12
1 Buumu nl'limi ewa
go ngare nyi a kpeka li njangkun,
afung nya atongtong kehm bake,
aya kehm kabbe, nya a bahke bung re, << N kpimm ekor go ejum ajehng ajehng.>>
2 Ngare nyio njul a ellennge,
a ebareka go alonlo bahke daade, siingi ejannge,
fvfo akparesemsem kehm feere elahb l'na mal;
3 ngare nyi ane ba kpo baabe etahk bahke jo kahm,
tib go elfahle, atahntahn aneblum fere jo jen gong gong;
ngare nyi abagoko nsol l'k'kpe jol tibre bo li abon mohk ane abik abik,
fvfo ngare nyi amahr bahke bamme ane ba kpo fahng go mombua nkpe ekahme.
4 Ngare nyi bo ma bame abutahk nya afakabang,
fvfo ewahl nsol agoko fere rahke;
ngare nyi ane bahke nyahme tib eji nruk kp'siiki, wo ase ebo kpee bahke rahke na;
5 ngare nyi ane bahke jo fahl ejum ji kp'wahre,
a efin bi li go afakabang,
eji elrahn almon ma nyono,
fvfo ekpaange kp'feebe asongo,
ejumjum nehm kpe jo tab nne nkpa.
Owo ane kpo tahm asongo go ekehnge ebo ji li njinanjini,
abanoongo elkv fere jo jen yannge go afakabang.
6 Buumu nl'limi ewa, nlehke asilva kehm kimi
fvfo ekpingi agul kehm gboko wa;
etulahb kehm gboko wa go ebgba,
fvfo egare kehm kimi go elbing elahb,
7 fvfo ebtohko kehm feere go ndi nyi lohng no,
etohko feere goji Esowo bi kaa no.
8 <<Ejumjum lohngem! ejumjum lohngem!>> nt'tibi wo bungu.
<<Jol ejumjum ajehng ajehng! Ejumjum lohngem ejumjum.>>
Es'kohro elbungu
9 Nt'tibi jolem na jol nnea ngbere, wo á tob tibi ane elkahne. Á jo tiri bade agaane, jo feede, fere toobo. agaane gbalee bum go ntooranti.
10 Nt'tibi kpo feede eji á l'seb kahn ellum ni fuumu no, fvfo jore ji á nyono no, li songo songo a etingitingi.
11 Alum nya nnea ngbere li ana ebti mbaabebul, alum ebo li ana aba nya bo ma sahb k'kum kak ejum, mbaabebul awohng wo bungu alum nya.
12 Mmon ewame, nong me n rehk-a, re wo k'yehke ntir enya kak go alum anyehng anyehng sehnge nyaa.
Ane nehm ma tiki nyon awer mal, fvfo nne l'ga kpili sehng, á bahke lahnge na.
13 Anv wobwuk nsol kpee;
a wo li es'kohro elbungu nia, nyi li re:
Jo fahl Esowo wo jo bum nkahn enye,
tibre a wo li eltum ni ane kpee.
14 Tibre Esowo bahke lame nne bade ejum ajehng ajehng ji á limi no,
a ejum mbehr mbehr ajehng ajehng,
jol afii nobo na afii sabe na.