1 Maʌ̃be Ãcõrẽba Moisea jarasia:

–Egiptod̶ebema boroa nãwã jarad̶e wãdua: “Dai hebreorã Ãcõrẽba nãwã jara b̶ʌa: mʌ̃ purura idu wãbidua mʌ̃́a animarãda babue diad̶amãrẽã. 2-3 Baribʌrʌ bʌa dai israelerãda idu wãbiẽ́bʌrʌ ãtebʌrʌ naʌ̃ druad̶e b̶ebibʌrʌ, Ãcõrẽba bãrã animarãra idji ʌb̶ʌad̶eba quinibiya. Bãrã cawayoda, burroda, cameyoda, pacada, oveja sid̶a quininia. 4 Baribʌrʌ Ãcõrẽba animarã dai israelerãneda mãwã oẽ́a. Dai animarãra ni ab̶a bid̶a beud̶aẽ́a egiptorã animarã quĩrãca. 5 Ãcõrẽba ewarida b̶ʌsia naʌ̃ Egiptod̶e mãwã oi carea. Nubʌrʌ mãwã oya.”–

6 Nurẽma Ãcõrẽba mãwã osia. Jũma egiptorã animarãra quinisid̶aa. Baribʌrʌ israelerã animarãra ni ab̶a bid̶a beud̶aẽ́ basía. 7 Egiptod̶ebema boroba ẽberãrãda israelerã animarã acʌd̶e diabuesia. Wãnaped̶a unusid̶aa israelerã animarãra ni ab̶a bid̶a beud̶aẽ́ basida. Baribʌrʌ Egiptod̶ebema boroba maʌ̃da cawasimĩna so zarea b̶esia. Maʌ̃ bẽrã israelerãra idu wãbiẽ́ basía.

8 Maʌ̃be Ãcõrẽba Moisea, Aaroʌ̃a bid̶a jarasia:

–Jãʌ̃be tʌbʌ porada jʌwad̶e edad̶aped̶a Egiptod̶ebema boro quĩrãpita ʌ̃taa jãmãpod̶adua.*Tʌbʌ pora. Hebreo bed̶ead̶e jara b̶ʌa egoro cad̶a zareabibarid̶ebema tʌbʌ porada. 9 Maʌ̃ tʌbʌ porara jũma Egipto druad̶e cowa nũmaya. Maʌ̃ba Egipto druad̶e ẽberãrãra animarã sid̶a jũma cabʌba biracuaya.–

10 Ara maʌ̃da Moiseba Aaroʌ̃ ume tʌbʌ porada edad̶aped̶a Egiptod̶ebema boromaa wãsid̶aa. Jũẽnaped̶a Moiseba tʌbʌ porara idji quĩrãpita ʌ̃taa jãmãposia. Ara maʌ̃da ẽberãrãra animarã sid̶a jũma cabʌba biracuasia. 11 Maʌ̃ne Egiptod̶ebema daubararãra Moise quĩrãpita poya wãnaẽ́ basía ãdjirã sid̶a waabemarã quĩrãca cabʌba jũma biraped̶ad̶a bẽrã. 12 Baribʌrʌ Ãcõrẽba Egiptod̶ebema borora so zarea b̶ʌsia. Maʌ̃ bẽrã Moiseba Aaroʌ̃ bid̶a jaraped̶ad̶ara ĩjãẽ́ basía Ãcõrẽba jarad̶a quĩrãca.

13 Maʌ̃be Ãcõrẽba Moisea jarasia:

–Nu diaped̶a Egiptod̶ebema boromaa wãped̶a jaradua: “Dai hebreorã Ãcõrẽba nãwã jara b̶ʌa: mʌ̃ purura idu wãbidua mʌ̃́a animarãda babue diad̶amãrẽã. 14 Baribʌrʌ bʌa mãwã oẽ́bʌrʌ mʌ̃ ʌb̶ʌad̶eba bʌra, dji dromarãra, jũma bʌ druad̶ebemarã sid̶a wetara mĩgabiya. Mãwã bʌa cawaya mʌ̃a obari quĩrãca naʌ̃ ẽjũãne neẽ́da. 15 Wãrãda naʌ̃ naẽna mʌ̃ ʌb̶ʌad̶eba bʌra, bʌ druad̶ebemarã sid̶a jũma quinibida b̶asia ni ab̶a bid̶a naʌ̃ ẽjũãne b̶erãmãrẽã. 16 Baribʌrʌ mʌ̃a mãwã oẽ́ b̶ʌa. Mʌ̃a bʌra zocai b̶ʌsia bʌ mĩgabi b̶ʌd̶eba mʌ̃ ʌb̶ʌada unubi carea. Mãwã mʌ̃ra jũma naʌ̃ ẽjũãne trʌ̃ b̶ʌga b̶aya. 17 Baribʌrʌ bʌa wad̶ibid̶a mʌ̃ puruda biẽ́ o b̶ʌa. Wad̶ibid̶a ãdjirãra idu wãbiẽ́ b̶ʌa. 18 Maʌ̃ carea nu naʌ̃ horaca mʌ̃a hielo waib̶ʌada bajãneba jurrubiya. Egipto puru osid̶a ewarid̶eba wad̶ibid̶a hielora maʌ̃ quĩrãca jurrucaa. 19 Maʌ̃ bẽrã jũma bãrã animarãda de edre b̶ʌbicuadua. Mãwã oẽ́bʌrʌ hielo waib̶ʌa jurrubʌrʌba quenaya. Baridua ẽberãda, animarã sid̶a de edre b̶ead̶aẽ́bʌrʌ, hielo waib̶ʌa jurrubʌrʌba beaya.”–

