1-2 Israelerãra Repidiʌ̃neba wãbʌrʌd̶aped̶a Sinai ẽjũã põãsa ewaraga b̶ʌd̶e jũẽne wãsid̶aa. Jũẽnaped̶a Sinai eya caita duanesid̶aa. Ãdjirã Egiptod̶eba ẽdrʌped̶ad̶acarea jed̶eco uméne mama jũẽsid̶aa.

3-4 Maʌ̃be Moisera Sinai eyad̶e ʌ̃taa wãsia Ãcõrẽ ume bed̶eai carea. Maʌ̃ eyad̶e Ãcõrẽba idjira trʌ̃ped̶a nãwã jarasia:

–Israelerãa nãwã jaradua: “Bãrã Jacobod̶eba yõped̶ad̶arãba unusid̶aa mʌ̃a sãwã egiptorãra cawa osida. Idjab̶a unusid̶aa sãwã mʌ̃a bãrãra nama mʌ̃maa bio waga enesida nejõbʌba idji warrarãra waga enibabari quĩrãca. 5-6 Id̶i mʌ̃a bãrã ume bed̶eada b̶ʌya. Maʌ̃ bed̶eada ĩjã od̶ibʌrʌ, mʌ̃a dewara puru b̶ea cãyãbara bãrãda bio quĩrĩã erob̶aya. Jũma naʌ̃ ẽjũãne b̶eara mʌ̃remĩna mʌ̃a bãrãdrʌ b̶ʌya mʌ̃ itea b̶ead̶amãrẽã idjab̶a jũmarã itea sacerdoterãda b̶ead̶amãrẽã.” Bʌa maʌ̃da israelerãa jarad̶e wãida b̶ʌa.–

7 Maʌ̃be Moisera Sinai eyad̶eba ed̶aa wãsia israelerã duanʌmaa. Jũẽped̶a dji bororãra trʌ̃ped̶a ãdjirãa ebud̶a nẽbʌrʌsia jũma Ãcõrẽba idjía jarad̶ada. 8 Maʌ̃ne jũmarã israelerãba ab̶ari quĩrãca panusid̶aa:

–Ãcõrẽba jara b̶ʌra dairãba jũma od̶ia.–

Ara maʌ̃da Moisera Sinai eyad̶e ʌ̃taa wãped̶a Ãcõrẽa mãwã panuped̶ad̶ara jarasia. 9 Maʌ̃ne Ãcõrẽba idjía jarasia:

–Mʌ̃ra jʌ̃rãrã pãĩmane bʌ ume bed̶ead̶e zeya israelerãba dadji bed̶eabʌdara ũrĩnamãrẽã. Mãwã ãdjirãba jũma bʌa jarabʌrʌra ĩjã panania.–

10-11 Idjab̶a Ãcõrẽba Moisea jarasia:

–Israelerãa jarad̶e wãdua nu nurẽma ãdjia acʌ duanʌne mʌ̃ra Sinai eyad̶aa zeida. Maʌ̃ bẽrã id̶i, nu bid̶a ãdjirãba od̶ida panʌa maʌ̃ ewarid̶e mʌ̃ itea bia duanani carea. Mʌ̃ quĩrãpita duanani bẽrã wua tãtod̶ada jʌ̃ pananida panʌa. 12 Idjab̶a naʌ̃ eya carra sẽyãda aud̶u jũrã b̶ʌdua. Israelerãra maʌ̃ sẽyã b̶ʌd̶eba ed̶aa wãnacara panʌa. Ãdjirãa jaradua: “Naʌ̃ eyad̶e ʌ̃taa bãrãra wãnacara panʌa ni dji carraya bid̶a wãnacara panʌa. Bariduada wãibʌrʌ wãrãda beuida b̶ʌa.” 13 Bariduada maʌ̃ sẽyã b̶ʌd̶eba ed̶aa wãibʌrʌ ni ab̶aʌba idjira jidad̶e wãcara b̶ʌa, ãtebʌrʌ mõgaraba tab̶ari bead̶ida panʌa wa chaba drʌ bead̶ida panʌa. Animarãda wa ẽberã sid̶a ed̶aa wãibʌrʌ idjira bead̶ida panʌa. Ab̶abe cachiru dãrã jĩguabʌrʌd̶e bãrãra naʌ̃ eya carra sẽyã jũrã b̶ʌ caita wãnida panʌa.–

