1 Siikhu moote, Yinsa aari nshini wa ntthatta la Kalileya, khuzukuleliwa pi atthu a waatta yoori asiile nttakhuzi la Nnyizinku. 2 Ye khoona nyaatiya miwiri ziri vapatari wa ntthatta nttintthile, zaalikhiweevo pi anamajiya aari woosaaye matthavi aya. 3 Yinsa khupakhira mmwaatiya mmote waari wa Simawu khunvekela yoori asusisele mpahari, khwiikhala khusala awaanozela atthu.

4 Nawiisha onozela khumuuza Simawu yoori: “Othuule mwaatiya awo mwilawe vahali wa wiichavo mwajiye.”

5 Simawu ajipwaka khuri: “Mbwana, najiya osikhu na osikhu khuhipatthi etthu, wiiya walupa yoori neese, nintta weesa.”

6 Yo khulawa khweesa matthavi aya khuula swi za waatta mpakha khusala avaruwa matthavi aya. 7 Khuwaakhuwela ashirikhaaya aari mwaatiya nkina yoori ate arinkaanyele, khwiitaaza nyaatiya zaya zoomiwiri mpakha osaleela ozama.

8 Simawu Peeturu nawoona etthu etile yaarettikhaniyeeyo, khunkokhorela Yinsa amuuzaka yoori: “Mbwana, okisuse maana miiyo ki natwampi.” 9 Simawu na ashirikhaawe khuzinkuwa mwaasa wa swi epile za waatta apatthiyeezo. 10 Yaakhumpa na Yaahaya, aana a Zebedayo, ashirikha a Simawu aari ojiyanaaye khwiiya ootikinisiwa.

Aphano Yinsa khumuuza Simawu yoori: “Ohoove, waaza nasaapi eti onttela wiiya namajiya wa atthu.” 11 Khuwelelisa nyaatiya zaya nkulu, khulikha vitthu zaya zooshi khusala anlotta Yinsa.

12 Yinsa ari sitati moote, khuvira mwinyi mmote aariina makuttula. N'oomoona Yinsa khukokhora khusijiti khumuuza araka: “Kinuuvekela yoori nkhama watakha Mbwanaaka, kivonise.”

13 Ye khookola nkhono awe khunsapa khumuuza yoori: “Katakha vona!” Wakathi otthuupule khweele khuvona.

14 Yinsa khumuuza yoori: “Vitthu epi ohimuuze hatha ntthu, ila olawe wajithoonyeze wa haakhimu wa tiini, othuuto oorettele twaha yoovonisiwa wawo nkhama etthiipile alupiyeezo napiyu Munsa, yoori wiiye oshaahiti vakatthi wa atthu aya apale.”

15 Aphano hapari zawe zaari ovira zimwazeyaka. Atthu a waatta khusala ata oteela osiila hapari, na oteela ovonisiwa marati aya. 16 Yinsa aari olaakavo n'oolawa makuluttu olompa.

17 Siikhu moote Yinsa eetta onozela, apho vaya aari onozelaavo aarivo mafwarizeewu na anamanozela a kano aalankhiyeeyo miti mikina za Kalileya na Yudeya mpakha Yeruzaleemu. Owahi wa Mbwana waari vamote na-ye woowaavonisa alwele. 18 Aphano atthu akina khuntana mwinyi aariina supiyaani anttattikheliye vanrepa, yo aari otakha omphenyisa ampwehe omaasho wa Yinsa. 19 Ila nawoona yoori khayiivo kiphenyo mwaasa wa atthu waatta, khuwela vatulu wa nyuupa khutamula liphala khumwiishushela vakatthi wa atthu omaasho wa Yinsa.

20 Ye nawoona amini aariina atthu apale, khumuuza nasupiyaani otule yoori: “Swaahipu twampi zawo zaswaamihiwa.”

21 Aphano mafwarizeewu na anamanozela a kano khusala attettha araka: “Otu aya paani ankufurwaaye? Ti paani anwahaaye oswaamihi twampi woohiiyi Nnyizinku?”

22 Yinsa khujuwa etthu aari ofikhiraaye, khuwoozela yoori: “Mwashukulikhela-ni nroho mwenu? 23 Yookhweya ti tiivi omuuza yoori twampi zawo za swaamihiwa ama yoori olankhe weettette? 24 Apho mwijuwe yoori Mwaana wa Pinaatamu onaaye owahi wooswaamihi twampi vathi apha.” Khumuuza nasupiyaani otule yoori: “Olankhe othuule nrepa lawo olawe owawo.” 25 Nasaapiru ntthu otule khulankha vakatthi wa atthu khuthuula nrepa lawe ntthile aattattikheliweevo khusala alawa owawe ansifwaka Nnyizinku. 26 Atthu ooshi aariivo khwiiya ooshanka na woova channu, khusala ansifu Nnyizinku araka: “Leelo noona vitthu zootikinisa.”

27 Paata yawiisha vitthu epile, Yinsa khulankha khusala alawa, khunsikana mwinyi mmote aari oriphisaaye lumpuru aari wiitthiwaaye Leevi eekhaliye vahali aari oriphisaavo malumpuru awe, khumuuza yoori: “Okilotte.” 28 Ye khulikha khaazi zawe zooshi khusala anlotta.

29 Leevi khuretta njampo liwululene owawe vamote na Yinsa, aarivo theenya anamariphisa lumpuru akinoko aya na atthu akina eekhaliye vamote na-ye. 30 Mafwarizeewu na anamanozela a kano khusala a waattakhula anakhiyoni a Yinsa araka: “Mwaasa aya niini mweeyo mwijanaka na mwinywanaka anamariphisa malumpuru na anatwampi?”

31 Yinsa khuwaajipu araka: “Akumi khanlawaniwa wa tothoro ila alwele, 32 miiyo akaawaateeliye anashariya kaawaateeliye anatwampi yoori alikhe oretta twampi.”

33 Atthu akina khumuuza Yinsa yoori: “Anakhiyoni a Yaahaya Namoosa na anakhiyoni a mafwarizeewu amfuka na anlompa, ila awo weeyo khamfuka, antta oja na onywa.”

34 Yinsa khuwaajipu yoori: “Enrettikhana toovi owooza anamalaleyiwa harusi ofuka namaposa arivo? 35 Ila onteela ofiya wakathi mposi anttelaaye olaziwavo vakatthi vaya, wakathi aya opo, anteela ofuka.”

36 Elottelanaka Yinsa khulupa nlikaniso mmote araka: “Khaavo anshijaaye patakha ya kuwo pheeya yoori arette yaapa ya kuwo yoovutta, n'ooretta toowo etile pheeya entta oharipweya, mwaasa wa patakha etile ya kuwo pheeya etthiiweevo oheezani na etile yoovutta. 37 Khaavo anthuulaaye viinyu pheeya ottha nttompwiyo ya shapala ya raku. N'ooretta toowo entta ophutuwa, viinyu ya yiittikhe ttompwiyo zaya ziharipweye. 38 Viinyu pheeya entthiiwa nttompwiyo pheeya. 39 Khaavo anraaye anywiye viinyu ya raku khutakha onywa viinyu pheeya, maana ontta olupa yoori: ‘Poora etile ya raku.’ ”