20 Ne wayaaba ʌ̃cʌrʌ Egiptod̶ebema dji dromarãba Ãcõrẽba jarad̶ara ĩjãsid̶aa. Maʌ̃ bẽrã ãdji nezocara, ãdji animarã sid̶a de edre isabe b̶ʌcuasid̶aa. 21 Baribʌrʌ ʌ̃cʌrʌ Egiptod̶ebema dji dromarãba Ãcõrẽba jarad̶ara ĩjãnaẽ́ basía. Maʌ̃ bẽrã ãdji nezocara, ãdji animarã sid̶a de edre b̶ʌcuad̶aẽ́ basía.

22 Maʌ̃be Ãcõrẽba Moisea jarasia:

–Bʌ jʌwara bajãnaa ʌ̃taa wadua. Maʌ̃ne jũma Egipto druad̶e hielora ẽberãrã ʌ̃rʌ̃, animarã ʌ̃rʌ̃, idjab̶a néud̶e bid̶a jurruzoaya.–

23-24 Ara maʌ̃da Moiseba idji bacurura bajãnaa ʌ̃taa wasia. Maʌ̃ne Ãcõrẽba jũma Egipto druad̶e hieloda jurrubisia. Ab̶ed̶a baa bara b̶ae nũmesia. Egipto puru osid̶a ewarid̶eba maʌ̃ quĩrãca wad̶ibid̶a ununaca basía. 25 Maʌ̃ hielo waib̶ʌa jurrubʌrʌba Egipto druad̶e jũma de edre b̶ead̶aẽ́ra quenasia. Ẽberãrãda, animarãda, néu b̶ea sid̶a jũma quenasia. Bacuru sid̶a jũma ãrĩsia. 26 Ab̶abe Goseʌ̃ druad̶e israelerã duanʌmaa hielora jurruẽ́ basía.

27 Maʌ̃be Egiptod̶ebema boroba Moisera, Aaroʌ̃ sid̶a trʌ̃biped̶a ãdjía nãwã jarasia:

–Id̶ibʌrʌ mʌ̃a cawasia biẽ́ o b̶ʌda. Ãcõrẽbʌrʌ jipa o b̶ʌa. Mʌ̃da, mʌ̃ puru sid̶a bed̶ead̶e panʌa. 28 Maʌ̃ bẽrã Ãcõrẽa iwid̶id̶adua naʌ̃ hielo jurru nũmʌra, baa sid̶a jõbimãrẽã. Maʌ̃be mʌ̃a israelerãra idu wãbiya. Waa ãdjirãra Egiptod̶e b̶ebiẽ́a.–

29 Moiseba Egiptod̶ebema boroa jarasia:

–Naʌ̃ purud̶eba ẽdrʌd̶acarea mʌ̃ jʌwara umena ʌ̃taa waped̶a Ãcõrẽa iwid̶iya. Maʌ̃ne hielo jurru nũmʌra, baa sid̶a jõya. Maʌ̃neba bʌa cawaya Ãcõrẽra naʌ̃ ẽjũã djibarida. 30 Baribʌrʌ mʌ̃a cawa b̶ʌa dji dromarãba, bʌa bid̶a wad̶ibid̶a Ãcõrẽra wayad̶aẽ́ panʌda.–

31 (Egiptorãba u eropanana linoda põnõ b̶ad̶a bẽrã idjab̶a cebadada zau b̶ad̶a bẽrã hielo jurrubʌrʌba jũma ãrĩsia. 32 Baribʌrʌ ãdjirãba u eropanana trigora, centeno sid̶a wad̶i zauẽ́ b̶ad̶a bẽrã ãrĩẽ́ basía.)

33 Maʌ̃be Moisera Egiptod̶ebema boromaʌba ẽdrʌped̶a puru dajadaa wãsia. Mama idji jʌwara umena ʌ̃taa waped̶a Ãcõrẽa iwid̶isia. Ara maʌ̃da hielo jurru nũmanara, baara, cue sid̶a Egipto druad̶e cãbasia. 34-35 Maʌ̃ unusid̶e Egiptod̶ebema boroba wayacusa biẽ́ osia. Idjida, dji dromarã sid̶a so zarea panena bẽrã israelerãra idu wãbiẽ́ basía Ãcõrẽba Moised̶eba jarad̶a quĩrãca.