1 Maʌ̃be Ãcõrẽba Moisea jarasia:

–Mʌ̃a Egiptod̶ebema borora, egiptorã sid̶a wayacusa cawa oya. Mãwã cawa od̶acarea dji boroba bãrã israelerãra idu wãbiya. Ab̶ed̶a bãrãra idji druad̶ebemada ãyã jʌrecuaya. 2 Maʌ̃ bẽrã israelerãa jaradua ãdjirã caita b̶ea egiptorãa oro od̶ada, parata od̶a sid̶a iwid̶id̶amãrẽã.–

3 Ãcõrẽba egiptorãa israelerãra bia unubisia. Dji dromarãba, waabema egiptorã bid̶a Moisera dji dromada cawasid̶aa.

4 Egiptod̶ebema boromaʌba ãyã wãi naẽna Moiseba idjía jarasia:

–Ãcõrẽba nãwã jara b̶ʌa: “Ariquẽtra mʌ̃ra jũma Egipto druad̶e pʌrrʌaya. 5 Maʌ̃ne umaquĩrã warra dji nabemarãra jũma beud̶ia. Egiptod̶ebema boro umaquĩrã warra dji nabemara beuya. Dji ed̶aara b̶ʌ nezocawẽrãba erob̶ʌ umaquĩrã warra dji nabema sid̶a beuya.*Dji ed̶aara b̶ʌ nezocawẽrã. Hebreo bed̶ead̶e b̶ʌ́ b̶ʌa: “Nezocawẽrã yud̶e ne b̶a chũmʌ.” Idjab̶a animarã warra dji umaquĩrã naãrã tod̶a sid̶a jũma beud̶ia. 6 Maʌ̃ne jũma Egiptod̶e sopua dromaba ẽberãrãra jĩãbi b̶ʌgad̶ia. Maʌ̃ ewari naẽna sopuara maʌ̃ quĩrãca ununaca basía ni maʌ̃ quĩrãca waa ununaẽ́a. 7 Baribʌrʌ dai israelerã duanʌma chupea nũmaya sopuad̶aẽ́ bẽrã. Usa sid̶a berud̶aẽ́a ni cãrẽ sid̶a sãwãnaẽ́ bẽrã.”

Mãwã bãrã egiptorãba cawad̶ia Ãcõrẽba dai israelerãra quĩrã awara obarida. 8 Mãwãbʌrʌd̶e dji dromarãda mʌ̃maa zed̶ia. Ãdjirãra mʌ̃ quĩrãpita chĩrãborod̶e copanenaped̶a jarad̶ia: “Wãdua. Jũma israelerã sid̶a pe ededua.” Bãrãba mãwã jarabʌdad̶ebʌrʌ mʌ̃ra wãya.–

Moisera bio quĩrũ b̶ʌda Egiptod̶ebema boromaʌba ẽdrʌsia.

9 Naẽna Ãcõrẽba Moisea jarad̶oasia:

–Egiptod̶ebema boroba bãrãba jara panʌra ĩjãẽ́ b̶aya. Mãwã mʌ̃a ne ununacada Egiptod̶e zocãrã ocuaya.–

10 Moiseba Aaroʌ̃ bid̶a maʌ̃ ne ununaca b̶eara Egiptod̶ebema boro quĩrãpita ocuasid̶aa. Baribʌrʌ Ãcõrẽba idjira so zarea b̶ʌsia. Maʌ̃ bẽrã Egiptod̶ebema boroba israelerãra idji druad̶ebemada idu ẽdrʌbiẽ́ basía.