10
Eying ji atahm ebmal
1 Abonanee, ntir enyame ga li re Israel bel eltahre. Ejum ji o ji, n kpo kak ero ka Esowo. 2 N kpꞌyiimi bo ntianse re bo kpo kak ekpuku go eltum Esowo alimi, wo, bo kpo lim aji aji.*10:2 Mat 23:15 3 Bo joom kahn eno alehke ji Esowo. Eji bo jo gare re bo li eno go bo a ngang antahng, bo tene eno ji Esowo. 4 Tib eji Kraist ma ba, eying ji atahm ebmal. Nne awohng awohng no lꞌtaame tv-e, á bahke lehke eno go esamahr bi Esowo.†10:4 Mat 5:17; Jon 3:18; Hib 8:13 5 Moses bungu bade eno alehke ji atahm re, “Nne no lꞌbum atahm, atahm nya bahke wahnge á bel elkpin.”
6 Nwer Esowo bungu bade eno alehke ji eltaame re, “Ka jo bung go ega eltim re, ‘Nne awo bahke wahre song rehng go ejahbetul?’ ” Jia lohngo re, á song ko Kraist badde a ne.‡10:6 Mak 10:27 7 “Ka bung re, ‘Nne awo bahke badde song rehng ejahbe akvne?’ ” Jia lohngo re, á song nyahme Kraist ba a ne.§10:7 Rom 8:3
8 Anv, nwer Esowo bungu renan? Bungu re, “Alum Esowo li a na bad bad, kun-a go nnyo rib rib, fere wob-a go eltim.” Alum nyaa alum eltaame nya, nya e kpo bung.
9 Tibre a lꞌfere yiimi ntianse re, “Jisos Ntul wo,” fere taame go ega eltim re, “Esowo nyahm-e nyahme go elkv,” a bahke bele eltahre. 10 Tibre nne no ma taame go ege eltim, ye wo ma li eno go esamahr bi Esowo. Nne no kpꞌyiimi ntianse ka Jisos, ye wo ma bel eltahre.
11 Tibre nwer Esowo bungu re,
“Nne awohng awohng no lꞌtaame tv-e,
bo we nehm riki ndon.”
12 Elyaange anehng anehng limm, afi jolo Jus, afi jolo Grik. Ntul nonehm wo li Ntul no ane kpee, no kpo ka ane afang enye, ba lꞌgboong-e go ege a mbing.*10:12 Elt 10:34 13 Ana nwer Esowo bungu no re, “Nne awohng awohng no lꞌgboongo Esowo go mbing nyi Ntul, á bahke bele eltahre.”
Anebe Israel, a ane baka baka
14 Anv, ane bahke limi renan kehm gboongo Esowo, eji bo kala taame tv-e? Bo bahke limi renan kehm taame tv-e, eji bo kala wꞌwuk bada ne? 15 Anv, ane bahke limi renan kehm bungu alum Esowo, eji bo ki tum bo?†10:15 Jon 20:21; Mat 28:19-20 Ana nwer Esowo bungu no re, “Elbake ni ane ba kpo tiingi nnoobo etib kpꞌbake, emnob sehng.”
16 Ane kpee sang ma taame tv nnoobo etib bio. Tibre Aisaya bungu re, “Ntul, nne awo no ma taame tv etib ebahre bi e tiingi no?”
17 Eltaame kpo lohng go elwuku ni ane kpꞌwuku nnoobo etib. Nnoobo etib bio kpo lohng go alum nya Kraist.‡10:17 Jon 17:20
18 N kpꞌbahbe re, Anv, bo ka wuk etib bioa? Eꞌee, bobwuk! Ana nwer Esowo bungu no re,
“Alum nya alokeltum Esowo bungu no ebgan go njini kpee,
ebyeere rehng nkpohka njini anyehng anyehng.”
19 N kpꞌkpeke bahb re, Anv, abone Israel kahnem ana lohngo noa? Moses gbo mbang bung re,
“M bahke limi, aneb mbol mbol jo teel-n ala.
M bahke koko agboolo ane, jo lim atahng jo rak-n.”
20 Aisaya tob bungu a esahb esahb re,
“Ane ba ki-m jo seb,
bo ma-m nyehn.
Me n lennge elname tib ane ba n ki jo lub bo.Ӥ10:20 Rom 9:30
21 Esowo bungu bada Israel re,
“Efung kohro kohro bi n nyange abo enyame
re me n vvrv ane ba ki-m jo wuk,
ba jo faang-m go nnyo.”*10:21 Mat 23:37