14 Maʌ̃be Moisera Sinai eyad̶eba ed̶aa wãsia israelerãmaa. Jũẽped̶a ãdjirãa jarasia:

–Bãrãba od̶ida panʌa nu nurẽma Ãcõrẽ itea bia duanani carea.–

Ara maʌ̃da ãdji wuara tãtosid̶aa. 15 Idjab̶a Moiseba ãdjirãa jarasia:

–Nu nurẽmabema carea bãrãra bãdji quima ume quĩrãipa cãĩnida panʌa.–

16 Ewari ũbead̶e diaped̶a baada b̶ae nũmesia. Maʌ̃ne jʌ̃rãrã pãĩmaba Sinai eyara ãnã eronũmesia idjab̶a cachiru quĩrãca dãrã jĩgua nũmesia. Maʌ̃ carea jũma israelerãra dauperabʌdaba ure duanesid̶aa. 17 Maʌ̃be Moiseba israelerãra ãdjirã duanʌmaʌba Sinai eya carrad̶aa edesia Ãcõrẽra bed̶ea b̶ʌda ũrĩnamãrẽã. 18 Sinai eyara cowaga nũmesia Ãcõrẽra tʌbʌ urua bara zed̶a bẽrã. Maʌ̃ cowaara pea bad̶a cowa quĩrãca nũmasia.*Pea bad̶a cowa quĩrãca. Hebreo bed̶ead̶e nãwã b̶ʌ́ b̶ʌa: “Egoro cad̶a zareabibari tʌbʌ urua cowabari quĩrãca.” Idjab̶a jũma maʌ̃ eyara minijĩchia ure nũmesia. 19 Maʌ̃ne cachiru quĩrãca jĩguabarira jĩguaara nũmesia. Moiseba Ãcõrẽa bed̶eabʌrʌza Ãcõrẽba panubadjia baa jĩguabʌrʌ quĩrãca.

20 Ãcõrẽ Sinai eya borod̶aa zesid̶e Moisera trʌ̃sia ʌ̃taa zemãrẽã. Ara maʌ̃da Moisera ʌ̃taa wãsia. 21 Maʌ̃ne Ãcõrẽba Moisea jarasia:

–Israelerãmaa ed̶aa wãdua. Ãdjirãa jaradua naʌ̃ eya carra aud̶u jũrã b̶ʌ sẽyãneba ed̶aa zecara panʌda mʌ̃ acʌd̶i carea. Mãwã od̶ibʌrʌ beud̶ia. 22 Sacerdoterãba ẽberãrã carea mʌ̃́a bed̶eabadamĩna maʌ̃ sẽyãneba ed̶aa zed̶acara panʌa mʌ̃ acʌd̶i carea. Ãdjirã bid̶a od̶ida panʌa mʌ̃ itea bia duanani carea. Mãwã od̶aẽ́bʌrʌ mʌ̃a ãdjirãra quinibiya.–

23 Moiseba Ãcõrẽa jarasia:

–Israelerãra naʌ̃ Sinai eyad̶e ʌ̃taa poya zed̶aẽ́a, bʌa dairãa mãwã jara b̶ʌd̶a bẽrã. Bʌa naʌ̃ eya carra aud̶u jũrã dairãa sẽyãda b̶ʌbisia, naʌ̃ eyara ab̶abe bʌ itea b̶amãrẽã.–

24 Ãcõrẽba idjía jarasia:

–Israelerãmaa ed̶aa wãdua. Maʌ̃be Aaroʌ̃da nama ʌ̃taa enedua. Baribʌrʌ sacerdoterãra, dewararã sid̶a naʌ̃ eya carra aud̶u jũrã b̶ʌ sẽyãneba ed̶aa zed̶acara panʌa ʌ̃taa mʌ̃maa zed̶i carea. Mãwã od̶ibʌrʌ mʌ̃a ãdjirãra quinibiya.–

25 Ara maʌ̃da Moisera ed̶aa wãped̶a israelerãa Ãcõrẽba jarad̶ara jũma nẽbʌrʌsia.