1 Aarivo mwinyi mmote aariwitthiwaaye Laazaru ye aari wa nti wa Betaaniya, ottuukho aari wiikhalaawo Mariyamu na ttwiiye Maarata. Laazaru otule khwiiya nlwele. 2 Mariyamu otu, nlupuwe Laazaru aari olwaaziwaaye, ti otule aavaziyeeyo mafuttha oonukhela moolu a Yinsa khukukuttha na nyuuli zawe. 3 Alupuwe khunruma ntthu olawa omuuza Mbwana yoori: “Mbwana, jiraani awo nlwele.”

4 Wakathi Yinsa asiiliyeevo vitthu epile khuri: “Olwele aya opo khunlawa omuula, pi wa siifwa ya Nluku, yoori Mwaana wa Nluku asifwiwe khwa olwele otthuupo.” 5 Yinsa aari ompheta Maarata, Mariyamu na Laazaru. 6 Ila wakathi asiiliyeevo olwele opule aarupaziyewo siikhu piiri okhule aariiwo.

7 Nawiisha khuwooza anakhiyoni awe yoori: “Nlaweni theenya nirutele Yudeya.”

8 Anakhiyoni khulupa araka: “Rabi, onfwahamu yoori khwa siikhu vattitthiiru mayaahuuti aari otakha wuuvonya, apho onrutela ottuukho?”

9 Yinsa khujipu araka: “Nthana khuna wakathi khumi na miwiri? Ntthu amana eettetta nthana khankwakwattuwa, maana onoona nuuru ya olumwenku otthuupu. 10 Ila amana ntthu eettetta osikhu ontta okwakwanttuwa maana khiniiyavo nuuru.”

11 Paata ya olupa toowo, khurutela theenya araka: “Swaahipu eetthu Laazaru ontta olala, ila miiyo kineetta ottuukhu kanlanse.”

12 Aphano anakhiyoni awe khumuuza theenya yoori: “Mbwana, nkhama ye ontta olala, onvona.” 13 Ila Yinsa aari olupa yoori Laazaru afwa. Ila yo aari waakanyera yoori aari olupa osikizi paasi.

14 Aphano Yinsa khuwooza saana yoori: “Laazaru afwa, 15 ila Miiyo ki woofurahi mwaasa woohiiwo okhuwaya, maana toowo mweeyo mwinttela okikhupali. Nlaweni mpakha owawe.”

16 Aphano Tome aari wiitthiwaaye Maphapo khuwooza anakhiyoni azaawe: “Nlaweni nafwe vamote na-ye.”

17 Wakathi Yinsa afiiyeevo ansikaniye Laazaru azikhiwe ziviriyeevo siikhu nne. 18 Betaaniya waari kharipu kiyasi ya mwentto wa phiima alufu ttatthu olankha Yeruzaleemu, 19 na mayaahuuti enkeene aalawiye onthotola Maarata na Mariyamu na onzuru mwaasa wa opwetheyiwa ti nlupwaaya. 20 Maarata noosiila yoori Yinsa ontta ota khunthepeeza, ila Mariyamu aasaliye eekhaliye onti.

21 Maarata khumuuza Yinsa yoori: “Mbwana, eriwaka waarivo, nlupwaaka khaari ofwa. 22 Ila theenya kinjuwa yoori hatha nkhama nasaapi eti, Nluku oniwinkha wakhula etile oninvekelaaye.”

23 Yinsa khumuuza: “Nlupuwo onteela osisimuwa.”

24 Maarata khuri: “Miiyo kajuwa yoori onsisimuwa va osisimuliwa wa siikhu ya mwiisho.”

25 Yinsa khulupa araka: “Miiyo ki osisimuwa na ohaayi; otule anikaaminaaye miiyo hatha nkhama eetta ofwa oniiya ohaayi, 26 na wakhula otule ari haayi na khukaamini miiyo khanfwaru. Weeyo onkhupali epo zaya?”

27 Ye khujipu yoori: “Miiyo, Mbwana kinkhupali yoori o Al-Masiihu, mwaana wa Nluku, aari weettelaaye ota voolumwenku.”

28 Paata ya olupa mattakhuzi apale, khulawa owawe na khunkhuwelela Mariyamu othetekele khumuuza yoori: “Oo, Mwaaliimu otu ari apha onuukhuwela weeyo.” 29 Wakathi Mariyamu asiiliyeevo mattakhuzi apale, khulankha nasaapiru na khulawa okutthanana Yinsa. 30 Yinsa nalelo aari ahinafiye oluwani, ila aari ottuukhule Maarata eetteliyeeyo onkutthananawo. 31 Mayaahuuti aari nnyupa na Mariyamu, aateliyeeyo onzuru, khusala oopuwela yoori ye aari weetta ovilalo yoori alile ottuukho. Na-yo khulankha khusala anlotta. 32 Wakathi Mariyamu afiiyeevo aphale aariivo Yinsa, noomoona khunkokhorela moolu awe khumuuza yoori: “Mbwana, eriwaka waari attaapha nlupwaaka khaari ofwa.”

