1 Maʌ̃ ewarid̶e pilisteorãda dji jʌresid̶aa israelerã ume djõni carea. Maʌ̃ne pilisteorã boro Aquisiba Davia nãwã jarasia:

–Bʌa bio cawa b̶ʌa bʌra, bʌ sordaorã sid̶a mʌ̃are djõne wãnida panʌda.–

2 Daviba jarasia:

–Bia b̶ʌa, bʌa unuya sãwã mʌ̃, bʌ nezocara djõbarida.–

Aquisiba jarasia:

–Mãwã baibʌrʌ, bʌra mʌ̃ wagabarida b̶ʌya ab̶a bʌ beubʌrʌd̶aa.–

3 Maʌ̃ naẽna Saulba jũma daubararãda Israel druad̶ebemada ãyã jʌrecuasia.* Deuteronomio 18:9-14. Maʌ̃ awara Samuelera jaid̶asia.† 1 Samuel 25:1. Israelerãra idji carea jĩãsid̶aa. Idji puru Ramáne tʌb̶arisid̶aa.

4 Pilisteo sordaorãra ãbaa dji jʌred̶aped̶a Suneʌ̃ purud̶e duanesid̶aa. Maʌ̃ne Saulba idji sordaorãra ãbaa jʌreped̶a Guilboa eyad̶e duanesid̶aa. 5 Baribʌrʌ pilisteo sordaorã unusid̶e Saulora ne wayaaba cacua urea nũmesia. 6 Maʌ̃ carea Saulba Ãcõrẽa iwid̶isia sãwã oida b̶ʌ cawaya. Baribʌrʌ Ãcõrẽba cãĩmocarad̶eba ni Uriʌ̃ abadad̶eba bid̶a cawabiẽ́ basía.‡Uriʌ̃. Exodo 28:30. Maʌ̃ awara Ãcõrẽneba bed̶eabadarãba poya cawabid̶aẽ́ basía. 7 Maʌ̃ carea Saulba idjiare b̶eaa nãwã jarasia:

–Bẽwãrã jaure ume bed̶eabari daubara wẽrãda jʌrʌd̶adua, mʌ̃a idjid̶eba cawai carea sãwã oida b̶ʌda.–

Maʌ̃ne idjiare b̶eaba panusid̶aa:

–Endor purud̶e daubara wẽrãda b̶ʌa.–

8 Ara maʌ̃da Saulora quĩrã awara djiosia ni ab̶aʌba idjira cawarãnamãrẽã. Maʌ̃be idjiare b̶eada umé edaped̶a diamasi maʌ̃ wẽrãmaa wãsia. Idjia daubara wẽrãa nãwã jarasia:

–Mʌ̃ djuburia mʌ̃a jarabʌrʌ bẽwãrã jaureda zebidua idji ume bed̶eai carea.–

9 Baribʌrʌ daubara wẽrãba panusia:

–¿Cãrẽ cãrẽã bʌa mʌ̃́a mãwã obi b̶ʌ? ¿Saulba od̶ara bʌa adua b̶ʌca? Idjia daubararãda naʌ̃ Israel druad̶ebemada jũma ãyã jʌrecuasia. ¿Saulba mʌ̃ra beamãrẽã bʌa mãwã obi b̶ʌca?–

10 Maʌ̃ne Saulba Ãcõrẽ quĩrãpita wãrãneba nãwã jarasia:

–Mʌ̃a Ãcõrẽ trʌ̃neba jaraya naʌ̃ obʌrʌ carea bʌra biẽ́ od̶aẽ́da.–

11 Maʌ̃ carea daubara wẽrãba iwid̶isia:

–Mãẽteara ¿bʌa cai jaureda zebi quĩrĩã b̶ʌ?–

Saulba panusia:

–Samuel jaureda zebidua.–

12 Ara maʌ̃da daubara wẽrãba Samuel jaureda trʌ̃sia. Samuel jaure unusid̶e mĩãdua b̶iaped̶a Sauloa jarasia:

–Bʌa ¿cãrẽ cãrẽã mʌ̃ra cũrũgasi? ¡Bʌra Saulda jãwã b̶ʌa!–

13 Saulba panusia:

–Ne wayarãdua. Bʌa unu b̶ʌda mʌ̃́a jaradua.–

Daubara wẽrãba panusia:

–Jaureda egorod̶eba ʌ̃taa zebʌrʌda unu b̶ʌa.–§Jaure. Hebreo bed̶ead̶e b̶ʌ́ b̶ʌa “ãcõrẽ b̶eada.”

