1 Elfuulu ni a, ni Mosis nne Esowo biri tv anebe Isreel kehm kpoko. 2 Á bungu re,

Jehova lohngo go ewong Sinayi ba, kehm sake go Siya ya ellennge tub bo. Ano wo á ya no go ewong ji Paran abake. Jehova lohngo go ejang eboblum mfam ba, go ege egbunggbung ewong, a ellong enjel atahl aku akuu enye ba jolo a ne, a agun nya jo lul go ejang eboblum ebe. 3 Bo kp'toono ariidi akpade enya. Etingitingi ji re wo wo ane kor-a no, abarebare ane kpee, wob-a go abo. Go ega akpade wo bo kpee kpo gong go ndi, fere ko elle go ega,

4 Nyia nyi li ntahm nyi Mosis ka-r no, nyi sahb l'li ejum ekpunu ji et'tohngo ji Jekob ma bel.

5 Á jolo ntul no anebe Isreel, ngare nyi atubesi ane ba kono edi ajehng, a atꞌtohngo nya Isreel.

6 <<Nong Ruben lub kpin na, á kꞌkpo, jol ane ebe kꞌjol ntiil.>>

7 Ejum ji a ji á bungu no bada Juda; Jehova wuk eling bi Juda; wo ko-e ba goji ane ebe. Juda kpꞌkoko abo enye antahng jo nok ka elne. Jehova tob-e nok a anebe ejahng ebe! 8 Bada et'tohngo ji Levi, á bungu re, <<Nsol elfaange atubu enya, nya bo kpo lung re Tumim abola Urim li ka nkakesehka nlokeltum ewa. A wuung-e go Massa; fere nok a ne go nkpe alahb ma Meriba. 9 A bungu bade nde a nnyehn re, <Bo me-e nehme lub.> Á liingem abonanyehn ba nlum jol abon ebe á kahnem bo. Wo á kpo baabe alum enya, fere jo kunu amahr go nwongo enya. 10 Bo kpo tib Jekob ajehke enya, fere tib Isreel atahm enya. Bo kpo lim ajom nya insen go ega esamahr, fere lim njom nyi bo kpo jahm fi kpee go ega egudu njom. 11 Jehova lub fuulu agbꞌgbe enye kpee. Nong eltum abo enye jo kor-a. Rum ane ba kp'mehle abohng a ne tub ndi. Raade anebekv ebe bo k'kpe mehl abohng. 12 Bada et'tohngo ji Benjamin, á bungu re, <<Nong akor-m ji Jehova bel erekekv ji lohng go elbaabe ni Jehova. Tibre á kpo konng-e ekum efung kpe kpe. Nong nne noo no kpo kor Jehova kuumu soom, go akpakebahk nya Jehova. 13 Bada et'tohngo ji Josef, á bungu re, <<Nong Jehova ko ebohng bi nno a nno bi kpo na elbung fuulu ndi abo, a alahb ma wob go nla ndi;

14 Nong ndia bo bel elfuulu ni akab nti nya njul ma lim ma bil, fvfo bahke bele akab nti nya nno nnyahng amehng amehng;

15 Nong nti nyi li agburu awong ebo nya mahne mahne nya bo yehke no tokko akab, a nlak nyio nyi awong nya li njinanjini;

16 Nong anoobo nsol rur eboa ndi, elfuulu ni nnoobo nyi Jehova, ye ji bungu alum go ekulegbe ji jo lul agun. Nong nsol nyia kpee gbo kuumu et'tohngo ji Josef. Tibre á jolo ntubesi, go ellong abonanyehn. 17 Go atahne, á li ana ngbokambanga mmona mfong no nlum. Á kpi atang nya mfong nkul. Nyanya á bahke koko jamme ajahbe, afi fere jolo go ejang njini jehko. Ano wo ane atahltahl nkpel ewubu ba Efriim li no, ano wo ane atahla nku aku ba Manase li no.

18 Bada et'tohngo ji Jebulon, a ji Isaka á bungu re, <<Jebulon, jo geeren go egahne ellohngo ni ń kpꞌlohngo. Fvfo nong et'tohngo ji Isaka tob geere go ege abonkpatahk. 19 Bo bahke jo ku ane ba atˈtohngo nyako tahm go awong, wo owo bo bahke song lim ajomjom nya atingi ane; Bo bahke koko anobo nobo nsol go agburu [aya jo le elbo]nya ma, jo le elbo, a atingi nsol afang nya bo behre go erikendi.>> 20 Bada etˈtohngo ji Gad, á bungu re, <<Eltehke ELFUULU] jol ka Jehova, ye ji bahke limi re ndi nyi Gad nyanye, Gad lene o ana Egabe, ji kp'jaake abo afi esi ji nnyam anyehng anyehng nyi jene kabb-e. 21 Ka anebe Isreel, á yehke edi ndi ji ga nob ka anebe Isreel. Bo bum-e erohko ndi ji li ka ntubesi. Eji atubesi ane wane no, á limi nnooba ntoobo nyi Jehova, a elam ji Jehova toobo no bada anebe Isreel.>>

22 Bada etˈtohngo Dan, á bungu re, <<Dan mmon egabe wo, no kpꞌyehbe lohng go Basan.

23 Bade etˈtohngo Naftali, á bungu re, <<Nnoobo nyi Jehova kpꞌgbale asongo asongo ka Naftali. Jehova me-e fuulu gbalee. Ye bahke lehke elkv go ejang eboblum mfam, tete rehng go eto Galili.

24 Bada etˈtohngo ji Aser, á bungu re, <<Aser wo bo ga-e fuulu, go abon ba nlum. Nong abonanyehn jo lim-e nnoobo, á fere ru akpade enye go akehng.

25 Fvfo abil eti mbu nya bahke jolo akuungu, a abil ekpi, fvfo atahne enya bahke kange ana afung kpee nya elkpin ena. 26 Nnene limm no li ana Esowo bi Isreel. Ye ji kun go elbung re á tob-n, fvfo go akparesemsem go ege atahne. 27 Esowo bi li go njinanjini, ye wo li edi elbiiri eja. Abo enye nya kpa-a fili go njinanjini. Á bahke kame anebekv eba, yehke go ega esamahr, fere bung re, <<Ranngen bo.>> 28 Ano wo anebe Isreel bahke jolo go elforo; Et'tohngo ji Jekob bahke jolo go elforo go ndi nyi nkohl a amahm mfemfe, edi ji elbung bahke jo na ebohng.

29 Elfuulu li ka anebe Isreel! Nne awo li ana wo, ane bao ba Jehova ma tahre boa? Ye wo li ekum a ekakebo eja, go ekahngkahng eba bi kpi ellub. Anebekv eba bahke jo kahn gub gub gub ega esamahr. A bahke jo jade bo go akpade.