33 Yinsa amooniyeevo eettaka olila na mayaahuuti apale aataniyeeyo, ye khwiiya wawantipweya nroho mwawe venkivene na wooshukulikha.

34 Ye khuuzela yoori: “Mwanzikha vayi?” Yo khujipu yoori: “Mbwana, ote omoone.”

35 Yinsa khulila.

36 Mayaahuuti khulupa yoori: “Mmoone nanna aari omphetaazo!”

37 Akina khusala alupa yoori: “Otu aari owaavonisa apale ohooni, khaari owahi oretta etthu Laazaru khuhifwi?”

38 Yinsa nalelo ari woohuzunikha khulawa ovilalo. Yaari likurakuza laattiyelelaniweeyo liwe liwululene va nlako vaya.

39 Yinsa noofiya khulupa yoori: “Mwilazevo liwe nttho.” Maarata khulupa araka: “Leelo ona siikhu nne; aaza onukha.”

40 Yinsa khunjipu yoori: “Akaawuuziye yoori amana okhupali ontta woona siifwa ya Nluku?”

41 Aphano yo khulazavo liwe ntthile. Yinsa khweekesa otulu khulupa yoori: “Paapa, miiyo kinuushukhurwela mwaasa wookisiila. 42 Miiyo kinjuwa yoori weeyo onikisiila wakathi wooshi, ila mwaasa wa khuntti eti ya atthu apa ariivo ti eto, kinlupaaye toowo yoori yo apatthe okhupali yoori weeyo ti okiperekhiyeeyo.” 43 Paata ya olupa toono, khukhuwa venkivene araka: “Laazaru, osaruwele oje okhuno!” 44 Otule aafwiyeeyo khusaruwa, moolu awe na makhono awe ari oopachiwa na tarapu na wuuso awe na makhono awe khuzukulelisiwa. Aphano Yinsa khulupa yoori: “Mwintaphule tarapu eto mwinlikhe alawe.”

45 Mayaahuuti enkeene alawiyeeyo onthotola Mariyamu, ooniyeevo vitthu epile arettiyeeyo Yinsa, yo khunkhupali. 46 Ila akina khulankha olawa owooza mafwarizeewu monkoni wa epile Yinsa arettiyeezo. 47 Aphano mahaakhimu a tiini na mafwarizeewu khuwaakhuwela mashawuriiya khusala awooza yoori: “Niri je? Okho owaakho mwinyi oto anrettaaye alama zawaatta za minjuza. 48 Amana ninlikha etthiipo, atthu ooshi antta onkhupali na antta ota arooma aninyakanye puuro yeetthu ttakatthiifu na nti etthu.”

49 Aphano mmote wa-yo, aari wiitthiwaaye Kayifwa, aari haakhimu nwulu wa tiini wa mwaakha aya opule, ye khulupa yoori: “Mweeyo khamwinjuwa hatha etthu! 50 Khamwinjuwa yoori afwataali ofwa ntthu mmote awaafwelaka atthu ooshi zayita olikha khapila zooshi waashikha.” 51 Wakathi aya opule Kayifwa khaari ojilupa mweenyewe. Ila mwaasa wa yoori ye aari haakhimu nwulu wa tiini mwaakha aya opule, etta ohupiri yoori Yinsa aari oteela ofwela khapila ya mayaahuuti, 52 khahiyo paasi khwa khapila ya mayaahuuti, ila theenya yoori awaakusanye khwa mwiili mmote aana a Nluku apale amwazeyiyeeyo. 53 Waaza siikhu ethiitile khusiilana omuula.

54 Khwa ethiito Yinsa khuhisala ajithoonyeza vakatthi wa mayaahuuti, khulawa nti waattameliyeeyo n'yaara waari wiitthiwaaye Efwarayiimu. Khwiikhala ottuukho na anakhiyoni awe.

55 Yaarettiye esaleelaka ofiya siikhu ya Paashikowa wa mayaahuuti, atthu enkeene a nti aya opule aalawiye Yeruzaleemu olawa ojitwaharesha ehinafiye siikhu ya Paashikowa 56 Yo aari omweekesa Yinsa oozelanaka ari vaje wa Nnyupa Woosifwiwamo: “Nkahayani niri toovi? Talili onta vanjampo?” 57 Ila mahaakhimu a tiini na mafwarizeewu aarumiye yoori, amana ntthu amoona Yinsa vahali ariivo, awooze, yoori yo alawe ankhole.