2 Belen ekakesehk go ero akake.*4:2 1 Tes 5:17 Jo kunen ekpu ana ń kpꞌkake ero, wahn fere jo kak Esowo saam. 3 Jo tob kaken ero fvfo ka-r, eji Esowo lꞌlennge mbang ka-r, e jo bung akpokosi alum nya Kraist tong ane. Tibre alum nyao nya wahnge n wob go agbekobo. 4 Jo kaken ero, eji n lꞌjo bung go mbang nyi bahke jo lennge alum Esowo, ana fuumu re me m bung. 5 Ń lꞌwoomo go ellong ane ba ki li aneb Esowo, jo bangen! Kana jo rannge ngare enyahne mbol mbol!†4:5 Ef 5:15-16 6 Jo bungen yebe yebe ngare anyehng anyehng, wahn jo semme akang, eji ń lꞌmal jo faange nne awohng awohng nnooba nfaange.‡4:6 Ef 4:29; Mak 9:50
Atem Pol ba bo jo lim eltum ano
7 Mmonanne ejahre Tikikus ji kpo sahb kor-r kor bahk-n tongo kpee bada name. Á li nkakesehk a nlokeltum no Jehova, no kpo tob lim eltum nꞌnehm ana wahr. 8 Ano wo wahnge n tum-e tv-n, eji á lꞌba nyehn ana ń kpꞌlimi, fere kak-n eltim.§4:8 Ef 6:21-22 9 N tumu ye, fere tum Onesimus,*4:9 Fai 10-11 ji li nkakesehk a mmonanne ejahre no kpo kor-r sꞌsehng, ye ji wob go egahne ellong. Bo bahk-n tongo ejum ajehng ajehng ji kpꞌlimi ga.
10 Aristarkus ji e wob ngbekobo ano kp-n kake nnyo.†4:10 Elt 19:29; 27:2 Ano wo fvfo Mak,‡4:10 Elt 15:36-41; 2 Tim 4:11 ji li mmon a Barnabas kp-n tob kak nnyo. M ma-n tohko tong bada ne re, á lꞌba go egahne, wahn vvr-e. 11 Jisos ji bo kpo lung-e re Justus kp-n tob kak nnyo. Ane baa ana ba li aneb Jus, ba e kpo lim eltum ano a bo, ni Jehova, a etul ebe. Bo jo kak-m eltim sehng.
12 Epafras ji lohng go egahne ellong kp-n tob kak nnyo.§4:12 Kol 1:7-8 Á tob li nlokeltum a Jisos Kraist, no kpo buum-n go ege ero bi á kpo kono elkake ngare anyehng anyehng. Á kpo kak ero, jo nok re wahn yiimi tꞌtahne, fere gbal, jo kahn ana ḿ bahke jo toono mbang nyi Esowo, kꞌbel nfaabe anyehng anyehng. 13 N kpo yiim-e ntianse re á jo limi eltum sehng ka-n, fere tob jo lim ka ane ba li go Laodisea, a ane ba li go Hierapolis.
14 Luk ji li nlimakahm no kpo kor-r sꞌsehng, ye a Demas, bo kp-n tob kak nnyo.*4:14 2 Tim 4:10-11; Fai 24 15 Kaken abonanee ba li go Laodisea nnyo ka-m, wahn tob kak Nimfa nnyo, nnenkal no aneb ero bandiki kpo song kono go ege etahk.
16 Ń lꞌlung nwer nyia mal, tumen tv aneb ero ba li go Laodisea,†4:16 Ell 3:14 bo tob lung fvfo, wahn tob lung nwer nyi aneb Laodisea bahke tumu tv-n.
17 Tongen Arkipus re á jo lim eltum ni Jehova m-e ka go nseenga nseenge.‡4:17 Fai 2
18 Me Pol, mefono wo kpꞌnyono nnyo mia mi n kp-n kake go egame ebo. Kana yini agbekobo enyame! Nong, nnoobo nyi Esowo jol a nahne.