1 Siikhu moote, Tiina mwaana wa Yaakhumpa na Liiya, aalankhiye olawa owaathotola aanaakha a nti otthuupule. 2 Shekemu mwaana wa Hamori nhiivi mfwalume wa nti aya opule, n'oomoona, khunkhola khunjansili. 3 Erettiyeevo toole khwiiya wootuveliwa ti Tiina mwaana wa Yaakhumpa, khumpheta, khumuuza mattakhuzi oomwiitthaaza rooho. 4 Shekemu khumuuza Hamori papaawe yoori: “Mwakuurele mwaari otu kinrale.”

5 Wakathi Yaakhumpa asiiliyeevo yoori mwanawe Tiina ajansiliwa ti Shekemu, aarettiye aanaawe ari ntthuttu ashukisaka nyama. Ye khunyamala khusala awaaweja aanaawe mpakha oruti.

6 Khulankha Hamori paapa wa Shekemu olawa ottakhulana Yaakhumpa. 7 Wakathi arutiyeevo aana a Yaakhumpa ntthuttu, n'oosiila vitthu epile yo khwiiya ooshanka channu, khuweephiira mwaasa yoori Shekemu aarettiye etthu yoopatthisa haaya vakatthi wa Meezirayeele, onjansili mwaana wa Yaakhumpa; eto etthu yahaari orettiwaayo.

8 Hamori khuwooza yoori: “Mwanaka Shekemu atuveliwa ti mwanenu, apho safwatali mwinlooze eeye muukhaawe. 9 Nirette ojama; aaneenu awaarale aaneetthu, na apa eetthu awaarale eenu. 10 Mwiikhale vamote na-fweyo, nti opu pu weetthu mwithawule wakhula phantte mwintakhaaye. Mwiikhale nttumphu mwirette zanshara zenu mpakha muuzanye nti eenu.”

11 Aphano Shekemu khumuuza papaawe Tiina na alupuwe yoori: “Safwatali mwikikhupalele mattakhuzi apa, kintta owinkhani wakhula etile mwinttelaaye olupa. 12 Mwilupe mahari a waatta a mwanenu na tthuvo mwintakhaaye, kintta wuuriphani khwa nanna mwintakhaazo okuuza, ila mwikilooze.”

13 Aphano aana a Yaakhumpa khunjipu Shekemu na papaawe wonhatavo, mwaasa wonjansili nlupwaaya Tiina. 14 Khunjipu yoori: “Khaninwahi onthuula nlupweetthu khunlooza nlume woohikhiriyi koma, enttela wiiya haaya. 15 Fweeyo ninkhupali wuuloozani nlupweetthu amana alume ooshi a mmuti mwenu eeya ookhiriya koma nkhama fweeyo. 16 Toowo phi ninttelaavo wuuloozani aaneetthu na-fweyo owaarala aaneenu, ninttela wiikhala vahali vamote niiye ojama mmote. 17 Ila amana mwihikhupali okhiriya koma, nintta onthuula mwanetthu nileemo mmuti mwenu.” 18 Mattakhuzi apale Hamori na mwanawe Shekemu khukhupalela. 19 Shekemu, shapu wooshitahiwa pi atthu ooshi a vaje wa papaawe, khuhirupazi khulawa khuretta etile aavekeliweeyo mwaasa wontuvela mwaana wa Yaakhumpa.

20 Hamori na mwanawe Shekemu khulankha khulawa vanlako*‘Nlako wa sitati’ yaari puuro yaazoweriweevo zaari ottakhuliwakaavo milattu na vitthu za zanshara. Moone suura 19v1. wa sitati ethiitile owooza alume ooshi araka: 21 “Atthu apa pi oosiilaneya, nlaweni niwaalikhe eekhale mmuti mwetthu mphu arettaka zanshara zaya. Nti opu nwulweene ewaamo puuro eniwaafiyelaaye, anilooze aanaaya na-fweyo niwaalooze aaneetthu. 22 Ila yo ankhupali wiikhala vamote na-fweyo khwiiya ajamaazetthu amana alume ooshi akhiriya koma nkhama etthiipo na-yo akhiriyiyeezo. 23 Nyama zaya zooshi na mali zaya zooshi zinttela wiiya zeetthu; nlaweni nikhupalele shawuri zaya yoori eekhale vamote na-fweyo.”

24 Alume ooshi apale aakusanyeyiyeeyo vanlako wa sitati khukhupalela mattakhuzi apale aalupiyeeyo Hamori na mwanawe Shekemu; alume ooshi a sitati ethiitile khukhiriya koma.

25 Siikhu yattaatthu, wakathi alume apale aari woonachaavo olwaaza, aana awiri a Yaakhumpa, Simiyooni na Leevi alupuwe Tiina, khuthuula phanka zaya, khweetta nsitati mphule woohijuwiwi ti hatha ntthu. Khuwoola alume ooshi. 26 Khumuula Hamori na mwanawe Shekemu. Khunthuulawo Tiina owawe Shekemu khusala alawa. 27 Khuta aana a Yaakhumpa apale akina ositati ottuukhule ooliiweewo atthu, khuttapwattha vitthu za mali mwaasa woojansiliwa nlupwaaya. 28 Khuthuula liphanko la pwittipwitthi, la puuzi, mompe, na apuuru, na vitthu zaari nsitati nttumphule na epile zaari omashapa. 29 Yo khuwaathuula aakha na aanaaya na vitthu zooshi za mali zaari mmamanyupa mwaya.

30 Aphano Yaakhumpa khumuuzela Simiyooni na Leevi yoori: “Mweeyo mwakizinkula! Mwaretta yoori atthu apa aniikhalaaye nti otthuupu, Akanaani na Apirizi asala eephiiriwa ti miyo. Fweeyo khanaatteeni, yo amana akusanyeya ateela okuumanana antta okuula na ajamaazaku.”

31 Yo khujipu araka: “Ti yooshapweya yo onretta omalempe nlupweetthu?”