3
Djabarã wagabari sãwã b̶aida b̶ʌ
1 Naʌ̃ bed̶eara wãrã araa: ab̶aʌda djabarã wagabarida b̶a quĩrĩã b̶ʌbʌrʌ, biada o quĩrĩã b̶ʌa.*Djabarã wagabari. Griego bed̶ead̶e b̶ʌ́ b̶ʌa “dji acʌbari.” Cãpũrĩã bed̶ead̶e biara “pastor” jarabadaa. 2 Maʌ̃ bẽrã djabarã wagabarira biẽ́ jarad̶i neẽ́ b̶aida b̶ʌa, quima ab̶a erob̶aida b̶ʌa, jũmawãyã b̶aiẽ́ b̶ʌa, crĩcha biad̶eba b̶aida b̶ʌa, quĩrãipa b̶aida b̶ʌa, idji ded̶e jũẽbʌdara bia edaida b̶ʌa, idjab̶a jaradia cawa b̶aida b̶ʌa. 3 Idjira beu nĩbaiẽ́ b̶ʌa. Quĩrũbi jʌrʌya b̶aiẽ́ b̶ʌa, ãtebʌrʌ aduá b̶aida b̶ʌa. Jũmarã ume necai b̶aida b̶ʌa. Paratada awua b̶aiẽ́ b̶ʌa. 4 Idji ded̶ebemarãra bio waga cawa b̶aida b̶ʌa, idji warrarãra cʌwʌrʌ ĩjã erob̶aida b̶ʌa, idjab̶a ãdjirãba idjira wayad̶ida panʌa. 5 Ara idji ded̶ebemarãda waga adua b̶ʌbʌrʌ, ¿sãwã Ãcõrẽ ẽberãrãda bia wagai? 6-7 Crito ĩjãẽ́ b̶ea bid̶a idjid̶ebemada bia crĩchad̶ida panʌa. Mãwã ẽberãrãba idjid̶ebemada biẽ́ bed̶ead̶aẽ́a idjab̶a diauruba idjira ẽberãrã quĩrãpita biẽ́ b̶ʌẽ́a. Ãcõrẽ bed̶ea ĩjãna djiwid̶i b̶ʌra djabarã wagabarida b̶aiẽ́ b̶ʌa dji dromada crĩcharãmãrẽã. Mãwã crĩchasira Ãcõrẽba idjira cawa oya diauru cawa od̶a quĩrãca.
Djabarã carebabari sãwã b̶aida b̶ʌ
8 Ara maʌ̃ quĩrãca djabarã carebabada sid̶a jipa nĩbad̶ida panʌa ẽberãrãba wayad̶amãrẽã.†Djabarã carebada. Griego bed̶ead̶e b̶ʌ́ b̶ʌa “nezoca.” Cãpũrĩã bed̶ead̶e biara “diacono” jarabadaa. Ãdjirãba sewada o b̶ead̶iẽ́ panʌa, beu nĩbad̶iẽ́ panʌa, idjab̶a paratada awua b̶ead̶iẽ́ panʌa. 9 Dadjia ĩjã panʌ bed̶ea Ãcõrẽba cawabid̶ara crĩcha biad̶eba bio wagad̶ida panʌa. 10 Djabarã carebabada b̶ʌd̶i naẽna bio quĩrãcuita acʌd̶ida panʌa. Maʌ̃be biẽ́ jarad̶i neẽ́ b̶eabʌrʌ, djabarã carebabadada b̶ead̶ida panʌa. 11 Ab̶ari quĩrãca ãdji quima sid̶a jipa nĩbad̶ida panʌa ẽberãrãba wayad̶amãrẽã.‡Ãdji quima. Griego bed̶ead̶e b̶ʌ́ b̶ʌa “wẽrãrã.” Ʌ̃cʌrʌmaarã djabarã carebabada quimarãda jara b̶ʌa idjab̶a ʌ̃cʌrʌmaarã djabarã carebabada dji wẽrãrãda jara b̶ʌa. Nẽbʌra o b̶ead̶iẽ́ panʌa. Jũmawãyã b̶ead̶iẽ́ panʌa ãtebʌrʌ ne jũmane jipa b̶ead̶ida panʌa. 12 Djabarã carebabariba wẽrãda ab̶a erob̶aida b̶ʌa. Idji warrarãra, idji ded̶ebemarã sid̶a bio waga cawa b̶aida b̶ʌa. 13 Djabarã carebabadaba od̶ida panʌra jipa od̶ibʌrʌ, jũmarãba ãdjirãnebemada bia bed̶ead̶ia. Mãwã ne wayaa neẽ́ ãdjirãba Jesucrito ĩjã panʌnebemada poya bed̶ead̶ia.
Wãrã bed̶ea Ãcõrẽba cawabid̶a
14-15 Mʌ̃ra isabe bʌ acʌd̶e wã quĩrĩã b̶ʌa. Mãwãmĩna mʌ̃ra dãrãisicada. Maʌ̃ bẽrã naʌ̃ cartara bʌ itea b̶ʌbʌrʌa Ãcõrẽ ẽberãrãra sãwã ãbaa b̶ead̶ida panʌda cawamãrẽã. Dadjirãra Ãcõrẽ zocai b̶ʌ ẽberãrãa. Idji wãrã bed̶eara quĩrãcuita jaradiabadaa ni ab̶aʌba quĩrã awara jaradiarãnamãrẽã.§Wãrã bed̶eara quĩrãcuita jaradiabadaa. Griego bed̶ead̶e nãwã b̶ʌ́ b̶ʌa: “Dadjirãra wãrã bed̶ea de jĩrũa, de edrebemaa.”
16 Wãrãda Ãcõrẽba naʌ̃ bed̶ea cawabid̶ara bio bia b̶ʌa:
Critora naʌ̃ djarad̶e zesia.
Ãcõrẽ Jaureba cawabisia idjira jipa b̶ʌda.
Bajãnebema nezocarãba idjira unusid̶aa.
Djabarãba idjid̶ebemada judiorãẽ́ma jaradiasid̶aa.
Zocãrãba naʌ̃ ẽjũãne idjira ĩjãsid̶aa.
Ãcõrẽba idjira bajã bia quirud̶e wayacusa edasia.
*3:1 Djabarã wagabari. Griego bed̶ead̶e b̶ʌ́ b̶ʌa “dji acʌbari.” Cãpũrĩã bed̶ead̶e biara “pastor” jarabadaa.
†3:8 Djabarã carebada. Griego bed̶ead̶e b̶ʌ́ b̶ʌa “nezoca.” Cãpũrĩã bed̶ead̶e biara “diacono” jarabadaa.
‡3:11 Ãdji quima. Griego bed̶ead̶e b̶ʌ́ b̶ʌa “wẽrãrã.” Ʌ̃cʌrʌmaarã djabarã carebabada quimarãda jara b̶ʌa idjab̶a ʌ̃cʌrʌmaarã djabarã carebabada dji wẽrãrãda jara b̶ʌa.
§3:14-15 Wãrã bed̶eara quĩrãcuita jaradiabadaa. Griego bed̶ead̶e nãwã b̶ʌ́ b̶ʌa: “Dadjirãra wãrã bed̶ea de jĩrũa, de edrebemaa.”