14 Saulba iwid̶isia:

–Idjira ¿cai zaca b̶ʌ?–

Daubara wẽrãba panusia:

–Idjira drõãda b̶ʌa. Idjia cacuad̶e jʌ̃ b̶ʌra drasoa b̶ʌa.–

Maʌ̃ne Saulba cawasia Samuel jaureda mãwã b̶ʌda. Maʌ̃ carea idjira chĩrãborod̶e b̶arru cob̶esia. 15 Maʌ̃ne Samuel jaureba idjía iwid̶isia:

–¿Cãrẽ cãrẽã bʌa mʌ̃ra mĩã sẽ b̶ʌ? ¿Cãrẽ cãrẽã namaa zebisi?–

Saulba panusia:

–Bʌra namaa zebisia mʌ̃a sãwã oida b̶ʌda cawa crĩchaẽ́ b̶ʌ bẽrã. Pilisteorãra mʌ̃ ume djõne zesid̶aa. Maʌ̃ne Ãcõrẽba mʌ̃ra igara b̶ʌa. Mʌ̃a sãwã oida b̶ʌ iwid̶ibʌrʌd̶e idjia cãĩmocarad̶eba cawabicaa. Maʌ̃ awara idjid̶eba bed̶eabadarãba poya cawabid̶aẽ́a. Maʌ̃ carea bʌda trʌ̃ b̶ʌa mʌ̃a sãwã oida b̶ʌda cawabimãrẽã.–

16 Samuel jaureba panusia:

–¿Cãrẽ cãrẽã mʌ̃́a iwid̶i b̶ʌ? Ãcõrẽba bʌda igaraped̶a bʌ ume dji quĩrũda b̶esia. 17 Idjia bʌra osia mʌ̃neba jarad̶a quĩrãca. Idjia bʌ israelerã boro bad̶ada jãrĩped̶a bʌ ume b̶ad̶a Davia diasia. 18 Idjia jarad̶ara bʌa ĩjã oẽ́ basía. Bʌa amalecitarãra jũma quenaẽ́ basía idji quĩrũbid̶eba obid̶a quĩrãca.* 1 Samuel 15:3-28. Maʌ̃ bẽrã id̶i bʌra jãwã o b̶ʌa. 19 Maʌ̃ awara Ãcõrẽba bʌda, israelerã sid̶a pilisteorãa poyabiya. Nu bʌra, bʌ warrarã sid̶a mʌ̃ ume beud̶arã panabadama panania.–

20 Samuel jaureba jarad̶a carea Saulora bio ne wayaped̶a egode b̶aesia. Idjira cacua norrab̶ari b̶asia ewari ab̶a ãsa diamasi bid̶a ne coẽ́ b̶ad̶a bẽrã. 21 Daubara wẽrã Saul caita wãped̶a unusia idjira ne wayaaba cacua urea nũmʌda. Maʌ̃ne jarasia:

–Mʌ̃, bʌ nezocaba bʌ bed̶eara ĩjãsia. Mʌ̃ bead̶i adua bʌa jarad̶ara mʌ̃a jũma osia. 22 Mʌ̃ djuburia ũrĩdua. Mʌ̃a bʌ́a paʌ̃da maãrĩ diaya comãrẽã. Mãwã bʌra waya cacua ʌb̶ʌaya nocod̶aa wãmãrẽã.–

23 Baribʌrʌ Saulba coẽ́ana asia. Maʌ̃ bẽrã daubara wẽrãba, Sauloare b̶ea bid̶a jara panesid̶aa ne comãrẽã. Mãwã jara panʌ carea Saulba ne coyad̶a asia. Egode tab̶ad̶ada cʌd̶ad̶e ʌ̃ta chũmesia. 24 Daubara wẽrãba paca zaque boreguea b̶ʌda idji de caita erob̶asia. Maʌ̃ pacara beaped̶a djusia. Idjab̶a harinada bʌratʌped̶a paʌ̃ dji ẽsãbari neẽ́ b̶ʌda ãbusia. 25 Maʌ̃ra Sauloa, idjiare b̶eaa bid̶a diasia cod̶amãrẽã. Ara maʌ̃ diamasi ne coped̶ad̶acarea Saulora idjiare b̶ea sid̶a jẽda wãsid̶aa.