1 Paata ya toole, Nnyizinku khumparikhiya Suhura, khunrettela etile aamwaahitiyeeyo. 2 Suhura khwiimittha khumpattha mwaana wa Eburahiima ari wa wuuluvala, wakathi otthuupule Nluku aamuuziyeeyo. 3 Mwaana otule aavokoliweeyo ti Suhura, Eburahiima khuntthaja nzina la Esiyaakha*‘Esiyaakha’ maana aya ‘atheya’.. 4 Siikhu yanaane, Eburahiima khunthuula mwaana otule khulawa onkhiriyisa nkhama etthiipo Nluku anrumiyeezo. 5 Wakathi Eburahiima ampatthiyeevo mwanawe Esiyaakha, aarettiye arina nyaakha miiya.

6 Suhura khuri: “Nluku akinkha otheya, na atthu ooshi apale anttelaaye osiila anttela otheya vamote na-miyo.

7 Paani aari waakanyeraaye yoori Eburahiima aari oteela ompatthela mwaana Suhura? Na wuuluvala wawe, miiyo kampatthela mwaana!”

8 Mwaana otule khusala awula mpakha ofiyelela olikha nziwa. Alikhiyeevo nziwa mwaana otule, papaawe khuretta njampo la furaha.

9 Ila Suhura khumoona Esumayila mwaana wa Hajira mmisuri, otule aavokoliweeyo ti Eburahiima anveyisaka mwanawe. 10 Suhura khulawa omuuza Eburahiima yoori: “Omwiikare njaazi otule na mwanawe. Ye khanteela orithi vamote na mwanaka Esiyaakha.”

11 Eburahiima khwiiya woozinkireya na kuvu na mattakhuzi apale mwaasa wa Esumayila wiiya mwanawe. 12 Aphano Nluku khumuuza Eburahiima yoori: “Ohizinkireye mwaasa wa mwanawo na njaazi awo, osiileze etile aniwuuzaaye Suhura, mwaasa yoori peewu yawo enttela olankha vakatthi wa Esiyaakha. 13 Mwaana wa njaazi otule onteela wiiyana omathi wa waatta mwaasa yoori na-ye peewu yawo.”

14 Mmeesho mwaya, Eburahiima khuthuula phaawu na ttompwiyo ya maati, khunvikelisa Hajira khunleeza vamote na mwanawe. Yo khusala alawa ajeettettelaka n'yaara ya Beeresheba ahijuwaka ohali anttaawo.

15 Wakathi amwiisheliyeevo maati nttompwiyo, ye khunlikha mwanawe nshini wa muutthi. 16 Khulankha khulawa khwiikhala ohali woolepawo vattitthiiru na okhule aariiwo mwanawe, mwaasa yoori khaari otakha omoona mwanawe afwaka. Eekhaliye etthiipile, khusala alila.

17 Nluku khusiila theenya huula ya mwaana otule eettaka olila. Nlayikha la Nluku khukhuwa pinkuuni linkhuwelaka Hajira, khumuuza yoori: “Wakafilikhela-ni Hajira? Ohoove, Nluku asiila huula yawe mwaana oto alilaka vahali ariivo. 18 Olankhe onlanse mwanawo onkholele nkhono, phantte yawe kinteela waattisa omathaawe.”

19 Elottelanaka Nluku khunthoonyeza Hajira nlipu wa maati, khulawa khuttekhelela ttompwiyo yawe khunnywisa mwanawe.

20 Esumayila khusala awula mmakhono wa Nluku. Ye aari wiikhala n'yaara na aari njuwi wa weesa mattetthe. 21 Aari wiikhala n'yaara ya Paraani, mamaawe khumweekesela muukha wa Misuri khunlooza.

22 Wakathi aya opo, Apimeleekhi aalokoziwe ti Fikhoole namalokozela wa anajanka, khumuuza Eburahiima yoori: “Nluku ori vamote na-weyo khwa wakhula etile onrettaaye. 23 Nasaapi ethiiti olaphe khwa nzina la Nluku yoori khunteela okihata miiyo wala aanaaka ama otuulwaka, nkhama etthiipile kuuretteliyeezo zooshapweya, na-miyo okirettele etthiipo na mmuti mphu oniikhalaamo.”

24 Khujipu Eburahiima araka: “Miiyo kinlapha”.

25 Attaaphale Eburahiima khusala ajiliza mwaasa wa nlipu aanyakanyiweeyo pi akarumeyaawe Apimeleekhi. 26 Apimeleekhi khunjipu: “Miiyo akaajuwiyevo etthu na khawaakuuziye, kintta osiilaru nasaapi ethiiti.”

27 Aphano Eburahiima khuthuula pwittipwitthi na mompe khumwinkha Apimeleekhi. Oowiiri aya khusiilana. 28 Elottelanaka Eburahiima khuphakula pwittipwitthi sapa za nliphanko lawe. 29 Apimeleekhi khumuuzela yoori: “Pwittipwitthi epo sapa omphakulaaye maana aya niini?”

30 Eburahiima khujipu: “Okhupalele pwittipwitthi epi sapa kiniwinkhaaye khwa lifunku looshaahiti yoori nlipu opu ti miyo kithipiyeeyo.”

31 Pi apho puuro yaya eto eniitthiwaaye Beeresheba†Beeresheba maana aya “nlipu woolaphisaniwa” ama “nlipu wa sapa”., mwaasa yoori oowiiri aya aalaphisaniye attaapho.

32 Paata yawiisha oosiilana opule Beeresheba okhule aariiwo, Apimeleekhi na Fikhoole namalokozela wa anajanka, khurutela nti wa Afiliishiti. 33 Eburahiima n'oosala Beeresheba okhule khuzala muutthi wa nkolokope, khumwaaputu Nnyizinku, Nluku wa Mileele. 34 Ye khwiikhala nti wa Afiliishiti khwa nyaakha za waatta.