1 Khuntti ya atthu khukusanyeya, mwaasa wa waatta akinoko khusala aluwatthana. Yinsa khuwooza khapula anakhiyoni awe yoori: “Phoole na thwapiya zoonaafikhi za mafwarizeewu. 2 Khayiivo yoovithiwa ehinteelaaye ovithuliwa na zooshi epile zoottiyeleliwa zinteela ojuwiwa.” 3 Zooshi zinlupiwaazo n'yiiza, zinlawa zasaruleliwe veetakale, na zooshi epile zinlupiwaazo sirini zinlawa zeeye payana.

4 Yinsa khuvira attakhulaka araka: “Miiyo kiniwuuzani ashirikha yoori: Mwihiwoove apale anuulaaye mwiili, nawiisha khuhiretteli hatha etthu. 5 Miiyo kintta wuuthonyezani paani woomoova: Mwimoove Nnyizinku otule anwahaaye wuula mwiili enu, nafusi yenu khweeselela motthooni. Oto ti mwiriina yoomoova. 6 Anyannyi athaanu attiitthi-attiitthi khanuuzanyisiwa sinku piiri? Ila apo aya khaavo mmote Nnyizinku aninsahawaaye. 7 Hatha na nyuuli za mmwishwa mwenu zooshi pi za waalakiwa. Mwihoove, mweeyo mwinaaye fwayita zayita anyannyi apo a waatta.”

8 Yinsa khuri: “Miiyo kiniwuuzani yoori: otule antukhurwaaye vakatthi wa atthu yoori namalottela aka, Mwaana wa Pinaatamu onteela otukhuru vakatthi wa malayikha a Nnyizinku. 9 Ila otule ankikatthalaaye vakatthi wa atthu, na-ye onteela okatthaliwa vakatthi wa malayikha a Nnyizinku. 10 Wooshi otule anintarawaaye Mwaana wa Pinaatamu onswaamihiwa, ila otule ankufurwelaaye Rooho Ttakatthiifu khanswaamihiwa.

11 Amana mwithuuliwa olawa ophukiwa nnyupa woosifwiwamo Nnyizinku ama wa afwalume, mwihiiyane shaakha khwa nanna mwinttelaaye ojaakisa ama etthu mwinttelaaye olupa. 12 Wakathi otthuupo Rooho Ttakatthiifu entta wuuthoonyezani etthu yoolupa.”

13 Mwinyi mmote wa khuntti etile khunvekela Yinsa araka: “Mwanliimu, omuuze ttwiiyaku akaawanyele maali epile alikhiyeeyo papeetthu.”

14 Yinsa khunjipu araka: “Weyo, paani akirettiye wiiya namaphuka enu wala namwaawanya wa maali zenu?” 15 Khuwooza yoori: “Phoole na omaashokopho wooshi wa vitthu, mwaasa yoori ohaayi wa pinaatamu khunlipa na vitthu epile ampatthaazo za waatta.”

16 Yinsa khulupa nlikaniso araka: “Aarivo mwinyi mmote wa thaajiri aaruweriyeeyo channu. 17 Ye khusala awaza toono: ‘Kirette-ni? Akina vahali wootthaavo peewu zaka epi.’

18 Khulupa yoori: ‘Aa, kajuwa etthu yooretta. Kintta opwecha matthala apa mattiitthi kijeke mawulu-mawulu yoori kittheemo peewu zaka na vitthu zaka zooshi epile kiriinaazo. 19 Nawiisha, kuuze nafusi yaka yoori: onaaye peewu na vitthu za waatta zintoshelezaaye nyaakha za waatta; ovumule, oje, onywe na opuhe.’

20 Ila Nnyizinku khumuuza yoori: ‘Nlolo! Osikhu otthuupu ontta ofwa. Maali zawo paani anttelaaye osalana?’ ”

21 Yinsa khumarisela araka: “Ntthu oto ori nkhama atthu apale anlipanaaye maali zaya ila khuhiiyi mathaajiri mmakhono wa Nnyizinku.”

22 Aphano Yinsa khuwooza anakhiyoni awe araka: “Ti eto kiniwuuzaanini yoori: mwihiiyane shaakha na ohaayi enu, wala etthu mwinttelaaye oja ama etthu mwinttelaaye owala. 23 Maana ohaayi ona fwayita khuluyeene zayita etthu-yoojiwa na mwiili ona fwayita khuluyeene zayita kuwo. 24 Mwiwoone anakhuku; khanzala wala khanuurula hatha ntthala khana loopwehavo vitthu-zoojiwa zaya, ila Nnyizinku oniwenkha etthu-yoojiwa. Mweeyo mwinaaye fwayita khuluyeene zayita anyannyi apo! 25 Paani vakatthi venu anwahaaye weekezela mansha awe hatha nkhama eetta oshukulikhela? 26 Mweeyo khamwinwahi oshintta vitthu ttiitthi-ttiitthi, khi mwinshukulikhela toovi kinoko zaya?

27 Moone nanna anwulaazo maluwa oshapweya ntthuttu, khankhola khaazi wala khanvaasha kuwo, ila kiniwuuzani yoori: Seleyimaana aari thaajiri nwulweene, ila khawaleeni kuwo zooripelela nkhama maluwa atthaapo. 28 Nnyizinku onwalisa nyaani ziriiye ntthuttu leelo meesho zeettelaka olukula, sapiseni mweeyo atthu a amini ttiitthiiru khatepeeni wuuwalisani? 29 Mwihishukulikhele etthu mwinttelaaye oja ama onywa. 30 Atthu apale ahininjuwaaye Nnyizinku pa yo anshukulikhelaaye vitthu epo, ila mweeyo Papeenu onjuwa yoori enuuhithajiyani vitthu epo. 31 Mweekese khapula Ofwalume wa Nnyizinku, vitthu zaya epo mwintta weekezeliwa.”

