16
Agaraba Ismael tod̶a
1 Abraʌ̃ quima Saraira warra toca basía, baribʌrʌ Saraiba Egiptod̶ebema nezocawẽrãda erob̶asia. Maʌ̃ nezocawẽrã trʌ̃ra Agara abadjid̶aa. 2 Ewari ab̶a Saraiba Abraʌ̃a jarasia:
–Mʌ̃ra Ãcõrẽba warra toca wẽrãda b̶ʌd̶a bẽrã, mʌ̃a bʌ́a bed̶ea djuburiaya mʌ̃ nezocawẽrã ume cãĩmãrẽã. Ãĩbẽrã mʌ̃a warrada idjid̶eba erob̶aisicada.–
Saraiba jarad̶ara Abraʌ̃ba ĩjãsia. 3 Ara maʌ̃da Saraiba idji Egiptod̶ebema nezocawẽrãra Abraʌ̃a quima quĩrãca diasia warrada to diamãrẽã. Mãwã osia ãdji Canaaʌ̃ne die poa panasid̶ad̶e. 4 Ara maʌ̃da Abraʌ̃ra Agara ume cãĩsia. Maʌ̃ne Agarara b̶iogoa b̶esia. Maʌ̃ cawad̶acarea Agaraba idji boro Saraira igara b̶esia. 5 Maʌ̃ bẽrã Saraiba Abraʌ̃a jarasia:
–Bʌdrʌ bed̶ead̶e b̶ʌa Agaraba mʌ̃ igara b̶ʌ carea. Mʌ̃a bʌ́a idjira diasia quima quĩrãca. Baribʌrʌ idji b̶iogoa b̶ʌ cawasid̶eba ʌ̃taa mʌ̃ra igara b̶ʌa. Ãcõrẽbʌrʌ cawa b̶ʌa caida bed̶ead̶e b̶ʌda: mʌ̃da wa bʌda.–
6 Maʌ̃ne Abraʌ̃ba Saraia jarasia:
–Acʌdua, bʌ nezocawẽrãra bʌ jʌwaed̶a b̶ʌa. Bʌdjia quĩrĩã b̶ʌ quĩrãca odua.–
Ara maʌ̃da Saraiba dji nezocawẽrãra biẽ́ o b̶esia. Maʌ̃ carea dji nezocawẽrãra mĩrũ wãsia. 7 Agara mĩrũ wãne Ãcõrẽ nezoca bajãnebemaba idji acʌd̶e zesia.*Ãcõrẽ nezoca bajãnebema. Versículo 13d̶e ebud̶a b̶ʌa Ãcõrẽda mãwã b̶ʌda. Idjia Agarara unusia ẽjũã põãsa ewaraga b̶ʌd̶e egorod̶eba baido ʌ̃ta bogadrʌ b̶ʌma. Maʌ̃ baido ʌ̃ta bogadrʌ b̶ʌra Sur ẽjũãnaa wãbada od̶e b̶ʌa. 8 Maʌ̃ne Ãcõrẽ nezoca bajãnebemaba Agaraa iwid̶isia:
–Agara, Sarai nezocawẽrã, ¿bʌra sãmaʌba zebʌrʌ? ¿Sãmaa wã?–
Agaraba panusia:
–Mʌ̃ra mʌ̃ boro Sarai ume b̶ad̶ada mĩrũ wãa.–
9 Maʌ̃ne Ãcõrẽ nezoca bajãnebemaba jarasia:
–Bʌ boro Saraimaa jẽda wãdua. Idji bed̶eara jũma ĩjã odua.–
10 Maʌ̃ awara jarasia:
–Mʌ̃a bʌd̶eba zocãrã yõbiya. Mãwã zocãrã yõni bẽrã poya juachad̶aca baya.–
11 Idjab̶a jarasia:
Bʌ b̶iogoa b̶ʌra umaquĩrã warrada toya. Maʌ̃ warrara trʌ̃ b̶ʌdua Ismael, mʌ̃a bʌ bia mĩga b̶ʌd̶ebemada ũrĩna bẽrã.† Hebreo bed̶ead̶e Ismael trʌ̃ba jara b̶ʌa “Ãcõrẽba ũrĩbaria.”
12 Idjira ni ab̶aʌ jʌwaed̶a b̶aẽ́a. Jũmarã ume djõ b̶aya. Idjab̶a jũmarãda idji ume djõ b̶ead̶ia. Idji ẽberãrãnebemada jĩga b̶abari baya.‡Idji ẽberãrãnebemada jĩga b̶abari baya. Maʌ̃ bed̶eaba idjab̶a jara b̶ʌa “idji ẽberãrã quĩrãpe b̶abari baya” wa “ara idji ẽberãrã ume biẽ́ b̶aya.” Genesi 25:17-18.
13 Agaraba cawasia Ãcõrẽdrʌ mãwã bed̶ea b̶asida. Maʌ̃ bẽrã Agaraba jarasia “Mʌ̃ unubari Ãcõrẽda mʌ̃a unusia.” Maʌ̃ carea Ãcõrẽ trʌ̃ra nãwã jarasia: “Bʌra mʌ̃ unubari Ãcõrẽa.” 14 Maʌ̃ bẽrã dji egorod̶eba baido bogadrʌ b̶ʌra trʌ̃ b̶ʌsia “baido bogadrʌ b̶ʌ Ãcõrẽ zocai b̶ʌ mʌ̃ unubarid̶e.”§ Hebreo bed̶ead̶e maʌ̃ baido bogadrʌ b̶ʌra Beer-Lajai-Roi trʌ̃badaa. Maʌ̃ baidora Cadé puru idjab̶a Bered puru ẽsi b̶ʌa.
15 Agara jẽda wãped̶a umaquĩrã warrada Abraʌ̃a to diasia. Abraʌ̃ba Agara warrara trʌ̃ b̶ʌsia Ismael. 16 Agaraba idji warra Ismael tosid̶e Abraʌ̃ra 86 poa b̶asia.
*16:7 Ãcõrẽ nezoca bajãnebema. Versículo 13d̶e ebud̶a b̶ʌa Ãcõrẽda mãwã b̶ʌda.
†16:11 Hebreo bed̶ead̶e Ismael trʌ̃ba jara b̶ʌa “Ãcõrẽba ũrĩbaria.”
‡16:12 Idji ẽberãrãnebemada jĩga b̶abari baya. Maʌ̃ bed̶eaba idjab̶a jara b̶ʌa “idji ẽberãrã quĩrãpe b̶abari baya” wa “ara idji ẽberãrã ume biẽ́ b̶aya.” Genesi 25:17-18.
§16:14 Hebreo bed̶ead̶e maʌ̃ baido bogadrʌ b̶ʌra Beer-Lajai-Roi trʌ̃badaa.