10
Atahm li go elfoongo ni atingitingi nsol
1 Atahm nya Moses li go elfoongo ni anoobo nsol nya kpꞌbake, yefono nsol nyio sang.*10:1 Hib 7:19; 8:5 Ajom nyanehm nya Jus kpo lim elya elya. Owo wahnge atahm lꞌkꞌma lim ane ba kpo jeere kohlo Esowo, bo jol go nseenga nseenge go ege esamahr. 2 Jolo jol ano, kehn bo jol rahke ajom alimi. Li re ane ba jo kak Esowo bꞌbar, go bo abiafem nkpelkpel anyehng, kehn Esowo nehme kpe buumu bo abiafem ebo.
3 Wo, ajom nyao nya kpo buumu bo abiafem ebo elya elya. 4 Tibre alung efong, a ma ebul nehm ma tiki ru eltim abiafem. 5 Owo wahnge ngare nyi Kraist yahke ba go njini, á tongo Esowo re,
“A kpehme seb ajom, a ayare.
A toobo ngubjing bum-m.†10:5 Rom 8:3
6 Ajom nya bo kpo jahm nsol fi,
a ajom nya bo kpo lim, eji abiafem lꞌlaade bo, wa kpehme kor.‡10:6 Mat 9:13
7 Owo n kehm bungu re, ‘Nyehn me gana, o Esowo, me m ba re me m ba lim ji kp-a koro, ana bo nyono bada name go nwer Esowo.’ ”§10:7 Jon 6:38
8 Á tohko bung re, “A joom seb ajom, a ayare, a ajom nya bo kpo jahm nsol fi, a ajom nya bo kpo lim, eji abiafem lꞌlaade bo. Nsol nyia wa joom kor.” Á bungu ano, jol eji bo jo lꞌlim ajom nyao ona ana atahm bungu no. 9 Owo á kehm kpe bung re, “Anv, me m ba re me m ba lim ana ji kor-a no.” Jia lohngo re, Esowo ebrange agbokombang ajom fere bum nyi Kraist.
10 Tib eji Jisos Kraist limi ji koro Esowo, owo wahnge e ma bar go egahre abiafem kpee tib go njom nyi á yake ngubjing enye ka nkpelkpel anyehng. 11 Nlimajom awohng awohng kpo yiimi, jo lim eltum ene efung abehng abehng, jo lim ajom nyanehm nkpel tvv, nya lꞌkꞌma ru eltim abiafem. 12 Wo eji Kraist ma lim njom anyehng nyi li ano ano go njinanjini tib esi abiafem, owo á kehm jehke go ejang eboblum bi Esowo, 13 kpꞌsiki tete Esowo lim anebekv ebe, bo jol etikunakpade eje. 14 Tibre go njom nyio na anyehng nyi á limi no, nyi nyi á ma lim ane re bo jol go nseenga nseenge, fere jol ano go njinanjini, bo ji ma bar go bo abiafem.*10:14 Rom 5:18-20 15 Etingi Etohko kp-r tob yiimi ntianse. Tibre á gbo mbang bung re,
16 “A wo li egbanngalung ji m bahke limi a bo.
Afung nyao lꞌsehng, owo m bahke kake bo atahm enyame go bo a ntim, fere nyon go bo a ntir atahng. Ana wo Jehova bungu no.”
17 Owo á kehm kpe bung re,
“N nehm kpe tiki buumu abiafem ebo ebuumubuumu,
a abi nsol nya bo jo lim.”
18 Eji ane ma si bꞌbel eltahmeka go nsol nyio, njom anyehng anyehng kpeem li, nyi bo bahke kpe lim tib esi abiafem.†10:18 Hib 8:10-13
Eltaame, a ekunukpu, go elkoro
19 Owo fvfo abonanee, e kpi esahb ji e bahke ma yel ebkpatahk bio bi Esowo, sehng song yel edi ji sahb bꞌbar tib alung ma Jisos. 20 Á lennge mbang nyi nfenfe go ekpiki ka-r, nyi li mbang nyi elkpin. Ekpiki jio, ngubjing enye nyi.‡10:20 Mat 27:51; Hib 9:24 21 Ana e kpi egburu nlimanjom no kpꞌfili etahk Esowo, 22 nong, wahr jeeren kohlo Esowo a eltim anehng, a eltaame ni e kpꞌbumu Esowo go etingitingi, a agubjing enyahre nya bo ma-r wohngo alahb ma kpꞌwili, a ntim nyi kil jo ka-r ebi, tib eji bo ma-r ru go alung ma Kraist.