32 Yinsa khulupa theenya araka: “Mwihoove mweeyo mwiiyiye nkhama khuntti ttiitthiiru ya pwittipwitthi, maana Papeenu ti ye atakhiye owinkhani Ofwalume awe. 33 Muuzanyize zooshi mwiriinaazo nzurukhu aya mwiwenkhe asikhini, mwijaattalelele mifukho zihinvaruwaaye, toowo mwinthokorela maali pinkuuni zihiniishaawo, okhu ahimfiyaawo nantarawu wala maweephe yoori aharipu. 34 Maana attaapho eniiyaavo maali zawo rooho yawo eniiya attaapho.”

35 Yinsa khuvira alupaka yoori: “Mwiiye anamarumeyela oojeekesela na khantteya zenu ziri zookhoziwa. 36 Mwina yawiiya nkhama anamarumeyela aninwejelaaye mbwanaaya yoori arutaka onjampo la harusi, amana apiya nlako amfukulele nasaapiru. 37 Ooshapweyiwa anamarumeyela apale mbwanaaya anttelaaye owaasikana eettaka ojeekesela. Kiniwuuzani khweele yoori mbwanaaya na-ye ontta ojiwalisa yoori arumeye, awooze wiikhala vameeza asala awaarumeyela. 38 Hatha nkhama ata osikhu layili ama lifwajiri, ooshapweyiwa anamarumeyela apale mbwanaaya anttelaaye owaasikana ari oojeekesela. 39 Mwijuwe yoori eriwaka mwennyewe nyuupa eetta ojuwa wakathi nantarawu antaavo, toono ahinlikhaka ovira nnyupa mwawe. 40 Na-mweyo mwiiye woojeekesela, maana Mwaana wa Pinaatamu ataaka khaavo anjuwaaye wakathi aya.”

41 Aphano Pheeturu khumuuzela Yinsa yoori: “Mbwana, nlikaniso opo pu weetthu ama pu wa atthu ooshi?”

42 Mbwana khujipu araka: “Paani eeyiyeeyo karumeya wa waamineya na w'aakhili, mbwanaawe amwinkhiyeeyo owaalokozela akarumeya azaawe na owenkha etthu-yoojiwa mmana ofiya wakathi? 43 Wooshapweyiwa karumeya otule mbwanaawe amana ataaka anttelaaye onsikana arettaka etthiipo. 44 Weekhweele, kiniwuuzani yoori onttela wiiya wa waaminiwa alikheliwe weettettisa maali zooshi. 45 Mwaakanyerele, karumeya otule amana alupa nroho mwawe yoori: ‘Mbwanaaka khanta nasaapi,’ khwaaza owaapiya akarumeya apale akina aakha na aalume, okhuno ajaka, anywaka na ahapaliwaka, 46 mbwanaawe onttela ota siikhu etile ye ahaari waakanyerelaaye na wakathi ahaari ofikhirelaaye, ahukhumwiwe venkivene atthiiwe puuro ya atthu oohaamineyi.

47 Karumeya otule anjuwaaye matakhelo a mbwanaawe, ila khuhisala ajeekesela na khuhisala aretta epile antakhaazo mbwanaawe, onteela ohukhumwiwa na ojaphiwa venkivene. 48 Ila otule ahinrettaaye matakhelo a mbwanaawe mwaasa woohijuwi, onteela ojaphiwa na ohukhumwiwa vattitthiiru. Wakhula otule enkhiweeyo za waatta ona yoorutisa za waatta; na otule aaminiweeyo venkivene, onlawa avekeliwe zooziti channu.”

49 Yinsa khuri: “Miiyo kateela okhoza moottho vatuniya, enikituvela ovira okholelaka! 50 *‘Eu seja batizado com um certo batismo’ khwa luuka ya kereeku.Ila yamwanzo kina yoohoowa kifwe, kina huzuni mpakha vitthu epi zirettikhane ziishe! 51 Mweeyo mwinaakanyera yoori miiyo katana heeri vatuniya? Wala! Kiniwuuzani khweele yoori miiyo katiisa ohisiilani. 52 Waaza leelo eti mpakha okho ninttaawo, nkatthi woojama wa atthu athaanu, onteela opuwamo waawanyeya; attatthu ohisiilanani apale awiri, apale awiri ohisiilanani apale attatthu. 53 Paapa wuumana na mwanawe na mwaana wuumana na papaawe. Maama wuumana na mwanawe wankha, mwaana wankha wuumana na mamaawe, namaraliwa wuumana na nkhwewe, akhwe wuumana na namaloola.”

54 Yinsa khuwooza atthu aakusanyeyiyeeyo yoori: “Mweeyo amana moona liwiku liwelelaka phantte y'ookhu lintupweelaawo njuwa mwinlupaka yoori: ‘Entakha onya vuula’, khweele khurettikhana. 55 Amana moona pheevo ya kuusi mwinlupaka yoori: ‘Enteela opuwa haari’, khweele khurettikhana. 56 Manaafikhi! Mweeyo mwinjuwa olupa alama za vatuniya na z'ootulu; aphano toovi mwihijuwaka olupa alama za wakathi opu?

57 Mwaasa aya niini mwihijuwaka othawula etile yiiyiyeeyo ya shariya? 58 Amana weeyo na muumani awo mwilawaka wa namaphuka, enhithajiya osiilana khapula rakuzeene mwihinalawe, maana amana ofiya wa namaphuka ontta omuuza namweekesela ootthe nkalapooso. 59 Miiyo kiniwuuza khweele yoori khunlaamo ohiripheeni khapula.”