23 Nong, wahr yiimi tꞌtahne go ntianse ayiimi ka ekunukpu ejahre, kꞌgbiingi elnahre. Tibre ye ji ma nyam tong-r, fuumu re wahr bum-e go etingitingi.§10:23 Rom 4:20 24 Nong, wahr jo tiren ana e bahke jo melle atemtem, eji e lꞌjo tib elkoro, fere jo lim nnoobo.*10:24 2 Kor 9:2
25 Nong, wahr kꞌjo yaange akon enyahre,†10:25 Mat 18:20 ana egom jindiki kpo kono ellimi, wahr jo kaken na atemtem ntim, gohro tꞌtong ngare nyia nyi ń kpꞌnyehne re, efung bio bi Ntul kpꞌkabbe abake.
Erehke ji li bade elam ji kpꞌbake
26 Eji e ma bel elkahne ni etingitingi jio, fere kpꞌlimi abiafem go elrang, njom anyehng anyehng nyi bahke ruku ntim enyahre, laade abiafem nyao kpeem li.‡10:26 Hib 6:4-6 27 Ji ma sa li re, elfahle ni e jehk a ni kpꞌsiki elam, a amennge agun nya bahke fehke anebekv ba Esowo.§10:27 2 Pit 2:4
28 Nne awohng awohng no lꞌgbo ntahm nyi Moses, bo bahk-e wulu, eji ane abal, ane ara ma yiimi ntianse. Jol ndon anyehng anyehng bo nehm be. 29 Anv, ń kpꞌtiri renan? Elkohn erem abi bahke fuumu a nne no lꞌkadde Mmon no Esowo go akpade, fere rod alung ma egbanngalung ji Esowo bum daange daange daange, ma m-e lim, á ma bar, fere su etohko jio ji nnoobo nyi Esowo?*10:29 Mak 3:29; Jon 16:9
30 Tibre e kpꞌkahne nne no bungu re, “Me wo li mbꞌbongo. Me wo li ntꞌtuuru.” Á kpe bung re, “Jehova bahke lame ane ebe.”†10:30 1 Pit 4:17-18 31 Li emennge ejum sehng re nne gbo yel go abo nya Esowo bi li go elkpin.‡10:31 Hib 12:29
Erehke ji li bade ana nne Esowo bahke jo kpuumu
32 Buumen ana ń jolo wuku wuku, eji ḿ bele ellennge ni Esowo, ana ń jolo go etahntahn ngare, jo kpuumu erem. 33 Nkpel nyindiki bo jo su-n go elkab ane, fere jo nohk-n. Wahn ebjol ana ane bako ba kpꞌtob nyehn erem ano.§10:33 1 Tes 2:14; 2 Tes 1:4 34 Tibre aneb agbekobo jo fil-n ndon. Jol eji bo taar-n taare nsol enyahne go eko, ń yake na go eyebatahng ka go, eji ń kpꞌkahne re, wahnfono antahng kpi nsol nyi ga nob, nyi bahke jolo go njinanjini.*10:34 Mat 6:20; Luk 12:13-15
35 Kana yake Esowo abumu go etingitingi! Tibre bahke kake nne egburu eltuuru. 36 Nobo re wahn jo kpuumu, eji ń lꞌmal lim mbang nyi Esowo, fere bel ji á nyame no. 37 Ana nwer Esowo bungu no re,
“Bahke kpe kang ntiil, nne no kpꞌbake kehm bake.
Á nehm laange.”†10:37 2 Pit 3:9
38 Edi nwer Esowo jehko kpe bung re,
“Etingitingi nne bahke bele elkpin tib go ege eltaame.‡10:38 Rom 1:17; Ef 2:8
Wo, á lꞌjeere, feere njahm, eltim m-e nehm kpe yebe tob-e.”
39 Tibre wahr limm ane ba kpo feere njahm, fere rannge. Wahr ane ba ma taame, fere bel eltahre ba.
*10:1 10:1 Hib 7:19; 8:5
†10:5 10:5 Rom 8:3
‡10:6 10:6 Mat 9:13
§10:7 10:7 Jon 6:38
*10:14 10:14 Rom 5:18-20
†10:18 10:18 Hib 8:10-13
‡10:20 10:20 Mat 27:51; Hib 9:24
§10:23 10:23 Rom 4:20
*10:24 10:24 2 Kor 9:2
†10:25 10:25 Mat 18:20
‡10:26 10:26 Hib 6:4-6
§10:27 10:27 2 Pit 2:4
*10:29 10:29 Mak 3:29; Jon 16:9
†10:30 10:30 1 Pit 4:17-18
‡10:31 10:31 Hib 12:29
§10:33 10:33 1 Tes 2:14; 2 Tes 1:4
*10:34 10:34 Mat 6:20; Luk 12:13-15
†10:37 10:37 2 Pit 3:9
‡10:38 10:38 Rom 1:17; Ef 2:8